Pathian Meeting Ka Kaai Daan

Meeting timi cu ‘tongaw’ lole ‘hmuhaw’ tinak a si ko ih, kannih cu rorel pi khi, kan khihhmuh tlangpi. Pathian thawn meeting kaai ding bang sehla, na aukio tuk ngam ding ka zum lo. Ziangahtile, amai thu a siih, amah in a thei sawn. Asilole, meeting kaai ti zawng siloin, Pathian thawn rorel meeting siloin, tongaw ding bang sehla, ziangtivek in na thinlung le na um daan na tuah aw ding? Ka zumnak ahcun, na sosang ngam ding ka zum lo. Company hotu thawn meeting lole appointment kan neih ah ziangtin ha kan um kha, kan ti kioki si lo maw? Kan thinheng ngam dahlo. Kan thla-hlawh ding hman kan sut ngam cih dahlo. Tui’ kan hnatuannak hotu pawl tlun ih thuneitu Bawipa hna kan tunnak ah ziangvek in kan thinlung kan tuah timi ruah tlak zet a si. 

Kan pa le pawl in, meeting ah thinheng ding, agenda kan rel, kan bulpak thu kan rel lo an ti theu. Zo si, pacangtha thinheng ih thurel mi, meeting theh ah hngilh thei mai ding. Meeting ih kan lungsiatnak pawl kan hngilh lamlam lo. Cun, zo thawn tongkam kan el aw timi khal kan thei ringring mi a si. Curuangah Laimi pawl in kawhhran tin ah meeting kan kaai daan le Pathian hnatuan daan ding kan rel daan hi a palh deuh in ka thei. Kan meeting tikah kan kawhhran thu kan rel ding ti’n kan thinlung rii kan tuah theu. Kan kawhhran thu men rel ding kan silo, kan thu rel ding mi hi Pathian thu thawn a pehparaw mi a si. Kan porh deuh ding asile, Pathian hnatuan daan rel ding kan si. 

Pathian hnatuan khawm dan ding kan rel tikah, tohawk ciamco, tongkam sang zetzet ih tong a tul tuk ding ka zum lo. Pathian khalin a uar zawng a si ka zum lo. Meeting kai ih tong tam tuk le tongkam mawilo hmang pawl khi, an nun zoh sehla, Pathian pehzom ngahlo mi an tam zet ding ka zum. Ziangahtile, Pathian hnatuan cu, a tuan ih tuan hnakin a nunpi zawng ih langter a si ruangah uarawknak a silo. Kawhhran upa tampi cu, ro an rel men. Mipi hrang ro an rel ih anmah cu an to hiahhiah men. Rorel lawng tawk sehla, dungthluntu pawl khal ro an rel rero men ding. Pathian hnatuan cu, pumpekawknak a si. Rom cabu sungah tla cun, kan taksa hi raithawinak vekih pek ding ti’n kan hmu thei.

Kan Meeting ah ziang thu kan rel (kan agenda pawl), a zaten Bawipai’ thu, Bawipai’ agenda an si thluh. A si, a tuahtu cu minung kan si theu ko. Asinan, Bawipai’ agenda kan rel timi kan hngilh tinten kan aw, a sang theu. 

Ka vahvaihnak hmun kip ah Bawipa in kawhhran tlusia rero lakah I ret, kawhhran hrisel lo zetzet ah I um ter. Ka tap, ka thlarau cawmawknak ah, hi kawhhran a tha lo ti’n ka ruat theu. Asinan ka thinlung ah, “Bawpa in a tha mi tuah that a tul lo, a sia mi si, tuah that tul” tiin thu I sim sal theu. Meeting tinten, thubuai le tongkam hraang hi catbanglo in ka thei theu. Kawhhran upa le mino thu-elawknak khalah ka tel theu. Kanmai duhnak thu Bawipa duhnak a si lo timi fiangzet in ka hmu theu. 

Curuangah meeting tinten thla ka cam ih, Bawipa na agenda a si’h fiang le felten ka rel tul lawng ah I ding ter aw ka ti theu. Cutikah, ka rel hlan ah midang in an rak rel fel theu. Ka awka hraang zet suah lo ten meeting ka kaai theu. A caan caan le cu upa pawl hmai ah khur phah in thu ka rel theu, a caan le ka tuksum tuk hai ih ka tap theu. Asinan, Bawipa, A Thlarau in nun I zirh vivo ih, meeting kaai daan I zirh tir vivo. Pathian hrang meeting kan kaai tikah, kanmai hrang asilo, Bawipa hrang a si timi hngilh hram ding a silo.

-Uk Lian