Ziangtin Kan Thlarau Nun Kan Cak Ter Sinsin Thei Ding
Jesuh Khrih dungthluntu kan sivekin, thlarau lam ih kan cak sinsin thei nak dingah a hnuai ih thil pathum hi kan ṭulzetmi a si.
PATHIAN THAWN NITIN CAAN HMAN
Pathian thawn biakawknak caan, Pathian thawn komawknak caan tuah aṭul. Thlacam le Bible siarnak thawn Pathian thusuhnak caan ti khalin kan ti thei. Nitin, Pathian thawn biakawknak caan kan neih lo asile, olte in kan thlarau a cau thei. (Ephesian 6:10) ah Pathian thawn pehzom aw uhla, nan thazang cak ter sinsin uh ti’n a um.
Kan kekar daan ding pawl Pathian kan suh thiam aṭul. Ziangkim ah Pathian kan ron thiam ringring aṭul. (Saam 25:4) sung ta vekin, lazmin dik in hmuh aw tiih nitin Pathian kan suh-ron thiam ringring aṭul. Jesuh tla nitin rori in, Pathian a bia ih thuronnak a nei ringring. (Luke 5:6), ram ṭhing ah a feh ih Bawipa a biak keelte’n a biak ringring tiin a um.
Pathian thawn lo cun zianghman kan tuah thei lo timi kan fiang ringring a ṭul. (Johan 15:7) khalah, ka hnen ih nan um ahcun ziangkim nan tuah thei ding tiin Jesuh in a sim. Pathian ih aw ngaingai fiangte ih kan theihthei nak ding ahcun daite in Pathian pawlkom nak caan kan pek thiam aṭul. Pathian biak-ron kan thiam asile, thlarau ih kekar daan kan thiam vivo thei ding a si.
ZARH TIN ZUMTU PAWL THAWN TONAWK KHAWM
Jesuh Khrih dung kan thlunpi mi, zumtu dang pawl thawn kan tonawk ringring a ṭha. (Hebrew 10:25) ah “Zumtupawl kan tonawk ṭheu hi peh sunzom vivo uhsi, cule thazang pekawk deuhdeuh uhsi” timi pawl tla kan hmu thei. Kan zumnak le kan ruahsannakpawl kan hlawmawk ih kan ruahawk khawm thei tlukih sunglawi a um pei maw!
Meisa vekin kan em-awk khawm thiam aṭul ti’n kan sim ṭheu mi cu a si. Dungthluntu cabu sungah hiti’n kan hmu lala thei. (Dungthluntu 5:42), dungthluntupawl cu nitin rori “Temple court” le “Inn khat hnu inn khat” ah an tongaw ringring ti’n a um. A umzia cu, “large group” le “small group” ti’n ṭhenaw in Pathian biak tlang khawmnak an nei ringring tinak a si.
Kawhhran tin ah hivek group tete thazang lak khawmnak ah tuah thei asi ahcun a ṭha zet. Large group timi, zumtu tampi tonkhawm nak ah zarhtin kan hmangaw zo ih kan theifiang zo asile small group timi ah kan tel aṭul.
Thusimtu sung ah hitin kan hmu lala (Thusimtu 9:9-10) “Pahnih cu pakhat hnakin a ṭhat sawn vekin, mi tampi le rualpi thawn nan tonawk khawm asile thiltitheinak thazang a tam, pakhat a tluk pang asikhalle pakhat in a tung ding thei ding” timi kan hmu thei.
SAWM IH PAKHAT HMAN TE PEK RINGRING
Acang thei asile zarh tin sawm ih pakhat pek thei aṭha. Pathian kan ton tikah kut lawngin tong loin thlawsuah tampi nitin in pek mi sung ihsin zarhtinkan pek thei ding mi cu a um ringring ko. Cumi kan pek thei ringring asile, pek ding mi dang in pe ringring ding tinak khal a si. Cucu, Pathian hi kan hrampibik ti kan langternak ah a si. Pathian pakhatnak ah kan ret ti langternak hrimhrim khalah sawm ih pakhat pek aṭha (Deu 14:23).
Cun, (Mathai 6:21) ah “Nan ro thil pawl umnak ah nan thinlung tla a um” ti a si. Pathian hnen ah kan neihmi kan khawl thiam ding a thupi tuk. Cule, kan ro thil, sumpai retnak ah kan thinlung tla a um ve ringring ding a si.
(Malachi 3:10) sung khalah “Ka inn ah nan sawm ih pakhat rak keng uh cule van ihsin nan cuam khat in thlawsuah ka lo pe ding” ti a um thotho. Curuangah sawm-ih-pakhat pek hi zumtupawl thlaraulam ih kan pitlinnak ding ih thupi tuk mi pakhat a si.
A netnak ah, a tlun ah thlarau ih kan pitlin theinak dingah thupi tuk pathum ka tarlang. Ṭhate in kan siar asile, a pathum lakah na tuah mal bikmi nangmah te na thei aw cih ding. Himi pathum fel le ṭha te ih na tuah thei vivo ahcun zumnak lam ah ziangtluk na cak ding timi cu, caan a cem leh ding ti kan fiang bangin Pathian thlarau ah na nun a cak sinsin ding ti’n ka zum ngam ve rori a si.
.jpeg)
Comments
Post a Comment