Nitin Pathian Thawn Lamleng Tlang Nun

Bible Cathianghlim sungah Pathian thawn lamleng tlang theitu minung malte lawng kan hmu thei, cuipawl cu Enoch, Noah, Abraham le Zacharias pawl tla an si. Enoch hi an lak ahcun langsarbik a si. Annnih hi Pathian thawn lam an leeng tlang thei. Tong dang cun, Pathian thawn an titi thei. Kum 365 lenglo sung Pathian thawn an feh tlang ti rori in Cathianghlim sungah ngan khum in a um a si (Sem 5:21-24).

Pathian thawn lamleng tlang thei ding cun Pathian thawn thinlung le hmuntinmi bangawk tla arak tul. Minung lak khalah thu-nuam relpi ding, rualpi kan hawl ih titi nuam hi zocio khalin kan duhmi cu a si. Cuvekin, Enoch le Pathian khal kum 365 sung an rak pehzom aw thei. Pathian in minung hmaisabik Adam a sersiam thluh khalah Eden hmuan sung ah tlai ni neem tinten an lam an leng tlang timi kan hmu thei (Sem 3:8).

Setan in zarhtin kan khawmawk le Sunday tin Pathian kan thangthat hi cu pawi a ti lemlo ding. Ziangah tile, daan vekin kan tuah theu timi a thei ih kanmahte hnaihnok tuul lo in, kan hlo sal theu timi a fiang emem a si. Asinan Pathian thawn nitin pehzomawk kan neih tum ahcun in hnaihnok dingah ziangvek khal tuah a zuam tengtentg ding.

Pathian nung zumtupawl cu nitin kanmah le tawk cio in thlemnak a phunphun kan parah a thleng. Curuangah Sunday ni le khawm caan lawngih Pathian kan biak ahcun Pathian kan biak caan hi amal tuk ding. Thlemnak ah kan lut tengtent ding. Zumlotu fala mawi Delilah in nitin in Samson a bum ti kan thei. Curuangah nitin thlemnak kan tong ding timi cu theih cia a si. Pathian loram ei-setu sehal no te pawl tla khi kan zoh tikah nuam tete in, thil tum pipi siloin fa tete in Pathian lo ram an ei siat.

Peter Jenkins America rampi ke thawn rak heel suaktu, Awake America timi cabu suahtu hmaiton in thusuhnak an nei. Na feh suksonak ah ziangmi har na tibik tiah an sut, a phunphun in misual pawlin an hmuhsuam ih nam thawn khal an dawt. Nat a phunphun a tuar cun a ui khalin a thihsan ih, siarcawklo harsatnak a tong nan, harsa a tibik mi cu thil dang siloin, a buut sungih lei thaneel pawl cun feh thei nawn lo dingah a tuah thu a sim. Buut pakhat lawng a nei ih a buut sungih leidip a luh tikah a kee naa in a feh thei nawn lo theu ruangah harsa a tibik.

Peter Jenkins feh theinawn lo dingih tuahtu cu misualpawl le harsatnak dang siloin leidip/ lei thaneel malte men a si. Cuvek in Pathian thawn kan rualpithatnak in siatsuah thoktu ding cu thil mal tete le lolam tete an si ding. Pathian thawn kan pehzomawknak nun, Pathian thawn lamleng nun kan neih mi hi nasa sinsin in kan tuah that a tul a si. Veikat cu Enock in Adam hnen ah thu a sut, “Adam, Pathian thawn nan rak leen tlang lai ah ziangtin na um”? tiah a sut. Cutikah, Adam cun, Enock ih thusuhnak a saang thei nawnlo, a mithli a luang. Ziangahtile, Adam in Pathian thawn an rak lentlang lai ih a rak nuam zia kha a thei tiah Adrian Rogers in a rak sim dah.