Milian Fanu Kan Leng

Pipu thuanthu ihsi thokin milian fapa le milian fanu, mifarah fapa le mifarah fanu tihi a rak si tlangpi theu. Milian fanu, mifarah fa ih va dap timi hi thil cangthei a si ko nan thil harsa mangkheng pakhat cu a si. Ka rualpa cun manhlap helhelin bike thawn Tahan vaizinpi tluanah zualko ding bangin i phur. Thihnak kan dum in ka theiaw bik mai. Building tum zet pakhat hmaiah kan ding cutci. Ceilaw! Himi inn sungah ziang kan tuah ding, kei cu inn tha zet sungih luh hi nuam ka ti dah lem lo, show room ih luh sinsin tla cu ka nal pang ding ka phang. Ka rualpa hin himi innpi sungah hmeltheih a nei si ko ding ti’n ka ruat huahhi mai.


Milian inn rori a si. Inn menmen cu a si hrimhrim lo. Building mawi zet a si. Thaten’ ka zoh hliah tikah Show room le inpi pehaw a rak si betbet. Huiha! Kei cu ka duhlo tuk aw! Milian innpi sungih luh hnak cun thaihliak lakih sakhannam hman ka hrilsawn si maw! Savom hmai ih din hnak cun a thlangam thlak deuh tifang lawng a si. Ka rualpa hrimhrim ka mawhthluk lo thei lo. Ahlan denkhen in I rak sim lo mi cu! A hlankhan thaten i rak sim cia sehla cu mifarah fa ih neihsun thuamhnaw tla a hruk ve ding nan si! Thil dang asilo, millian fa le mifarah fa cu hi tiih zoh nakin kan tanawk tuk ruangah a si an kiang khalih ka um paihlo nak cu.

Ka va rak ruat tam man ve. Kan bike kan lock. Ka rualpa cun “Ra aw kan lut ding” in ti. Aiha, cang lo. “Silo lutaw inn lengin ka lo hngak ding” ka ti. I sawm mengmang nan a lengih rak din ka hrilsawn ruangah amahten a lut muarmo.  Romance acozah ih mi hremnak coliseum ih lut bangin ka seherh. Asinan ka thinlung khat lam lehthung cun ka rualpa hi milian hmeltheih a nei tam nasa ual ka ti lala. Kei cu inn lengah ruahpisur caan ih vate lungleng bangin ka dingih bike to fala le tlangval phuraw ka rak zoh rero.



Minit 10 hnuah ka rualpa cu Japan ral nehlo nupi ngai zet bangin, hni phah deuh vekin a ra suak.  A kut i zap ih “Ra lut ve aw” i ti thlang. Heih! In khaai that (suicide) sawn uh asilole nisa senheng lakah nazi 1 sung ka ding sawn pei tin ka rualpa ka dil tum nan milian fanu cu mifara fa hin kan biak theive ti thinlung kengin ka thinlung ralthuam thawn ka pok ve ta. Siangpahrangnu tawng ding maw ka si asilole mualphonak thawn cibaiaw dingin maw ka feh ti ka ruat phah nasa. Ka thaw ka la, ka hmai sen lo dingah ka cul phah. Ningzak langlonak dingah ka taksa na pipin ka kheuh thok.

Inn sung thuukpi ah kan lut ih cunah kan Lalnu, Bawinu, siangpahrangnu, miliian fanu ka timi nu cu mangkhawhnak ah a tel dahlo ih tlak khal a ruai dahlo ti fiang emem in cabuai ah a rak to ziarzi. Kan tin hnu ih ka rualpa ka suh salnak ahcun thurel ding titi an theih nawnlo ruangah in ra ko mi a si. Siangpahrangnu hmai ka thleng kan ti mai ding aw? “Hinah to aw” a tongkam hmaisabik. Nauhak tlawngtlan saya hmai thleng bangin ka to ve. Embassy interview kan thok thlang ding a bang. Ka taireh ka sawm so. Mipa na si kha tin ka thinlung pawl an au. Himi caan ah thil tampi ka ruat man nan cumipawl ka ngan le a point ah ka lut sal thei lo pang ding.

