Ka Nui' Nunphung

Leitlun Nui' Ni ah phun dangdang in ka nui hrangah ca ka ngan sak theu. Cule, midang tla ka hlawm ve theu. Tuitum cu ka ngan ka ngan ih netnak ah "Ka Nui' Nunphung" tiin thulu ka pe. Exam nai thawn, feeling a danglam zet.

Ziang Hmuahhmuah A Thei

Ka nu in, ka pai’ mizia a thei thluh. Ka pai’ lungawi theinak le, ka pai’ thinheng theinak khal ka nui’ kutsung ah a um. Ka pai’ hmailam caan khal, ka nui kut sung ah a um thluh. Ka nu cu cathiam le zirsang hrimhrim arak si, Pathian le Nature ihsin PhD tiang rak ngahtu a siih, kan innsang cu a kilkhawi thei zet. Pathian te a si ngaingainak cu ka thinlung zaten a hmuhfiang thei thluhnak hi a si. “Na thinlung ka lo thei thluh, ka fa na si, na fehnak kipah ka mit ka ret” in ti. A hrimhrim in ka nu in, mi theihtheinak thlarau khi a nei in ka thei, thusim ngai lo ih, hramlak ka feh caan khalah, inn ka tlung tikah a hmai ah thuphan ka sim thei ṭheu lo.

Ka aiawh khalin, Pathian in biak sak dah. Ka nauhak lai ah, rawl-ul in zarh khat sung thla ka cam tum, ni thum ka cam zo, ka nu in i siang nawnlo, “Ziangmi si Pathian hnen ah na dil duh, rawl ei aw, keimah in Pathian hnenah ka lo sim sak ding” in rak ti. A thil theih thei daan cu, kan innsang ah, buainak pakhat khat a thleng ding caan ah a mit a tlawh, ka pa in sa a kah ding caan poh ah a mang ah a rak hmu cia. Kan unau zaten kan um daan ding khal a hmuh thluh cia theu. A thinlung ah, veikhat te khal kan hlo dahlo. Ka nu ka huat ṭheu nak sawn cu, keimah hnakin kan unau lakih misual deuh a duh sawn theu nak hi a si.

Leitlun Politics Ih A Tel Daan

Leitlun bawi upa pawl ka ton ding tinten “Ai puang in um aw, hni siamsi aw” tivek pawl thu in cah thluh. Kan unau 10 pawl le, ka pa karlak ah politic saang zet a rak tuah ṭheu. Ka pa hi MP a tuan ter, cule ka nu in thuron a pe ṭheu. Kan unau pawl umnak state tin ah, paisa kan tul daan in, in zem thiam. Politic a thiam zetnak pakhat cu “Ukte, himi hi na hrangah a hleice in, ka lo pe” tivekin keimah hnen lawng ah siloin kan unau zate hnen ah hleice vekin politics a rak tuah thiam. Cucu, kan upat hnu lawng ah kan kaai ngah lai. A politics thuthup hi kan san laiah cun arak sang nasa.

Unau kan buai caan ah thu in then sak ih lawyer khal a tuan ṭheu. Lawyer saang zet a sinan Supreme Court ngaingai hnakin, kan sungkua ah a lawyer nak a hmang. Ka pa hnen ah dilnak sang deuh ka tuah ding ahcun ka nu ka ruai ta theu. Midang pawl ih in duh thei daan ding politics, rualpipawl neh theinak ding politics pawl cu, tuisan cabu ṭha pawl an suah hlan ihsin ka nui’ hnen ah training ka rak kaai diam zo. Tuisan ih midang neh theinak cabu pawl le ka nu’ kan innsang ih a hmanmi politics ideology an bangaw ko.

Ka Nui’ Mentor Pathian

Fimnak neitu Pathian timi rak hmusuaktu ka nu in a mentor ah Pathian a hmang tikah, ka nui’ mithmai cu lungawinak le ruahsannak in a khat ringring. Kanmah san lai ih “gangster” rak tuan ngam, keimah vek tla thawnginn sangka ka thleng lo. Amah cun, nun in simnak ah in sim ṭheu mi cu “Nan unau za in, thingthuu ka lo zuuk ter lo” cutlukin nan parah ka mit ka leen in ti. In rak mentor ngahmi cu, “Nan unau pawl midang lakah, nan ruun aw ding” in rak ti.

