Melbourne ih Falam Kawhhran Pali Kom Khawmnak ah Ka Khawm Ngah Ve

Tuisun ah Melbourne, Australia ih Falam kawhhran pali pawl hmun khat te ah Pathian thangthat khawmnak kan nei. Kan hmaisabiknak tla a si ih kan hlim zet. Gospel feh le khawmpi zawh tivek ahcun zumtupawl Pathian lamih kan zuamzia langternak vekin kan fehpi theu nan tuisun ih kawhhran pali tongaw khawm cu cuveklam hawi kan si lo. Hmun khatih pungkhawm caak zet pungkhawm aw rori in ka hmu.

Australia ih Falam Kumthar Puai siarlo tuisun vekih Falam mipi pungkhawm ka hmu hrih lo ih lungawinak in ka khat. Hmun khat te ah Falam tlangtluan minung

khazat kan tongaw khawm hmuh hi cu thinlung khawruahnak a tam ter duh zet.

Khawm banah mino tete pawlin minung hizat hi hmun khat te ah khawm aw thei ringring sehla kan nuam daan ding an ti. Kan inn ah ka tlung salih ka nau le te pawlin minung khazat kha hmun khat te ah khawm aw thei ringring sehla tiah an rak ti ka thei lala. Keimah ten ka lungzuur, ka hnuk-ulh rori.

Asi, minung khazat 300-400 lenglo kha, hmun khat te ah kan khawm aw thei ringring ko. Zohman in hmun khat te ah Pathian be tlang hlah uh, titu kan nei hrimhrim lo asinan tuini tiang ahcun kawhhran pali ah mipi kan darh aw hrih cu a si. Ziangasikhalle, tuisun ihsin hmun khat te ah Pathian biak tlang khawm kan thok cu a si. Kan mino pawl hman in hmun khat ih khawmawk a thupit zia le a nuamzia an teh thiam ahcun kan upa hruaitu pawl cun a let tampin an a thupitzia an thei sawn lo ding maw!

Melbourne ih kan mino fimthiamnak zir, thuruahnak dikdawh nei pawl cun zumtupawl thekdarh ih kan um le kan khawtlang hnatuan cak ding zat kan cak theilonak pawl hi ziangruangah timi an sut thok rero tiin ka hmu. Mino lakah ka tlangleng tam tikah mino tete pawl cun ‘ziangruangah kawhhran kan kuai theu, ziangruangah kan lungruallo’ timi pawl in sut theu. ‘Manhlap hlah uh, nuam tete in kan thlengaw vivo ko’ tiin ka sang men theu.

Tui October thla ah Australia ih Falam tlangtluan mi zaten Melbourne ah Pathian biak khawmnak kan nei sal ding. Cumi theh ah Australia ih Chinmi kawhhran le fellowship zaten Pathian biak khawmnak kan nei leh sal ding. Ziangruangah a thekdarh thehzo mi kan khawm sal rero ti asile, Jesuh Khrih dungthluntu pawlih hnatuan asi men lawng siloin Pathian ih in phutmi duhdawtnak hnatuan tla a si(John 13:34-35). Komkhawm awk rero tul lo ding khalin tuihnu cun kan ralring vivo thei dingah ka zum.

Hmun khat te ih Pathian biaktlang khawm ka duh ngaingai, komkhawmawk khal ka duh tuk, asinan cuhnakih duhmi ka nei sin lai, cucu “Kawhhran kuai hnuaihni lo ding”, “Nulepa in mino lungput sia nei dingah thu sim lo ding” timi hi tuahlo dingah ka duh sawn mi a si. Kan uar tukmi, leiltun hruaitu thabik le thuanthu pumhlum ih hruaitu thabik Jesuh khalin, vanram nuam ih um khawm ding le Pathian thangthat khawm ding cu a vision ropibik a si.