Kawlram ih um pawl theu theu. Tisa kan in phah. Ka in paih lo em nan in thlet ve. Inn leng tiah minung ngai zoh in, in rak zoh ve. Ka zin le a suak leuhleuh theu fawn. An zininn le ka thei fawn lo ding. Zininn suh ka huam fawn lo…ka huamlo ti hnakin ka ningzak ka ti sawn pei cu? Ka home work a tam sinsin ko. Aveihnihnak a tongkam cu “Ziangah, inn lengah na rak ding ringring…(hni  phahten’) na rualpa in a lo ding ter maw” in ti. Lungzur vekin ka um. Asinan ka nu a si fawnlo. Fala pawlih bum cia ringring ka si ko. Cutin, a duhdawtnak hripi cun ka ke zaphak ah i khih. Thil dang aicun an neihnak pawl kha ka ngaisang veksi ka tih vek si a sim daan ding tla ka thiamlo. A hrimhrim in milian fanupawl cu cuangce in ka rak zoh theu. Himi nute hi an neinung fawnih tlangval thawn an rak lengthlang theu pei maw?? ka thinlung…na lut thuuk tuk deuh lo maw…?

Ka ti pang tuk! (Sorry) ka rualpa hrangah kan leng mi a si ti ka mang sal. Ka hngilh rori ka rual i ngai thiam aw.  Ka rualpa ih mit le falanu ih mit ka zoh.  An nelaw lo nasa. Minit 15 sung an titi ka ngai tik ahcun ka rualpa khalin a rak leng ngam dahlo ih a veihnih lennak fang a si ti ka thei. ‘ka lo hmuh zo ding na bang’ timi thupi hmangin an titi, asinan an zahaw veve ih thupi dang an thleng theilo a bang ka ti. Fala nu cun a mit sirten’ i zoh phaphah. ‘Taktakte cun i ngaithiamaw keimah hrangah kan lo lenglo ka rualpa hrangah kan lo leng’ ti sim ka duh nan a caan a kim hrih fawnlo… Arkhuan veithum ka hngak lai. Asinan, phehloten’ milian fanu cu ka ngaisang ve, an liannak lawng siloin a hmel khal ka duh ko; culawngsiloin mifarah fa cun milian fanu cu kan ngaisang hrimhrim so khaw!

Ka fala uar hmaisabik tlangval dang a neih ka phan tuk lai caan ahkhan a rualnu cun ‘fala timi cu vate bang tukin kan zuang rero ih in lengtu tlangval pawl hnenah reilote kan riak. Asinan riahbuk a nuam lo tikah kan cer sal theu…riahnak hmun hnget kan neilo so khaw in ti…curuangah himi na fala uarmi tla ka rualnu a siih riahbuk taktak tawng loin a vakvai in ka thei…Keimah khalin ka lo sim bawm ding. Curuangah na duhdawtnak sim awla a tha ding’ tiah tha i rak pe dah mi pawl ka mang sal bet.

A maklo tuk ti, ka santhuanthu ah himi milian fanu ka len hi ka ngan khum ding a si cu…ka dairy ih ka ngan khum daan ding cu “Himi zan ah milian fanu ka leng”….Biazai deuh in, “An riahrun innsang ka lawn”…Unau Mizo tong asilo, ka pilepu tong rori tin ka ruat. Kan lenmi fala hi “Parte” tilawngin a hmin ka thei….Sawkhlei par, Cherry par le rose par bangin himi caan ah a par ve. A hmin a keng ngah riai. Ka hrang ahcun nitin par a si. Asinan, kei cun a par ka khiak lo ding. Mifarah fa in milian fanu a leng timi ka ngan khum hi a tawk pam ko…fala mawi kiangih to hi zingpit thlifim hip hnakin a nuam deuh maw…?

Ka ruatsal ih Parte kha ka veikhat hmuhnak a si. Veikhat hman i hmu sal nawnlo ding. Kei cu tipi ral kaan in ka liam zo. Asinan, an inn ah veikhat te ka lut ngah ve. A zun ah ka uar man ka ti lo, ka duhdawt cih khal ka ti lo, ka hngilh thei nawnlo ding khal ka ti fawnlo asinan ka santhuanthu ngan khumnak ah thupibik dinhmun a luah ding cu a si. Zangfahten’ Parte in rak simsak hram uh, ka hrangah awnmawi pakhat a si. Hlapi ka feh hmanah khami lai caan te kha cumi lai caan vek rori in ka hmu theu….Ngaingai, ka point ah ka lut sal tum ding. Ka duhham tuk…ka pakai tuk.