Himi tla cu, tuini tiang rorelnak khalah ka hmang nasa. Mah hnaṭuanpi zuarthlai loin, bawm thiam sawn ding ti’n tuisan ah ka hmang cih. A thupibik, in mentor ngahmi cu, “Ukte, mi in a lo to, asile tap men aw” ka nui ṭong daan a si ih, “to” kha “thawi” tinak a si thotho. Cuvek caan ah lehruul hlah, ṭap men aw in ti. Tuisan ahcun non-violence zawngin ka hmang. Online ih midang siatnak ding cangan, mah miphunpi hmuahsuam le dem tivek tuah lo dingin ka nui hnen ihsin ka rak zir ngah.

Huaisen le Nu Ṭhaṭhum

Venghnen le unau neinung deuh pawl hnen ah, ka calung leinak ding paisa ka cawi ter. Paisa cawi dingin kan inn ihsin a pok suak lai, a dunglam ka hmuh ngah, ka mithlam ihsin ka hlo ter thei hrih lo. Paisa cawi ding cun ṭongkam direct in hman daan a silo ih, Pathian in a ṭong daan ding tla a rak bawm theh a si ding. Cumi, paisa a cawi ngah lo le, a parah ka rak thinheng. A va kir sal ih, cawi ding a va hawl sal tivek tla tuini tiang ka mang lai. Hivek thu pawl hi ka memory ihsin delete thluh ka duh nan, ziangah si maw, ka nu in delete theilo dingin a rak tuah theh a bang.

Veikhat cu ka nu in, midang paisa ka cawi tam tuk ih, mi in an kutzung, in khih zo in ti. Cumi lai ahcun ka nu ka bawm theilo, ka nauhak tikah ka nu lawng ka zoh ve men. Ka nu lo midang rinsan ding ka nei ve lo ih, ka pa le cu leilet tikah fang thar ding caan, kum 1 hngah a tul lai. Pathian le, van sang pi ah a um ti’n ka rak thei.

Ziangah kan khua ah paisa malte lawng a um tivek tla ka ruat, ziangah paisa cu milian pawl lawngin maw an nei ding tivek. Ka nu teh ziangah mivek in paisa hmancop ding hman a nei thei lo tivek ka ruat. Midang paisa cawi kha, thil harsa tuk ti’n cu ka thei nan, ka nu lawng in huaisennak a nei. Paisa a cawi ding a feh suak caan ahcun, ka nu ka zoh ngam lo, ka phatsan ih, a cawi ngah lo sinsin ahcun ka camriam tum ṭheu. A cawi ngah hman ah lungawi daan ka thiam lo, ka nu cun a rulh salnak dingah a thinhar thok ṭheu, kei in a thin har sinsinnak ding leibaa ka burh ti hman ka rak theithiam lo.

Ka Nu A Mithli Luang

Ṭahnak hnakih naa deuh sawn in, caan tampi ah harsatnak a tuarsuak ka thei. Ka nauhak lai ahcun ka nui’ hmuihmel ngaingai ka hmufiang dahlo. A hmai ah, lungawinak lawng a langter. A thinharnak pheentu dingah hmaikor a hruh ringring. Kan dung baihte ah, ka nu, a thaw cem zikte in sizung a thleng ih, ka thinlung ahcun a thi zo. Thi taktak khal sehla khavekin ka tap pei maw! Ka nu a thaw a cem zik timi ka naupa in i sim caan cu, ka nu a thi zo ti thawn danglamnak a nei lo. Curuangah, ka lungphang siloin, keimah hi ka cem vekin ka thei aw. Ka zupral thluh cih in ka thei, zoh thei sehla ka thin sungah thisen luang vek a um in ka thei.

Cutin, ka nu sizung ih a um lawng siloin, a nau nu Nu Thluai thawn sizung pakhat ah besia zetin a it tlang. Ni reilo te sungah ah ka nu ih nau cu a thi. Ka nu le a damlo zet lai, thaisun an phum ding asi thlang. A thih thu, ka nu kan sim asile ka nu cu lungturnat nei asi tikah, ka nu ziang a cang ding ti kan thei lo. Kan unau ram dang ih um zaten in, online ihsin ka nu hnem dingin kan zoh ṭheh. Ka pa cun, ka nui’ hnen ah a sim ih, ka nu a tuar lo in a ṭap, a mithli a luang lai ka hmu.

Khami ka nu a tap lai, a mithli a hnul lai kha, zianghman in ka thinlung ihsin an hlo ter thei dahlo ding. Hmuh theilo power a neitu ka nu, thiamnak zaten a neitu ka nu, ka rinsan tukmi ka nu a mitthli a tlak cu, ka zoh ngam lo. Natnak a tuar phah in, ka dam a ti theutu, a thisen luang phah khalin, kanmah sawn in tuamhlawm tu, ka nu hi ziangkim hi amah a si tuk hrat.