Duat Hrangah Kei Cu A Tuartu Ka Si Ee!

“Cuti zatzat a kim man lo, na theisual a si kha, mizan zan leh ah tla kan biakawk ko ual, na mang nawnlo maw? Aw si! na mawhlo tarlam hi cun thil an hngilh theu” in ti ahkhan ka thinlungten ka mawhthluk aw, ‘ka lo ngaituk’ tin rak lo tisawn sehla a tha sawn ding nan ka lo ngai tuk tin kan biakawk tinten ka lo sim theu fawn, na ningtuk ding ti phang ah “in phone lo nak zarhkhat a kim zo” ka rak lo ti pang. Asinan lobiak lo ih zarhkhat um ding cu sim hlah aw, nikhat te hman rei tuk in ka thei. Kan umnak ram a bangawk lo ruangah vei tampi cu sun le zan ti khal theilo in “Na tho tha maw?” asilole “Mangtha tha maw” cun “Tui sun ziang na tuah ding?” kan ti awk pang theu kha!

Ka vansia, ka van tha lo, ka dawt um lo, ka sung thei tuk. A zangfah um tuk an timi pate ka si ko. “Ka duhmi in, in duhlo ih ka duhlomi sawn in, in duh” timi kimtertu pakhat ka si. Ka duhlo tuk nan ka parah a tla. Leitlun ih tuar harbikmi ziang a si, lei tlun ih na ninghan bik caan in sim aw tin in ti awla cem theilo mi ningnaatnak le ninghannak pawl ka lo sim ding. “U kei cu, maw! midang ka nei zo si, kei cu duhdawtmi dang ka nei zo si, kan rak theiawk tlai deuh si ti, asinan nang cu na fel ih duhtu tampi na tawng ding, keimah hnak ih fel tampi an um si. Pathian in fala felte a lo pe ding si, kei cu ngaihzawng dang ka nei zo si tiih a mawi zawng ih hnawlnak awkam pawl khal awka nem a si lo. 

Minung hi vansia ding hrimhrim kan um ko. Hlawhsam ding hrimhrim. Mi ih zangfah rero mi, a sungtu, a tuartu; thin nat tuar ringring. Thinharnak ka hril mi cu a si hrim hrim lo. Mi’h zangfah rero ding khal ka duhmi a si cuanglo. Mi vantha sikhal ka duh. A cotu si ka duh. Duhdawtnak khal ka theithiam ve ko. Dum sung ih rose par mawite ka khiak duh ve. Duhdawttu ih awnem theih ih a nuamzia khal ka thei ve ko. Kawpkim te ih lam a leng tlang mi fala le tlangval pawl ih neitmi thinlung neitu ka si ve…duhdawtnak awkam khal ka theithiam ve ko…..duhdawtnak mitmeng khal ka palh dahlo…duhdawtnak kutnem khal ka kai duh ve tuk…duhdawtnak hi ka thei ve ko asinan ziangah ningnaa/duhmi colo mithli thawn ka kir sal theu. A pawi lo pi ti ih kir ringring tu ih mithli a tam tuk zo.

 A nuam mi thil theicing tawngve lo cu ziangtluk mi vansia kan si. Duhdawttu awkam thei duh cing te ih theilotu khal mi vansia thotho kan si. Thinharnak timi cu thinhar pawl hnen ih thleng ding a sinan si!

“Kan kiangih a tomi tei pahnih ih um daan cu dawt an va um ve. An hmel le tha si. An kaihawk tuk ee! A tlangvalpa in a fala nu ih sam a phial sak…a pawm, khih zoh aw! an hnam aw maw si” tin ka rualpa in ka hna ri ah hni phah in I hmuh rero, I hmuh hlan ah ka hmu zo, I sim hlan ah ka thei zo. Curuangah asi, duhdawtnak hi ka thei ve ka tinak! Duhdawtnak hi theilo bangin ka um san ding ka ti hman ah ka thei thotho. Asinan duhdawtnak in I hril lo.

Google talk/Chating ih kan theihawk ruangah thildang pin ruat hlah aw ka lo ti theu. Leitlun ih a fehpimi a thangsomi “Chating” nak ah kan tawngaw ih cumi cu thin thi lo in na um theu. Kei cun duhdawtnak diktak in ka lo duh ka lo ti ringring. Vei ziangzat ka lo duh ka lo ti zo! Ziangah tuini tiang I zum theilo. Ziangtin ka lo sim le na zum ding? A tapmi mithli hi na zangfah lo maw…a kuaimi thinlung. A simthiamlomi a lungthin sung ih a lo sehhernak pawl theihsak aw.