Thuthangtha Dang A Um Lo | Uk Lian

Minung ih a theihzomi thuthangṭha hmuahhmuah lakih ropi le nasabik thuthangṭha cu Jesuh Khrih in, kumkhua thihnak ihsin kumkhua nunnakah in runsuak zo timi thuthangṭha hi asi. Pathian ih in zangfahnak rori ruangah Jesuh Khrih cu kumkhua kan nun theinak dingah kan aiawh ah a thi. Kan tuahveknak le, kan tawlrelbomnak tel riai loin a zangfahnak liolio ruangah rundammi kan si timi hi, thuthangṭha ngaingai cu asi (Eph. 2:8-9).

 

Pathian ih in rundamnak hi lei pian hlan ihsin, Pathian ih arak timtuahciami asi. In rundamnak hi a pekih in pekmi runsuahnak laksawng sunglawibik asi. Curuangah Paul in, Galatipawl ca a kuat tikah “Thuthangṭha Dang A Um Lo” tiah a sim hai. Kan hrangah zangfahnak thuthangṭha siarlo thuthangṭha dang a um thei ding maw si! (Gala.1:6-10). Zovek khalin, vancungmi khalin thuthangṭha dang an phuang pang asile camsiat an si ding timi (Gala. 1:8) ah kan hmu thei asi. 

 

Nitin, Pathian kan zumnak ihsin tlansuak ih pial-hlo dingah a phunphun in Setan pa cun in zawl ringring. Paul in Galatipawl ca a kuatnak san khal, rundamnak thuthangṭha zum dingah Judah daan nan thlun a tul tivekin Pathian thuthangṭha dang an phuan ruangih a kuatmi asi. Cuvekin, Pathian thuthangṭha hnakih thupisawn ih ruah dingmi thil, leitlun ah nitin hmuh ding a um. Asinan, Pathian zangfahnak thuthangṭha hnongin thuthangṭha dang; minung ih Pathian biak tlon lungawi tumnak le Pathian zangfahnak thuthangṭha hnakih uarmi dang kan neih ahcun camsiat kan si ve ding asi.

 

Kannih zumtu hrang ahcun kan thuthangṭhat cu misual rori Jesuh thihnak ruangah midingfel kan sinak hi asi (2 Cor. 5:21). Pathian hmaiah mithi asi zo hnu, in nung tersal hi Pathian ih zangfahnak sangbik asi (Rom 5:23). Pathian in, in rundamsalnak hi Jesuh Khrih hmangin thinglamtah parah “Ka ṭheh zo” tiin in tuahfelsak zomi asi (John 19:28-30). Kannih Pathian nung zumtupawl cu Pathian ih tuahzomi zumtupawl kan si vekin, a tuah lai dingmi zumtu le rinsantu khal kan si. 

 

Jesuh Khrih rundamnak thuthangṭha zum cu kumkhua nunnak asi (John 3:16). Jesuh zum hi kan vankai theinak tawhfung cu asi (Acts 16:31). Pathian ih in rundamnak hi, zum duh loin dung kan tolhsal le kan kirsal asile, Pathian ih laksawng Jesuh pom duhlotu kan si tinak asi. Jesuh zumnak ihsin kan kirsal pang asile, Pathian ih a tuahzomi zumlotu ah kan cang tinak khal asi.

 

Hi leitlun ah khualtlawng ih um kan si. Kan khualtlawnnak ahcun kan caam rei lo ding. Zumtu khualtlawng kan sinak san cu, kan kumkhua inn pan ih feh rero kan si ruangah asi. Kan van-inn lam pan ih feh kan sivekin, kan Bawipa Jesuh Khrih arat salnak ding thu in hnemaw ding kan siih, kan ruahsanbik dinngmi khal ni netabik ni asi. Kan riahsiat le thinhar caan khalah Pathian ih in rundamnak thuthangṭtha hi kan ruah camcin dingmi asi.  