Inn ihsin ka ralring fawnlo. Rak ralring sehla ka thufim by-heart mi le quotation theihsunmi pawl tla kha tehkhinak vekin ka sim dingih fim takah in ruat ding. Tutiang cu kaa cip in ka to asinan ha lang emem lo cun veihnih ka rak hni ve. Cule, ka lu veithum ka sut ih a mit mu veili ka rak zoh man ih ‘hinu hi ziangvek fala a si ding?” timi thupi tarin veihra ka rak ruat man pan lo maw!. Kan cabuai kuulmi parah daatbuu, khuat pathum le Vankau Arsi Vol (13) nak, 3rd December 2010 suak a um.  Ka tong a tul ve thleng ding a bang. An titi a cat phahphah thlang. Dapaw (lengaw) an si ruangah an peh rero bangin ka thei. Thinlung ih um lo rel cu a thaw thei lo ngai….Cun mai phurzawnglo hnatuan tla a har ka ti…Fala biakdaan khalah kalbak a um ve pan teh maw…

Vansiat le malmak ah ka rualpa cun, “ka rualpa hi capoh duh ngaingai mi a si” tiah hmeltheihnak in tuah a tlai nuangno zet nan ka lungawi thotho. Milian fanu biak hmaisabik daan ding teh a um hranpa maw…an lian hlanah “harsa” timi tongfang cu a thei dah ding ka zum. Cun, apahnihnak ah minung capoh duh lo ngaingai kan um lo ih ruangah capoh in ka tong ka thok ding tiah khawruahnak ka nei. Asinan milian fanu capoh ding cu a hua pang pei maw ka ti lala thul. Ziangasikhalle a theithiam ko ding.

Ka tong hlan te ah “Vankau Arsi Magazine” cubu ka kau lawk ta. Ka tong in bawmtu dingah Laizuun ih nganmi “Ka Hngilh Lo” timi biazai mawi tak ka hmu. Um, hihi ka sim ding. Ka duhduh rel ve cu a mawi lo ding. Thu ka sut ve ding. “Zangfahten’ himi Vankau Arsi Magazine hi ziangtin nan ngah thei?” tin ka sut. “Aw, Rev. Sen Ro Sang hnen ihsin” a ti. Vankau Arsi Magazine kawm ih vur zuk kha Mirang tong thiam zet bangin “Ice bake” ka ti. A diklo ice menmen a siih bake ti a tullo nan.

Ka rualpa in a mit sirten’ tu nang thu rel ve aw in ti. Duhdawtnak thu ka siar zomi pawl, Biazai, thufim, capoh, mifim pawl tongkam, theihkauhnak, mihminthangpawl, hlasakthiam Icon pawl, sumdawng milianpawl, tulai CPP thuhla pawl rel sehla a tha pei maw? Eee! Fala pawl cun politics hnakin super star, celebrity pawl thu an thei duh sawn ti ka thei sal. Silo, show room tla an nei fawn ih angki thu le, kedam mankhung le quality tha pawl relpi sehla a tha sawn ding.

Kan thurelmi pawl ngan theh a theihlo ding. Ka porh tuk ah tla kan ruat pang thei ruangah nazi pakhat sung kan len sung ahhin leitlun ramnuambik in fanpi ih ka diriam zet. A hmai ka zoh, a tonak sofa ka zoh, a sam ka zoh a tawk tuk ka ruahnak cun I hruai ih duhdawtnak duum ah kan feh. Kan biakawk lai ah a phone a ra. Phone a biak lai a dung lam ka zoh. A ruangruai cu a tawk. Sim mawilo tla ka sim pang ding. A rem theh tilawng hin a tawk ko.

Kharistmas rawl zawh kan tlai pang ding ruangah tlun a tul. Kan suah zawngah a nulepa zuk phar ih an tarmi in hmuh. Na nulepa hi na rak zawnlo ti men lo in, na nulepa an mawi in, an rak tuak tuk, zawn awla cu hihnak in na mawi sin ding nan ka ti. Milian fanu kan lengnak ihsin kan tlung.

Comments

  1. Aikaraisai!
    Hivek ca!
    Ziangtin saw na ngan thiam?
    Ruahnak hmuah2 hmunkhatah a thlik tiangin a hîp fai thluh thei si2.
    Cuihlei ah a ca hin hram a ngah ih, kan Laitong original pawl tla a dapsuak thluh rual2in a tongkam dang pawl tla a tulai ih hlei ah, cangantu ih target khal a ropi zetih siar a manhla rori.

    Pakhat te lawngin,
    "Zininn" ti loin,
    "Zuninn" ti hmang sehla kei cun ka duh deuh!

    Na cangan a thra ta rori e.

    ReplyDelete

Post a Comment

Popular posts from this blog

Ziangtin Kan Thlarau Nun Kan Cak Ter Sinsin Thei Ding

Nitin Pathian Thawn Lamleng Tlang Nun

“In duhdawt Ngaingai Maw”?

Midum le Mirang Lamlengtlang

Ka Pa Cu

Love Locks

Lai Mino Lam A Pial Tum Ka Hmu, Lungphang Le Riahsia In Ka Khat