Ruk Ka Ru Maw?

Ruahlopin ka rual Hlawn Luai Mang tei kuangcen kiang tualrawn ah cooker washer ka sar. Thilsar tifam cu ka lungawizet. Kut ih cooker washer khih a lar lai tak a si bet. Pa takin ka kut ah ka khih cih. Zanlam rawlsuan cu hrawng ah Hlawn Luai Mang pa cu kan inn ah a ra ruairi.

Ka nulepa hmai ahcun“Na kut ih na khih mi cooker washer kha, kan maita a si. Tuizing Hlawn Luai Mang nu in a kheng kolhnak tidai ne thawn a theh ngah pangmi a si kha” in ti ko lo maw. A dik lawlaw. An tualrawn rori ih ka sar mi a si. Vantawlsen bang in ka hmai a sen hemhem.

Asinan, ka ruat ih ka thinheng. Ka nulepa hmai ah khavek in i mualphoh. Thate’n ka nulepa hmai lo ah in sim thei sisi tin ka thinlung ten’ ka phun. Phuhrungaw deuh si, thinhengsi, pa aw tirtak vekin ka ding. Cutin, Jesuh phiarsawm ding ah Judah Iskariot thinlung sung ih Setan a luh bang in, thuphan sim ding in thutluknak ka tuah lohli.

Kei khal, tangdor in a si ngai nan duhlo mi nan hlawn pang ah ka rak ruat ih cunah ka sar ngai so khaw, rak ti niahno men nungla kan thubuai a cem ding nan, cuhnak ih lekah “nan maita a si lo, tuini ah nan inn lam ka ra hrimhrim lo” ka ti zutzo. Ka nulepa in “cuvek kan fa le mi thil an ru dahlo” ti’n in run bawm bet. Hnget takih thuphan sim tlang a tul taktak thlang.

Tu ahcun rukru menmen ka si nawnlo. Ruru ih tlunah thuphan per ka si zo. Per cengmang cu per lawlaw keng tiin ka ruat. Thuphan dum le rang kan ti bang in “rukru” tiih kawhtlak cu ka si lemlo nan ka thin a nuam theilo. Zanriah khal ka ei thei nawnlo. Ka nulepa in ka tisualmi theiloin in rak ringsual bet. Nu le pa ih thu awih tuk ti rero mi in thuphan per le rukruk ka cem thlang. (Thufim 6:30) ih “Rilrawng ih rawl a firtu khi an nauta lemlo” timi hnak in ka dem deuh ding.

Asinan, sualte le sual tum a um lo. Fala pakhat taksa hiarnak thawn kan zoh ahcun cucu sual tiah pom a si thotho tiin Khristian Baibal ah ngan a si. Cuti asile sual tuahlo lawlaw kan um thei ding maw? Ruru lo teh kan um thei ding maw? Mi pakhat a manlo cing ih kan valeng khal khi a caan sunglawi kan ruksak a si thotho. Tui ka thuhla ah rukru ka si ve. Asinan, rukru tiah in dawi hnunhno sehla ka duh hrimhrim lo ding. Cutin, rei zet ka ruah hnuah a zan thlapi eng nazi 12 hrawng ah an tualrawn ka sarnak hmun rori ah ti khiokho ten’ ka va ret sal.

Cuticun thin daiten ka it that thei. Athaizing, zinglam nazi 9 hrawng ah kan inn ah a ra lala. Ehe! In ra dil sal tum a si hi, Ceilaw! Ka khur thlang. Sualawk a si thlang ding tin ka ruat. Kawk cu a dem deuh lai, mualpho hnak ih mualpho deuh ding in hitin I ti ‘mizan nazi 12, thlapi eng hnuai ih na ra ret sal kha, ka lo hmu. A thimnak kan sangkapi ah kuat fawp in ka to’ a ti.