 

 

Kan pabik Abraham cun Pathian thu hi a rinsan ih a zum khal a zum ngam. Cui’h, a zumnak ruangah Pathian in midingfel ah a cohlang asi (Gen. 15:6). Kan zummi rundamnak thuthangṭha hi, zangfahnak thuthangṭha asi. Kannih cu, zangfahmi, ngaidammi kan si. Ngaidamnak cu Jesuh ruangah kan ngah. Pathian hrangih kan tuahnak ruangah le, kan pumpekawknak ruangah siloin, Jesuh Khrih in tlennak thuthangṭha kan zumnak ruangah van kai dingmi kan si. 

 

Kan lungawinak ding bik cu, Pathian ih in tlennak thuthangṭha kan cohlan ruangah kan hmin cu nunnak cabu sungah ngan asi. Himi ruangah lungawi camcin ding kan si (Luk 10:20). Ngaidamnak thuthuthangṭha ruangah, kannih cu Pathian fa kan siih, kan pabik cu in rundamtu Pathian kan Bawipa Jesuh asi.

Zumnak Nung (Living Faith) - Uk Lian

“Ka zumnak a caklo”, “ka zumnak a mal” kan ti ṭheu nan, asile Pathian a um lo ti’n ruat hnik aw ti aw sehla, kan ngam cuanglo lala. Pathian kan rinsan ih kan zumzia cu, Pathian a um lo ti’n kan ruah ngamlonak in a fiang. Ziangahtile, Pathian a umdaanzia cu hliah ṭul loin, kan nunnak ah Pathian ih in kaihhruai daanzia tontehnak a phunphun kan nei zo.

 

Cathianghlim sungih zumnak kan timi (faith) cu, zum (believe) menmen vek siloin, rinsannak le pumpeknak a telmi (faith) zumnak asi. Cumicu, Jesuh Khrih thuthangṭha kan theihnak ihsin arami thu, kan theihfengmi Jesuh ih thu asi (Rom 10:17). 

 

Inn tum pipipawl hi, zo-in a sak timi kan thei lo nan, asaktu cu a um timi kan theih vekin, Pathian cu mit rorin minung kan hmuh vekin kan hmu theilo nan, a tuahmi ruangah Pathian a um; Pathian cu rinsantlak asi timi fiangte’n kan thei. Curuangah Amah hnenah zum hngetnak le ruahsannak khal kan nei; hmuhlomi Pathian nung zum ih rinsantu khal kan si (Heb 11:1). 

 

Khawsiapawl khalin, Pathian a um timi cu an zum asinan Jesuh Khrih hrangah pumpeknak le rinsannak an nei lo (James 2:19). Asinan, kannih Pathian nung zumtupawl cun, kan hmuhlomi Pathian nung kan zum ruangah zumnak in kan feh (2Cor 5:7). Ziangatile, zumnak thawn lo cun Pathian lungawiter a theih lo (Heb 11:6). Curuangah, Khrih ih a tlenciamipawl cu midingfel kan si vekin, Pathian rinsanak, zumnak le a hrang pumpeknak thawn a nungmi kan si (Rom 1:17). 

 

OT ah Pathian zum hnget tampi lakih langsarzual tla cu; Abraham mai’h sungsuak fapa rori Pathian a zum sawn tuk ruangih Pathian hnenih pe ngam. Noah at-hlawh ih Pathian zum ngam, Daniel thih ngam ih Pathian rinsan, Moses zumnak thawn tipi sen tansuak ngamtu, David a raal hnakih Pathian zumnak tuumsawn ih hmutu, Esther thihtheinak lakih Pathian tlaihsantu, Elijah zumnak thawn Baal prophet 450 do ngamtupawl ih an zumnak hi a va nasa ve! 

