Hnatuannak ih Uk Mi Zumtu Pawl

Khawitawk khalah hnatuan lo ih um a theih lo. Asinan, hnatuan daan tawk cin kan thiam lo ahcun, nunharnak thlen thei sawntu a si. Laimi tampi, hna kan tuan daan hi a buukton daan kan thiam nawnlo abang. Mirang ram ahcun hnatuan caan hi nazi 8 sung ti’n an tuah. Minung nikhat sungah a pumcawmnak ding hrangah nazi 8 sung a tuan ahcun a tawk tuk timi an thei. Hivek hnu ih tuan pawl cu OT an timi a luan ih tuan pawl an si. Mi tampi cu inn luahman, inn lei man, an bill hrang, an khua ih unau sungkhat pawl hrang, an mi cawmmi tivek in siarcawklo ruangah hna an tuam aam. 

Malaysia khalah Sunday suun rori khawm theilo ih hnatuan an tampi, kan thlennak hmun kip ah a si ko ding ka zum. Hihi, zumtu hrang ahcun tuksum ngaingai a si. Over time ih hnatuan rero pawl hi, lennak a si cuang lo. Hnatuan caan ah teimak zetih hnatuan ding cu, kan tuanvo a si. Pathian in zaan cu colhhahdamnak, ihthahnak caan liolio ah in pe; suun cu to men caan a silo, hnatuan vutvo caan a si. Himi Pathian in tuahsak mi caan hi that te ih kan hman thiam a tul. Hnatuan lo caan ih hnatuan hi lennak siloin, hamttamnak a si. Len lohli tum khal Pathian duhzawng a si lo riai. Tanlak caan, tuan lo theihlo caan cu a um tuk ko, asinan hnatuannak ih kan caan tamsawn kan liam ter ahcun kan taksa a naa thei, kan tha a cak nawn lo thei, kan thaw tiang a cem theimi a si.

Mithen cu hna an tuan tuk ruangah, hnatuan lo caan khalah an khawm duh nawnlo, an khawm hman ah Pathian thu ruat lo in, an cawlhhahdamnak ah biakinn an hmang, mithen leh cu an feelingnak hmun khalah an hmang ding ka zum. Hivek hi Pathian hmai ih sualnak phun khat a si. Khawmnak caan lawng siloin, kanmah bulpak Pathian biak caan nei ding tiangin caan tha kan tuah atul. Hnatuan phah khalin thlacam a theih ko. Asinan, Jesuh rori kan thlun mi pa hman, Synagogue ah a feh ringring. A pa hnatuan full time in a bawm ih a buai zet nan, a Pa, Pathian biak caan cu a tuah thei ringring. Jesush tla a buai zet nan, biakinn ah upapawl tla a tong ih Pathian thu a rel pi theu khaa. Pathian biaknak caan, Pathian mi pawl thawn, biakawk hi a si kan nunnak thlarau in a tul theu. 

Hnatuan tuk pawl cu biakinn sung an to khalah an ihhmu, thil dang an ruat. Pathian biaknak ih nuamnak hrimhrim an thei nawn lo. Kawhhran ih mi pe aw zet pawl tla cu, thlacamnak caan an neih thei nawnlo ruangah manhlap heelheel in an um ih, thlarau tuk vekih um le an duh si, an nunnak ah le zianghman a lang thei nawn fawn lo. Pathian thawn an nunnak a hlat awk tuk zo ruangah biakinn ah an hmel a sia. Pathian minung pawl hi harsat tuar ih hnatuan rero ding lawng khalin Pathian in in ko hlei lo. Pathian hnen ah Amah kan biak theinak dingah hnatuan tha dil cio uhsi. Zumtu pakhat, Bible siarlo, thlacamlo, biakinn thleng thei nawnlo cu, zumtu siloin, lam pialtu a si zo tinak a si. 

--Uk Lian