2018 In A Liam Pi Lo Ding Mi

Ka hrang ahcun 2018, hi a liam cak ngaingai. Monday ka hman that lo ahcun Sunday in a dawi man ringring theu. Kum dang hnakin caan aliam cak ce in ka thei. Ka kum khat sung caan hman daan hi “busy” hnak in malte’n a saang deuh. 

A buai zetmi kum khat sungah Pathian in lam i hruainak maksak zetzet ka hmu. Curuangah 2018 hi, tongfang tawite’n simfiang thei ding sisehla, “Buainak lakah Pathian ih kaihhruainak” tivekin ka simfiang thei ding ka zum. Kum khat sungah Pathian ih a kaihhruainak hminsin pathum ka nei. 

Van le Leilungpi Zoh Aw

Lamzin pi ih mawtaw ka mawn rero lai ah, Pathian thawn kan be aw. Ka thinlung in Bawipa a hawl. Bawipa, ziangtinsaw I umpi timi ka theih ringring thei ding? Ziangtin saw, nangmah thawn kan nun tlang ringring thei ding tivekin, ka thinlungin Pathian thu ka sut. 

Cutikah, “Van khi zoh hnik, a tuum na ti maw, vaan khi cemnak le thoknak teh a nei maw? Timi aw ka thinlungah a thleng. Ka mithli a haal. Pathian ih biak le umpi ka duh theu nan, I biak ih thu I sim taktak asile mithli thawn ka khat sal theu.

Van cu fiangten ka zoh. Cumi theh ihsin, tui mawtaw na mawn reronak lamzinpi le fing tlang pawl khi zoh hnik aw, zo ih tuah a si ti’n ka thinlungah awkam vekin a thang lala. Himi pawl hmuahhmuah hi keimah in ka lo umpinak, ka lo umpi zia na hmuhmi a si tivekin ka thinlungah, aw fiangzetin ka thei.

Ka mawtaw mawng lai cu, lungawinak mitthli thawn ka khat. Bawipa ka lungawi ti’n lungawithu ka sim. 

Tuukhaal hminthang le biazai ngan thiam David khalin (Saam 19) ah Bawipai’h umpinak arak arak ngan lang zo. Himi hnu cun, Bawipai’ I umpi zia le, sing loin, in zoh daan pawl ka fiang thar sal a si.

Pathian Tuum Sinsin Kei Te Sinsin

Ka nunnak ah Pathian tuum sawn loin, keimah ka tumsawn theu ruangah a tullonak ah thinharnak le buainak ka nei theu. Ka hnak ih thiltithei sawn, ka hnakih caksawn a um lai ah ring ngamlo in, a cangvaih aiin, ka rak cangvai sawn theu ruangah ka cau theu. 

Ka tuan thei nawnlo ih ka colh hnu ah Anih hnatuan dingin a kaam theu. Bawipa ka thangthat le ka riannak ah keimah ka tumtah lo vekin thil a cang tikah riahsia khalin ka um. Asinan, keimah cu a tee dingmi ka si ih Bawipa a tum ding mi a si timi ka theih tikah ka nun a nuam theu.

Baptist petu John ih Pathian hna a tuan daan hi zohthim a tlak nasa. Jesuh ih fehnak ding lamzin a sial sak. Jesuh cu a tum sinsin ding ih kei cu ka tee sinsin ding a ti theitu a si (John 3:30). Baptist Petu John hman in cuvekin Bawipa Jesuh lamzin a sial sak ahcun kei cu, ziang vek in Bawipai hrangah hna ka tuan a tul timi ka fiang. Curuangah, kum khat sungah duh vekin thil a cangsuak lo hman ah Bawipa sawn a tum ahcun a pawi lo tiin tui kum sungah lut put ka nei thei.

Na Duh Bangin Siko Seh!

Harsatnak tampi ka nei, theihthiam theilomi ka nei, Pathian hnen ah dilmi ka nei ringring fawn. Asinan thlacamnak ka nei ih, “Amen” ka tuah hlan ah Bawipa “Na duh bangin si ko seh” tiah net ka khaar theu. Ziangahtile, ka hrang theifiang sawntu Pathian a si. Kei cun, malte lawng ka thei. Anih Pathian cun ka hmailam ziangkim thu a hmu thluh. 

Himi “Na duh bangin si lo seh” timi hi, Pathian fapa Jesuh Khrih khalin, thihnak a tuar zik zaan ah, Apa Pathian thawn an biakawk zaan ah arak hmang dah. Tongkam khat te asinan, himi tongkam khat in Pathian thuneihnak a pe a si. 

Curuangah kei khalin himi (Matt 6:10), “Na duh bangin siko seh” timi hi kum khat sungih ka hman ringring mi tongfang ah acang. Pathian in hna a tuan ding tikah, a mai duhdaan in kanmah hmangin a tuan ding a si sawn. Kanmah sawn in, na hna ka tuan dingih hivek in cangvai aw ti’n kan sim ding a silo. Anih cu Pathian a si. Thuneihnak neitu a si.

A tlun ih ka tarlangmi Bible bungcang pawlin ka kum khat sung caan hman daan in uk zet  a si. Saam 19, John 3:30 le Matt 6:10 pawl hi kum 2018 in a liam pi theilo dingmi an si.  Kum 2019 khalah, Pathian lamhruainak thar in pe dingah Bawipa lam ka thlir a si.