Mai Far Men Par le Keimah

Ka nauhakte laiah "Lungte cu au hlah seh" timi loud speaker thawn tiruangro ih an phawnmi ka rak thei theu. Lai lam khawte behrek deuh ih um ti fam cu ka rak duh tuk lawmmam. A hla thu thatzia khal rak ruat mumal lo in, A aw mawi le a hlasakmi lunglen um tuk tizawng in ka rak ngai theu.A thuhla ka hun thei vivo.

A aw mawi tuk ruangah le kan Chin gospel album neitam a si ruangah ka ngaisang hleice siloin Pathian hlasak nak lawng ah ka aw, zaihla ka hmang ding tiih Pathian hnen ih tiamkamnak a neih ruangah ka ngaisang hleice sawn a si. Tuini tiang Far Men Par a si.Delhi a ra ding ti ka theih veten' ka tawng tengteng ding ti'n thuthluknak ka tuah. Rel tullo asinan, Far Men Par thawn thunuam kan rel tlang timi ka duh ve hrimhrim.

A tu ahcun, Far Men Par, Far Men Par ti'h mikip theih a sinak san cu a aw zaihla hlaan in thla arak cam ringring ih Runtu Jesuh kutnem ka kaih hlan sung zaihla thawn A rawng ka bawl ding a rak ti ruang ah a si ti ka thei ve ta!Kan Laimi hin kan unau Mizopawl bang in le miphun dang pawl bang in cawisanawk le lawmawk tawn thiam nungla tui kan neihmi aw tha Far Men Par vek rori tla hi cu ziang tin cawisang hen pei maw, tiin thu nepnawi deuh ka ruah caan ah ka telh theu. Far Men Par lawngsiloin kan Lai hlasakthiam hminthang Solomon, BJ, Susan etc. pawl khal cawisan ding le lawm ding zat in kan lawm deuh lo a bang ka ti.

Delhi, Sunday kan khawmnak biakinnpi ah Far Men Par hlasak dingin an ko. Far Men Par thuhla rak theitu le thuanthu bang ih rak theitu nauhak le nonawn tamsawn cun, a hlaan vekin a aw atha lai pei maw...a aw a tha taktak maw...hlasak a thiam taktak maw tizawng ih rak ngai tum khal kan tam pi ding; mipi ih kan ruahlopin hlaa sak tha thei lo in a mithli tla in a tap. Keyboard in a aw a lang theilonak zawn ah a rak zawn. Kan ngaisang sinsin lo maw!

Thlarau thianghlim ih umpi mi hi cu an dang lam a si. Cutin nuam nai teten' a hun sak thei sal ih zokhal in a aw mawi taktak maw tizawng ih kan thlir nak cu taan in Amah hman zoh ngamloin hnuailam zoh in kan mithli haal theh. Leitlun hla lenglawng sak lo in Pathian hla rori saktu cu kan Laimi ah nangmah lo midang ka thei lo tin ka thinlung le ka thuruahnak pawl in Far Men Par an rak kawn rero.

A hla hmaisabik ihsin hla netabik tiang lawrkhawmnak a tuahmi khal a theh ih mani 21 March 2010 ah Pathian hmaiah hlannak khal neih felzo a si. "U Par tui zan hlasak ding na si kha, ka lo tlunsan hrih ding maw, na man remcang hmaisabik caan ah ka lo kawmsal ding maw!

Ka Pu Cakuat

Dam lai awla, kum (200) na kim thlang ding. Pipu hlan thuanthu an rel tinten’ na hmin an rel tel theu. Black and White ih na zuk pawl tla, zung tampi ah an tar ka hmu.

Na thuhlapawl cabu in an suah. Thangthar nonawnpawl khalin na sualhnu le thuanthupawl an zingzawi rero. Na thlahsin hruaituthar pawlin na thu rak simciami pawl tehkhinnak ah an hmang theu. Ka rak lungawi thei nasa. An lo porh daanzia la anlo fak daanzia theive awla na lungawi tengteng ding.

