Pathian le Minung Ṭong Cuhawknak

Pathian in a ṭongkam hmang in, lei le van a siamsuah. A kut thawn a siammi minung cu ṭongkam rorin a bia. Adam parih a tumtah a fehsual hnu khalah minung hnen ih a ṭong le a phuansuahawknak cu a cawl dahlo. Abraham hnenah, miphun kip thlawsuah a pek tum thu a ṭongkam suak in a sim sal. Mikip luatter a duh ruangah Pathian in Noah hnen ah, ṭongsuak in long tuk a fial.

Cutin, sersiam thok ihsin Pathian cu cawl lo in, tui san tiang a ṭong peh. A awkamsuak rorin, Moses le Paul hnen khalah a phuangawsuak. Zaan mang khalah Pathian cu ṭong in mi a bia, thuro vek khalin lang tahrat in a ṭong, meisa sung khalin a ṭongsuak ih laak kaa hmang khalin a ṭongsuak. Ṭong Pathian!  

Hlaan ihsin tui saan tiang ah Pathian cu, a phunphun in a phuangawsuak timi (Rom 1:1-2) ah ngan khum in a um. Van, boruak le sersiammi hmang khalin a phuangawsuak thu (Saam 19:1) sungah kan hmu thei. Pathian Amah hi, “Thu” a si. Amah hi “Ṭong” le “Thu” kom Pathian a si. Ṭong Pathian a si ruangah, ṭong le, mi thusim a duh. Pathian in thurel ding tampi a nei ih, a ṭong mi pawl cu sullam nei lawng te an si.

Pathian in veikhat a ṭongsuak hnuhnu cu thil ṭha asilole, nun simnak si maw tuah ta lo in a hnenah a kir tersal dahlo tiah kamsang (Isaiah 55:11) in a sim. Pathian ṭong a ngaitupawl hnenah thlawsuah a thlen thu Abraham ihsin kan hmu thei.

Pathian maw minung saw ṭong duh deuh ding?

Ka hmuhtonmi pakhat te ka lo ruah ta ding. Sizung ih lengte ih nor cawp rero mi putar in, reception kiang ih lamzin fehnak kharh thluh ko in, a vanglai thu cu, a nor rero tu sibawinu hnen ah a ruah rero lai ka hmu. A nortu cun, a thusim ṭhaten a ngai sak zia langternak ah, a tong thawt daan ih zirin arak hni rero.  

Hmakhat te ah, ka thinlung sungah ruahnak a thleng, himi putar ih ṭong a duh bangin, Pathian in ṭong a duh ve timi ka ruatsuak lohli. Minung pawl hin, Pathian ih ṭong hi putar ṭong vek hman in kan ngai paih lo ding timi khal ka ruat cih. Pathian hi, umhar lungleng in vei ziat kan ret ding? “Ka mi pawl cun in tlansan ih duhdawttu dang an hawl” ti’n a ninghannak awkhawk a thang rero lai ko.    

Vang lai thu rel nuam kan ti ṭheu. Ṭhimnak ah, Hramlak vah lai thu, cun lehnak a phunphun ih kan rak tel vanglai thu pawl. Pathian khalin, a vanglai thu men siloin, a thuthup le kan hmailam hrang thlawsuahnak ding thu pawl ruah in duh zet. Asinan, minung malte lawngin a ṭong kan ngai.  

Minung cun kan diriamnak dingah kan vanglai thu pawl kan rel ṭheu. Asinan, Pathian cun amah diriamnak dingah thurel ṭulmi a nei ve lo. Kanmah hmailam hrang ṭhatnak ding le thlawsuah kan don vivo nak ding thu pawl sawn in ruah duh mi a si.

In bawmtu thlarau khal kan thinlung ah a ṭong ṭheu. Cui’h thlarau cun, Pathian ṭongkam pawl in fiang ter. Pathian aw theih ding cun, Pathian ih ṭongkam ngan khumnak Bible kan siar rero arak ṭul. Pathian ṭong cu a nung, a cakvak, thiltitheinak in a khat, a hriam zetmi vek a si, thlarau le nunnak pehawknak karlak tiang sun tlang thei Pathian ṭongkam a si.

Awnmawi tampi le thuthangṭha tampi theih le ngai dingin kan leitlun a khat. Pathian ih ṭong le a awsuak hnakih awmawi dang le nun cawm thei “AW KAM NUNG LE MAWI” san deng tiangin a um thei nawn lo ding.