Ka Pai Sam Meh

Ka rualpi tamsawn cu Hong kong tleirawlpawl bangin sam hnuailam tawi, a tlunlam sau, leu tikih khir thei ding in an met. Thawkkhat laicu Hongkong sammeh timi a rak laar ngaingai. Samzuah theicu mi’h uar le ngaisan vek a rak  si. Asinan, ka pa cun Hong kong sammeh a duh hrimhrim lo. Mipa samzuah timi a pomrem thei zawng a si ngelcel lo. Ka rualpipawl vekih samzuah ka dil tikah “mipa cu sam tawi melmiten” an um ding ih nunau cu sam an zuah ding’ tin olsamzet in i sang lohli theu. 

“Malten’ kun awla na hna kai phah aw, na cang tamtuk pang le na hna ka lo cep ngah ding” in ti. Betbet ah blaze hmang loin a kaihci bil tak, a zik canawlo thawn ka beksam sen helhelin I vel rero. Ka pai kaihci hmanmi hi hlanlai tapawl a si. A tum si, a dum zet bet fawn. 

“Ka pa, bul tuk cun i met hlah aw, a mawi lo” ka ti. Ka pa cun “samtawite na kaih, samsau cu hrik neihnak, cun a than tla na thang theilo pang ding” in ti. Keimah theh ih a meh ding mi ka naupa cu ka kiang ah ralpi veihnihnak ih lut ding bangin a rak ralring cia. Sammeh tinten’ kan sungzaten kan buai. 

A cancan ah ka pa ziaza a theibiktu ka nu cu kan kiang ah ra in, “Nuam tete in met aw uhla, nan bang tuk pang ding” in ra ti. Ka pa hi mi fek tak, thinsau tuklo, mizamrangzet le fim tak a si. Ka pa a thinheng caan ah ka nu cu daiten a um. Ka pa hi a thintawi zet ko nan a lungawi lohli theu. Ka pa a thinheng taktak caan ahcun thawthaw lo, mit theplo le cangloin kan dai khepkhep. A lungawi caan ahcun sal luat bangin zalen takin kan aukio. 

Ka Nu Tel Lo In Tui Kum Ka Liam Ding

A tui Kharisma ding zan ah ka nu in sumpai ziangzat I pe ding ti ruat phah in a phurah ka to ding ih a mithmai cu zawhte ih zinghnam a kil bang in ka kil tengteng ding. Himi zaan ahcun ka nu ti lungawi ding hlir ka ruat ding.

Zankhua a thim cun ka nu in kan paisa bawm bal hniaphnite sumpai malte khalsisehla tam zet bang ih kan retnak cu kau in “Kha le, hi hmuah teh in a lo daih pei maw”? tin sianglo cingten Kharisma poket money ding I pe ko ding. Ka laklo ahcun rualpipawl ka kawm ngam fawnlo ding; ka nu ih kut sung ih sumpai malte cu a mithmai zoh phah in ka lak a tul.

Atu ahcun ka nui kiang ah ka um thei nawnlo. Aduhdawtnak kiang ih um cu ka duh ringring ko nan ka hawi le pi pawl va ral an kai ahcun ka kai ve a tul.

Zan ka mang le ka sawngtuanak ahcun maw! A hlan ih kan inn ah to khawmin rawl kan rak ei tlang. Kharisma caan ahcun ka nu in ka um lo ti theicing in I hawl rero ding ti ka thei. Kei khal ka nui neihsun sumpai cu ka nauhak lai ah ka rak dil tam tuk zo a tu cu a duhdawtnak, a tangnem ka dil sawn thlang ding.

Cartoon Ram Ah Ka Tlawng

Cartoon ram tlawng ding ih ka tumnak a reipi zo nan, remcanlonak a phunphun ruangah ka thul sal theu. Thinlung tumruhnak ruangah Cartoon khawpibik cu ka ruksaihte thawn ka thleng zik te thlang. An khawlu ka thlen ihsin sumtual rawnih an lek auaw thawm ka thei celcel zo. Cartoon ram ka tlawn a veikhatnak le a hmaisabiknak a sifawn ih ka ruat buai nasa.