 

NT khalah Jesuh hnenih zumnak nung nei tampi kan hmu. An zumnak kham ih kham theih lo an si. Mitcaw pahnih in Jesuh an ko, an kham nan, Jesuh in in tidam thei ti an theih ruangah kham an theihlo, an ko ciamco ih Jesuh in an mit a vaan ter ngaingai (Matt 9:27-30). Zumnak hi a va sunglawi ve! Mitcaw Bartima khal cuvek thotho in Jesuh a ko, Jesuh in a mit a vaangter ngaingai (Mark 10:47). Kum 12 sung thipuut nu khal, Jesuh ih puan zikte a dai asile a dam dingah zumnak a nei ih a dai hnu ah a dam rori ngai (Matt. 9:20-22). 

 

Zumnak hi, kan taksa kan thu-nun vekih thu-nun ding asi. Pathian kan zum tam asile, kan parah Pathian thiltitheinak a lang tam ding tinak asi. Curuangah kan zumnak, Jesuh Khrih thu pawl, Pathian ih duhnakpawl tamsin thei ih thluntu kan si ding hi Pathian ih in duhsakmi asi. Kannih, Pathian ih midengfel tiih kawhmi pawl hi, kan nitin nunnak ah Pathian nung zum hngetnak thawn dingfel ten nung ding kan si. 

 

Lungretheih Buainak (Stress) Tlun Ah Bawipa Thawn

Pathian nung kan zum ruangah kan (stress) donharnak le lungretheinak a hlo verver lo nan, tuar thiam daan kan thiam sawn. Leitlun ih kan damsung ahcun buainak le lungretheihnakpawl kan tong hrimhrim dingmi asi (John 16:33). Pathian in Amah kan zumnak cu, ziangtlukin a hnget timi theihnak ding khalah in hliahnak ah tuarnak hi in siang (1 Peter 1:6-7). Rah bawr ṭha le rah-ṭha kan rah theinak ding ahcun tuartheinak, Pathian zum hngetih Pathian thawn pehzomawknak nun kan ṭul.   

 

Harsat tuar theilo, donharnak le lungretheihnak ih dungtolh le beidong men kan si ahcun lamzin kap ih a tlami thlaici, lungphek parih a tlami thlaici, hlingbuur lakih a tlami thlaici bangin rah ṭha kan rah thei dahlo ding. Pathian in kan tlin lo tiangtiangin harsatnak in pe dahlo timi khal kan thei (1Cor. 10:13). Zumtu hrangah hardamnak hi, Thlarau-lam pitlinnak ding hrang khalah a thupi. Dungthluntu John cun a cakuat pathumnak ah nan harhdamnak le ziangkim ah nan lam a a tluan theinak dingah thlacamnak ah ka lo bawm tiin (3 John 1:2) sungah ziangkim ah damcak a thupitnak a tarlang. 

 

Kan zohthim dingah Bible sungah a phunphun in harsatnak a tuartu, lungretheihnak a tuartu le nautatnak a phunphun tuartu kan hmu thei. Jesuh kha, kan hrangah a phurrit phurhmi kha arak nasa tuk asi, a thlanhri formi hman thisen tiang a suak. Thuthangṭha a phuanmi mipi in an theithiam lo men siloin Amah ih a hril hleicemi a dungthlungtupawl hman in an theithiam lo. Paul khal, vuak-thawi a tuar, a taksa ah damlonak thawn le ninghang lungrethei in kum tampi caan a hmang ve. Job khal hi harsat tuar zet asi. Stress zawngin tah ding sisehla a stress level a sang zet ding, a taksa hma in khat, a neihmi pawl an cem theh ih, a fahniangpawlin an thihsan. Asinan, Pathian a rinsan thotho.  

 

Tui kan dinhmun hnakih dinhmun sia Bible sungah tampi kan hmu thei. Asinan an tuarnak tlunah Pathian ah an hram an bun ih Pathian thawn pehzomnaknak ṭha an neih ruangah Pathian ih cahnak thawn an harsatnakpawl tuarsuak theiin, hmailam ah an feh vivo thei asi. A nasa sawnmi, a ropi sawnmi le ruah dingmi thupibik Pathian ih ṭhatnakpawl an ruah thiamnak ruangah lungretheihnakpawl an tuarsuak vivo thei ti khalin kan ti thei (Phi 4:8). 

