Sir Awk Siar Lo Maw!

Ka Nu in “sumpai fang hnihkhat ka lo pek mipawl kha khawlkhawm awla, atulmipawl leinak ah hmang theu aw” tiah in cah. Ka theitawkin ka khawl theu. Asinan ziangmi leinak ah ka rak hmangral theh ti ka thei dahlo.

Culawngsiloin a tulmi ka cangannak kheh-daan khal a tul tinten’ in lei sak, asinan a cem tiang ka hman man hlanah a tamsawn cu ka hlo ter theu.

Ka pitlin hnu khalah cu thotho, daithlannak le tlamtlinlonak sawmso vivo in bawlpen ka hlohter zat siarcawk ding asi nawnlo. Cuvek thotho in mikip ih bangrante’h kan dawnmi caantha sunglawipawl khal, umzia neilo kheh-daan le bawlpen hlo bang in kan liam hlo ter caan a tampi ding ka zum.

Bawlpen le khehdaan cu sumpai thawn leisal a theih. Asinan caan liamzo hnu cu “liamzo” tin’ ka sim le a fiangbik ding ka zum. Fimthiamnak zir ding in tlanghradan ih kan rual le pipawl an feh liam rero hnu khalih zir duhlo ih kan umlak pang ahcun miih dungthluntu si duhlocingten’ mi’h dung ah kan feh ding.

Tlawngtha kaitheilopawl khalin raltlanpawl hrangih zirnak tete tuahmi ah “tlawnginn thabik cu kanmah le kan thinlung hi a si” ti’n zuamnak thinlungthawn kanzir sawn asi ahcun dungtawlh kan si hrimhrimlo ding.

Asile, zo pawl an hlawhsam ding…zo pawl an hloral ding…zo pawl mibanglo an si ding tiih thusuhnak kan tuah asile zirnak caan nei ko nan zir duhlopawl, harsat tuar ngamlo pawl, nuamceen duh hrihpawl, alak ih caan hmang reropawl cu mi banglo men hmansiloin mi’h ziangsiarlo ah an cang tengteng ding a si.

‘Delhi cu kan harsa tuk aw ram dang ah asilole neita deuh ah ka zir leh ding’ kan ti ahcun fapa tlanhlo bang in kan siraw sal tengteng ding.