An khawpi khar sangka kiang ah ka kianghrol le ruksaih thawn cun ka ding. Ka lut ngam hrihlo, In rak hua pang pei maw…in rak hmuhsuam kei maw…ziangtin in rak ruat ding timi ruat tin ka ding ringring.

Sangka pi cu amahte a ong aw runro. Ai ai ai, an ram a va mawi ve….khi! tlang pawl tla khi aw…ava mak ve! an ram an kulh thiam dan…Ala! Tidai fimte, a cirhmi a si khi…Ee, ee! Pangpar hmuan, vatepawl, rannung tla hitin an tlang khawm…an innpawl cu a va danglam ve, thinkung pawl…an inn kiangkap ih hmuan dum pawl khi ee…

Aw! An sim, leitlun hmuhlo ram nuam a si hi… “Hey….na hmin! khuitawk ram in na ra…minung na si maw…Cartoon ram in kan lo hmuak! Kan ni Scubidu pawl kan si. Hi, kan ui fim…ra aw, na bang tuk lo a sile kan lo vah pi ding” in ti.

Lamzin kap ah mipi an tlar khawmaw ih “kan lo hmuak, kan lo hmuak” tin an aw neih tawp suah in an au. Hivek ram ah hitluk mipi an rak um maw….an va rak nuam awm ve aw! Ziangmirawl an ei? an lung va rual awm ve aw…duhdawtnak an neihzia hi…

An khaw upapawl umnak hmun pakhat ah in luhpi.  Power girl pawl ka hmu. Innsung ah in hruai vivo ih papai le a tlangval pahnih thawn in rak hmuak ih nan rawl ei dingmi kan lo tuahsak theh zo, cabuai va kil uh” in ti. Ka lau sinsin. Leitlun ah ka um lo. Ka hmin ka hngilh siloin ka mang nawnlo taktak. Khuiah ka um thlang  hi!

Papai in an lo biak duh in ti, hello, zo si “hey, Ka pu….Tom ka si, kan ram in ra tlawng ti kan thei, zangfahten na tlun hlan ah in rak pal ta aw…Jerry thawn rawl ei kan lo sawm duh. Aw!
February 15, 2010 

Kei Par Tin Lawr!

Kei cu kei ka si. Ka thinlung khal thu ka sim theu nan a sang dahlo. Ka ruangpi cun a rak bawm ih lungrual in kan zaten kan duhlomi kan tuah khawm. ‘Mi cun mifelte a si’ in ti, asinan ka sinak theitucu ka thinlung le keimah lawng an si.

Fala! ka lo sim,  I thei duh hlah aw, mi danglam ka si. Khatin I zoh hlah aw, thang sung ah na thleng ding. Na tongkam ralringaw ka tongsual na ti leh ding. Thu ka cingtheilo nan cinken theimi ka nei ve.

Mi farah te ka sinan duhdawtnak ahcun ka lian. Ka theihcia mi thu le hla bangin na sim ding mi ka thei. Asinan, I dai hlah aw, thaihliak ka si. Na tohnen pangmi na puante ka hnuk duh nan thildang pin na ruat pang ding ka phang.

Ka mithmai cu thurobang a nem ko nan ka thinlung cu zan palaap a si. Na hnih caan te ah paradise hlo ka hmu. A hlo sal. I zoh caan ah na mitsung ah Pu Noah ih vangro ka hmu. A thlahmi thuro raangte thawn.

Keimah Pa Ruangah Na Thin A Naa Ding

I Zoh duh hlah, na siraw ding, Reipi I zohtu pawl cun in hngilh theilo. I zohrei asile, ka mitsung ih a thupawmi na hmu ding. I zoh tikah biak duhnak thinlung na nei ding. I biak tikah ka awkam thlumte in a lo zawl ding. Theicing theicing in vanim va a thihnak ding thang sung ih a luh bangin thihnak innpi sungah na lut ve ding a si.