Leitlun na suahsan zo nan, na hnatuanmi le na ralthatnak pawl kan hrang hruaitu a si ringring. Na thuhlapawl an rel tinten’ na dam lai ih thuanthu in simmipawl le pipu rak khawsatdaan in simmi pawl ka mangsal theu.

Ka lo ngai thei tuk. Ka pu na sinak hi ka nauhakte lai ahkhan rak thei ningla cu, cabu ah ka ngan theh ding nan; tu ahcun a tlai thehzo. Asinan, na relmi ka theihsun te pawl ka hngilh thei hrimhrim lo.

‘Chinmi in hruaitu tha kan nei lo’ an ti caan ahle, ‘Laimi cu kan lungruallo tuk’ an ti caan ah nangmah dam lai awla, cuvekin an simsuak lo ding tiin ka lo hlam theu. Tu ahcun fellowship, global org., group, party, pawlkom a phunphun din in hmuntin ah kan thenaw celcel thlang. Ka pu, kawhhran tampi kan din thu le pawlkom tampi kan tuah rero thu le ‘nanni kanni’ ti’h kan buainak thu pawl hi theive awla na thin a naa ve tengteng ding ka zum.

Cun ka pu, na dam lai ih a thlenglomi thil pakhat kan san ah a thleng. Himi thu ah ka lo demlo. Ziangahtile, fimthiamnak zirman loin kan lungrual zalennak dingah na thitha na rak pe liam theh. Atu kan san ahcun “O” le “Aw” tiin cafang pakhat-hnih ruangah kan calai misual bangin an kai-hrem. Vuak le velh a tuar ih lungsi o zetin an thlah. Cun, ai ha! Ka pen ti a cem zikte, na mitmal thawn ka cawl hrih ding.

Vahvaihnak New Delhi

Ram nuam thlen-hlan Malaysia le Delhi vekih khawsat hi cu tthal niling caan ih meisa ai vek tlukin ka ruat theu. Delhi lam ih kan harsatzia tla hi online ah siar ding a um ringring. Sungkhat phone ih biakawk cang khalah harsatnak le donharnak thu lawng hi kan simawk theu mi a si.

Refugee timi tongfang in hnen-um le sal vek ah in can ter theu ih nitin in refugee timi tongfang ih a khuh taangmi khal kan tampi ding ka zum. Ahleicein, pitar le putar hnatuan duh khalih vaipawl ih duhlopawl hrangah cun thinharnak a tam sinsin ding ka zum. Harsatnak thu cu maw! A tam tuk!

Asinan, kei cun hram caar lakih hram hring ti tla in ka ko ih cun thlaleer ramcaar lakih tidai thiangte ti khalin ka ko ih cucu, Kala inn fate luanglu hnuaiah um hman nungla ruahsannak taktak thawn ni nikhat ni ahcun hih kan harsatnakpawl kan ngai sawn lai ding tiih ruahsanak kan neih theinak hi sunglawi ka ti zet mi a si.

Thufim in, "mi pakhat ih cahnak le thiltitheinak cu a kut ah a um" a ti ih, cuhnak ih ka duhsawn pakhat cu zohman ih in uk theilomi kan thinlung hi a si. Refugee tiin hnatuannak hmun ah in nautat, in sit, in beng, a tam tuk a phunphun in in tuah asinan kan thinlung cu an dai baanlo.

Ni khatni ni ahcun....ziangtital in si maw...kan nuam lai ding...tiih kan thilung thuruahnak pawl hi kan hnak ih thuruat thiamlopawl ih nautatnak ruangah cun a cawl dah hrimhrim lo ding. Refugee pa thinlung ihsin ruahsannak a suak ringring ding.

Leitlun ih Scientist hminthang Einstein tla kha refugee a rak si ve ko.

We Are The Last Generation?

Kan suahhlan ah kum ziangmaw tizat a rak liam zo. Century (21-22) ah kan um.

Mi thiamsangpawl in 2000 hnu cun leitlun a thlengaw theh ding ti'n ţong phunphun in an sim. Mi tampi cun caan a cem ding titiang in an phuang. Asinan tutiang cu kan him hrih lai.