 

David ih nunnak khal kan zoh asile, stress tiih siar dingmi tampi kan hmu thei. A fapa in that dingin a hual ih, Saul khalin that dingin a duum. Esther khal a miphunpipawl cimit ding thu a theih tikah stress ih lak theih asi. Asinan, Pathian kutih tlukluh sawnnak a hril. 

 

Thinharnak le donharnak lam hnakin ziangtin Bawipa rinsannak thawn in kan buainak kan neh thei ding timi ruat sawn ding kan si. Daniel cun, Pathian thiltitheinak hi a thei tuk. A thinharnak le a donharnakpawl cu ni khat vei 3 thlacamnak thawn Pathian hnenah a hlan. Pathian thawn an pehzomawk tikah, Pathian thawn an ṭangtlang. Pathian thawn a tangtlangmi minung cu thinharnak vek men ih neh theih an si nawnlo. Cutin, kiosa lak hmanah venhimnak a hmu. Joseph khalin, a tuarnak hi stress lam zawngin la ding sehla tawkfangnawn cu a nei ding ve nan, Pathian a rinsannak ruangah a tuahmi kipah Pathian in a thlawhsuah ih thinharnak le lungretheih tuarnak tlunah hruaitu ropi dinhmun tiangah Pathian in a khaisang. 

 

Kan stress (donharnak le lungretheihnakpawl) kan Bawipa Jesuh in in phurh bawm thei. Anihcun zaangkhai ten in phurh sak ding. Asinan, kanmah in kan phurh le kan tuar pang asile kan hrang a rit tuk thei. Curangah Bawipai hnenah kan donharnakpawl thlen sawn uhsi. Colhnak hmun nuam, tiva kamah Bawipa thawn colh tlang thiam uhsi. Bawipa hnen ih colh cu lungdaihnak asiih kan nunnak cu donharnak hnakin lungawi thusimnak ah a cangsawn ding asi (Phi 4:6-7). 

 

Thlacam A Thupitdaazia – Uk Lian

Date: 03 November 2024 | Sunday Night (ECCM(Y) Church Service)

 

Jesuh in thlacam a thupitzia vei tampi a sim ih hleiah, zohthimtlak ding rorin Amah khal zaanvar thla a cam. Rawl loin, ni 40 le zaan 40 tiang thlacamnak in caan a hmang. A dungthluntupawl thlacam daan ding a zirh khalin a zirh ih thlacam ih umtudaan ding tiang khalin a sim bet (Matt 6:5-15). 

 

Jesuh ih a thlacam daan hi cawntlak ngaingai asi. Amahten fianrial ah a cam, midang thawn a cam ih thuthluknak thupi a tuah hlan khalah thlacamnak a nei ta (Lk 6:12-13). Cun, thla a cam tinten a mawi zet theumi cu Vancung ih a pa ih duhnak sawn kha thupibik ah a ret thiam ringringnak hi asi (Mt 26:36-44). 

 

Thlacam cu Pathian thawn biakawk asi ruangah Jesuh in thlacam ringring dingah in fial (1Thes. 5:17). Ziangkim kan tuahmi thlacamnak thawn hlan dingah in duh ih hleiah, kan nunnak hrimhrim thlacamnak thawn apawk ringring dingah in duh (Colo. 4:2). 

 

Ahleicein, caan netnak ih um kan si ruangah ralring le fimvarten thlacamnak thawn nun hlanaw ringring dingah(1 Peter 4:7) ah in sim. Leitlun thlemnak ih kan luh lonak ding khalah thlacam ringring ding kan si (Matt. 26:41). Kan harsat caan khalah Pathian ko dingah le a hnenah thlacam dingah Pathian cun in duhmi asi (James 5:13). 