I biak tam le I zoh tam asile na sirawknak a tam sinsin ding. Film cang pawl le bawifa pawl bangin ka hmel a thalo nan ka awkam a thlum, ka cangdaan le ka mizia in a lo zawl aa ding. A lenglam na hmuhmi ka mizia in a lo bum rero ding. Kei cu a langte mi duhdawt hmang ka si, zangfahnak tla ka nei ih duhdawtmi tla tampi ka nei.

I tham hlah aw, ka hling in a lo sun ding. Na thi malte a suak ding cule kumkhua I hngilh lo ding. I tham duh hlah. Fala tampi cu, theicing theicing in siraw cia in le tap rero cia in ka duhdawtnak innpi sung ah an lut theu. Thingkung tumpi hreitlung ih cehbakmi bang in an thinlung ah hliamhma ka pu ter a si.

Duhdawtnak Langter Daan

Mitin in Duhdawtnak kan nei cio. Mi aa khal in a nei ih, mi fim bik khal in a nei, Siangpahrang khal in a nei ih Sal pawl khal in an nei. Mi farah, milian a um lo, zo cio khal ih neih thluh mi a si.

Mi tthen cun duhdawtnak cu Tlangval le Fala pawl hrang lawngah siin kan ruat ttheu sinan mi tin hrang a si. Pitar le putar hrang khalah a siih nauhak hrang khalah a si. Kan lan tir dan lawngte a bang aw cio lo.. Fala fel ih an Tlangval hnen ih an duhdawtnak an lan tir dan famkim lo zet in runlo hlawm ve sehla.

A lo zoh tikah nangmah thusuh duh mi nei vekin a um ding. Na zoh rei deuh le a mit a la ding. A rak lo zoh thup rero ahcun a lo hua lemlo ding ti cu na theihcia a tul. Cun fala thenkhat cu tlangval hailo lawlaw le zoh duhlo lawlaw bangin an um nan a thupten an mitmei in, mi an rak zoh thup theu sawn a si. Cu cu nunau ih an mizia mipa an zoh thlithlai nak ih an thuthup pakhat a si ve.

Na biak tikah ningzak nawn vek in a um ding. A mit in a lo zoh rei ngamlo ding. Na suhmi thu lawng a lo sang ding. Tahthimnak ah “Na dam maw”“Aw, ka dam” ti hrawng vialin a lo sawn ding. Zah tlakah a lo ruatih a upatmi tlangval na si ti na theihawk a tul ve.  A nunau sinak ih zahumnak na humhim pi thiamding khal na ttuan vo a si.

Nan hmu aw theu ding, nan be aw phahphah thlang ding. Asinan a lo zahnak le a lo upatnak cu a thlah lo ding. A kelten a thinlung sungah a um ding. Thu tampi lo sim tla a duh zet theu men ding nan tlangval pakhat na siih fala pakha dinhmun in a lo biak theu ding ti thei aw. Thu hla a lo sim thei nak dingah nangmah khal a hnenah thinlung phum zet in thudik mi sim aw. A lo zahnak le a lo upatnak a sang sinsin ding.

Thuphan na sim mi a theih ahcun a lo zum ttheunak a hlo dingti hngilh hlah. Na duhlo mi a ceiawk dan le a tongfang hman mi pawl neem te le a ning zak lo dingin sim aw.. Na theih lo sungah rak tthin a zuam dingih nan tonawk sal tikah a danglamnak thei tumaw, a ceiawk dan in si maw, a ttongkam in a danglam mi a um ding.

Fala fel mizia tlangpi cu ningzak an nei ih ningzak hmang mi an sinan ningzak lo vek ih um hram an tum ttheu. An duhmi po lo zet in an rel dah lo, dimte le aw neem te an rel ttheu.. a tlangval pa an duh vek in a tlangval pa ih inn sang pawlkhal theih kim ih kawmawk nuam an ti ttheu.

Fala pakhat, duhdawtnak thu na sim ngam hrihlo mi, na duhdawt zet le a mah khal ih a mithmai a lo pek mi nu ih a lo biak dan na theihthiam ding a thupi zet. Ziangah tile caan awl nan neih caanah thuhla lo sim thok danding a harsat men thei. Lam nan len tlang caan khalah a duhzawng theihthiam in a duh mi relpi in a phurnak rel pi aw.

