Phone In Kan Innsang A Siatsuah!

Phone tok phah in TV a zoh. A kiang ih to pawl zoh lemlo in a biak phah.

Biakinn khalah a bih, mi' lak khalah a bih. A tu le tu a bih.

A duhzawng an rel lo asile, a luu a tung dahlo. A bih keelten a bih. 

Kiangkap ih um pawl hnakin a hlatnak hmun ih um pawl a bih duh sawn. 

Reilote sung a phone a ret theilo, a thisen ah a cang zo. 

A phone khi a sakhua biakmi, a nunnak hrampi a si. 

A ihthah hlan sung poh, a bih, a thawh veten a bih sal. Sunivu a bih. A bih cem theilo. 

A nunnak khi, bihnak in maw a cem ter ding, ruun theitu nan um maw!

Falam Mipi Hruaitu Sawisel Kan Tuar Ngam Lo Tuk Maw Si?

Falam pawl cu, an hruaitu pawl an sawisel ringring timi ka thei theu. Anmah hruaitu le hruaitu lak khalah an kee an phet aw theu timi khal ka thei. Himi pahnih ruangah Falam pawlin hruaitu tha kan suah thei lo a bang!

Cucu a si ngaingai maw? 

Mipi ih sawiselnak ruangah kan hruaitu pawlin, mipi an hruai duh nawnlo timi cu hruaitu pitling lungput a si in ka thei lo. Mipi sawiselnak ruangah hruaitu pakhat in a kaihhruainak a colhsan asi ahcun hruaitu pitling a si thei lo ding. Thimnak ah, Moses, Joshua le Jesuh pawl tla khi, sawiselnak hnakin an hruainak ding hmun thlenpi ding an thupit ih an colhsan dahlo.

Mipi an um ahcun hruaitu khal an um. Hruaitu an um ahcun hruaimi khal an um. Hruaimi an ahcun hruai theimi khal an um atul. Zovek miphun khalin anmah le tawk cio in, an mipipawl hruaikai theiawknak lamzin an sial theu. A that le a siat lam cu thu khat.

Kannih Falam hruaitupawl, mipi ih sawiselnak ruangah hruaitu pawlin, in thlenpi nak ding hmun, in feh pi duh nawnlo asi ahcun hruaitu Judah Isakariot kan si tinak a si. Siangpahrang David kha, Chin Organisation ih a tuanpi men siloin, a tlun ih Siangpahrang Saul rori in a kee a phet tum cu rel hlah, thah ding rori tiang in a vo. A si, Siangpahrang David vek Israel Siangpahrang ah hruaitu hlawhtling an neilo ti khawp hial a si.