Asinan, tui kan dinhmun ahcun caan netabik ah kan um tisehla a lungkim tamzet kan um ding ka zum.

Curuangah kannipawl hi minung netabik kan si ding a bang. Kan san hi "Last generation" taktak a si thei men. Kan san ţheh ah san tampi a um ding, a zumtu kan um lai maw...?

Kan kiangkap thawmvang global warming, climate change etc. pawl le doawknak phunzakippawl a thleng thok thlang. Zohman ih theihlomi caan neitabik a nai thlang. Dungthluntupawl hnen ih theithiamnak Jesuh ih a rak pekmi an kim rero thlang.

Asinan caan tampi a um lai ding a bang.

Ziangasikhalle, minung netabik "last generation" cu kan si ko lo ding maw?

Pathian Na Duhdawt Maw, Na Tih?

Atlun ih thusuhnak hi buaipi a tlak lemlo menthei nan, ruahtham cu a um. Mi tampi thlacam ka ngai. Ka theihmi cu “Bawipa ka lo duh, “LORD we love you”an ti theu. Leitlun mi hin kan Bawipa kan duhdawt ih a hrang kan pum kan pek awk ahcun a va sunglawi zik ve.

Duhdawtnak thu cu kan simfiang thiamlo ding. Leitlun ih fala tlangval duhdawtnak hman hi, zohman in an simfiang theilo. Bawipai duhdawtnak cu zo in an simfiang thei ding! In duhdawtnak hi a ropi tuk. Sim rel ding rual a silo. Curuangah cui duhdawtnak thawn cun Bawipa hi kan duhdawt taktak maw ti hi ruah a tul. A tlangpi thu in minung hin Bawipa hi kan duhdawt lo. Asinan kan tihzah sawn a rak si. Nangmah le nangmah, sut aw hnik aw, Bawipa na duhdawt maw na tihzah.

Duhdawtnak le tihzahnak timi kan simfiang a tul thotho. Duhdawtnak cu hivek in a si; tlangval in fala a duhdawt tikah fala nui duh lo daan in a um ding a phang. Fala nu a duhdawt tuk ruangah a duhdaan ding le a lungawinak lawnglawng a hawl.

Fala nu ih a fialmi ziangkim a huam theh, thih hman ngam khawp in a um. Cu cu duhdawtnak a si. Tihzahnak cu hitin fiangle fianglo in kan simfiang tum ding, mi pakhat cu a sinak ruangah tihzahnak a hlawh. A lian ruangah maw, a hminthannak ruangah maw, a thuneihnak ruangah maw asilole a huham ruangah khal tihzah a si.

Tui kan ruah ding mi cu, Bawipa na Pathian kha na duhdawt maw, na tihzah ti a si. Duhdawtnak le tihzahnak hi bangaw zikte an siko nan danglam ververnak an nei.

Bawipa hin tihzah khal a hua lo nan, cu ai ih a duhmi cu kan duhdawt ding hi a si. Mizovek khalin Bawipa cu a um ti an thei ih an tihzah asinan a duhdawt ih a hrangih nungtu cu mi tampi an si lo. Bawipa hi tihzah hmaisa loin kan duhdawt hmaisa ding a si. Kan duhdawtlo ahcun Bawipa a thin naa tuk ding. Bawipa in upatnak le tihzahnak le thildang a zaten a phu a si.

Bawpai in dilmi cu amah kha, kan nunnak zate duhawt ih a hrang nun ding hi a si. Setan sal sinawn lo in Bawipai sal ah um ding in, Asinan Bawipa cun asal hman si dingah in sianglo ih a rualpi ah in tuah. Ziangah Bawipa cu a tih in kan tih ding, kan duhdawt sawn ding mi a si. Thlarau thianghlim in a lo umpi tikah Bawipa na duhdawt thiam ding. Na Bawipa kha duhdawt aw. Duhdawtnak ah ziangkim a um.

[Mark 12:30]

‘Bawipa nan Pathian cu nan thinlung zate, nan nunnak zate, nan ruahnak zate le nan thazaang zate thawn nan duhdawt pei.’ tihi a si.