Lam nanlen ah si maw nan mah te ih nan titi caan awh si maw nitin ih na thil tuah kel mi a thei ko na ih.. Tulai ziang na tuah theu?, a lo ti ah cun, Mirang tong kan sang ding ih “A lo care zo”  tampi a lo ruat ve ttheu tinak a si. Na tuahmi a thei duh ih, fala dang na nei maw timi tiang khal lo suh a duh nan a lo sut ngamlo tinak a si. Tlangval pawl ih theihtulmi pakhat leh cu fala pawl ih rinhlel dingih tong cin lo ding hi a si.

Kan inn ah ra lengaw a lo ti ahcun sim duhmi tampi a lo nei tinak a si. A lo huat lo zia a lang ternak hmaisabik tongkam a si ti khal in kan ti thei ding. ‘Asinan, na buaituk ih hmaisong na um tuk ih lo sawm ngam tuk na si lo’ ti vek maw a aw kam seh dan ih zir in a thinlung sungah na cam zetzo ih a lo upatnak kha a langter ih na kiang ih um nuam a ti theinak dingin na thinung pek thiam tum aw. 

Cucu nunau ih an duhdawtnak an tilangnak pakhat khal cu a si ve.

A Email ID, a phone nambat, Adress, pakhat khat si maw, asilole thil pakhat khat thawn a lo duhdawtzia a langter ding. Tahthiamnak ah, “in phone hmen” tivek in, Email ka check ve theu tivek in, kan inn na thei ko maw tivek in a lo ti ding. Na thei lo mi ah aw ka thei ti hlah, na thei lo mi cu sut awla, a lo sim mi hngilh nawn lo. A lo rinsannak ding hmai hruai tu le a duhdawtnak le a lo ngainak a lang ternak ding hmunkhat a si.

Mi zan cu ka lo ngaituk? a lo ti ah cun a thinlungah na cam  tuk tinak a si lo hman ah a lo duhdawt nak ruangah danglam zet in a lo sim a si. Cucu nunau fel mizia a si vek in fiang zet ih a nunau nunmawi zahthiam zet ih a lo sim ti theithiam pi aw.

A lo duhnak na theithiam theinak dingah, a lo suh dah lo mi… a lo suh tikah, a thinlung ih um theihthiam pi lohli tum aw..caan ttha na neih mi tlansan tum lo in, a lo rinsan lai le a thinlung ih na um lai caan na hril thiam ding a thupi. Nunau pawl in an duhdawt zetmi hnen hmanah an thinlung an pholang lohli dah lo.

A mit  le a aw kam na thinlung zaten ngai aw, a lo dudawtzia na theithiam ding. Mi lakih nan mit a tawnawk phahphah ahcun a thinlungah na um lo khal le, na mizia, na um daan theih fiang a duh tinak a si.

Duhdawtnak cu thilsual a si lo. Fala pakhat in tlangval pakhat hnen ih a duhdawtnak a langter daan hi theihthiam cawk ding cu a si lo. Ka lo duh ti sawnlo in a tongkam, a mitmeng, a sinfen, an um tu ziaza in an lang ter sawn ttheu a si.

Duat Hrangah Kei Cu A Tuartu Ka Si Ee!

“Cuti zatzat a kim man lo, na theisual a si kha, mizan zan leh ah tla kan biakawk ko ual, na mang nawnlo maw? Aw si! na mawhlo tarlam hi cun thil an hngilh theu” in ti ahkhan ka thinlungten ka mawhthluk aw, ‘ka lo ngaituk’ tin rak lo tisawn sehla a tha sawn ding nan ka lo ngai tuk tin kan biakawk tinten ka lo sim theu fawn, na ningtuk ding ti phang ah “in phone lo nak zarhkhat a kim zo” ka rak lo ti pang. Asinan lobiak lo ih zarhkhat um ding cu sim hlah aw, nikhat te hman rei tuk in ka thei. Kan umnak ram a bangawk lo ruangah vei tampi cu sun le zan ti khal theilo in “Na tho tha maw?” asilole “Mangtha tha maw” cun “Tui sun ziang na tuah ding?” kan ti awk pang theu kha!