 

Pathian hnenah thil kan dil tikah, kan hrang a tulmi dil thiam ding kan si. Kan duhmi le tha kan timi poh kan dil ahcun kan ngah theh lo ding. Curuangah, kan tulmi ngaingai cu, thungaithlak in, ka ngah tengteng ding timi thinlungpu in dil ding kan si sawn (Mark 11:24). Kan hrang tha Pathian ih a timi sawn kha, dil thiam ding kan si. 

 

Kan tul ngaingaimi asi ahcun kan ngah hlan lo dil ding khal kan si (James 1:6). Pathian duh lo zawng tuahtu kan si ahcun kan thlacamnak khal hi Pathian cun in sang let lo ding. Asinan, a hmaiah felten kan um asi ahcun kan thlacamnak in hmuar a nei ding asi (James 5:16). 

 

Caan tampi ah Pathian in kan thlacamnak in san theulonak san cu kan ti-aw-ter (Matt. 6:5-15). Cun, porhawknak thinlung nei le kanmah hrang lawng tumtahnak nei ih kan dil theu ruangah kan ngah ding zat kan ngah lo theu (James 4:3-6). Kan nun tlan daan ah Pathian ti lungawi le a duhzawng tuahtu kan si a tul. Pathian cun kan dil hlan hmanin kan duhmi le tulmi a thei. Kan dilmi kan ngah lo theunak san pakhat leh cu kan hnenih Thlarau Thianghlim a ummi kan ti riahsiat ruangah asi theu (Eph. 4:30).

 

Thla kan cam tikah, a netnak kan tuah daan ding cu “Bawipa nangmah na thu, na rem ti daan in siseh” timi hi kan sal ringring a tulmi asi. Jeush Khrih, Amah rori thinhar le mangbangih a um caan khalah, “Ka Pa, na duh vek siseh” titu asi. Ziangvek khal kan dil asikhalle, kan Bawipa Pathian cu thuneitubik asi ruangah Amah ih duhmi le rem timi kha kan parah tuah ter ding kan si (Luk 23:34). 

 

Jesuh khalin A Pa in tlansan vekin a theih khalah thla a cam thotho ih a biak thotho vekin, kan thlacamnak hi sang lo vekih kan ruah caan khalah thlacam peh ding kan si (Mtt 27:46). 

 

Cule, kan thlacam in sanlonak tiih kan ruahmi khal in sannak phun khat thotho asi. Kan tul lo ruangah daiten kan hrangah a um tinak sawn asi. Kan thlacam netnak ah Jesuh ih a sim bangin na kutah ka nunnak ka lo hlan timi le Bawipa nangmah na thu timi hi cu telh thei ringring sehla Pathian lungkim zawng a si hrimrhim ding.

Thianhlimnak Duum In - Uk Lian

Thianhlimnak Duum In    

      

                         

Thianhlimnak kan sim tikah pumhlum thianghlimnak asi ringring. Pathian thianghlim asi ruangah Amah thawn umtlang ding cun mithianghlim kan si a ṭul. Kanni mithianghlimlo cu a fapa Jesuh Khrih hmangin mithianghlim ah in tuah zo (1 John 1:7). Thimthuneihnak, Satan kaihhremnak ihsin mithianghlim (miluat) si dingah ruunsuakmi kan si ruangah, thianghlimten um dingah kawhhranmi kan si (1 Thess. 4:7). Kan sungah miphun pahnih “Tisa” le “Thlarau Thiang” um hmansehla, sual ah kan thi zo ih Khrih ah nun thar neizotu kan si ruangah thil ṭha lo tuah ding nuam kan ti nawnlo (Rom. 6:11). 

 

Pathian a ropitnak khal a thianhlimnak hi asi. Amah ah sualnak a um lo (1 John 3:5). Sualnak neilo cun sualnak khal a tuah dah fawn lo (Heb 4:14). A thianhlimnak hi Pathian in sui lukhum bangin a khum. Pathian ih asinak, a thianhlimnak hi zumtu cun kan neih hrimhrim dingmi sinak ropibik pakhat asi.   

 

Jesuh cu Pathian asinak taan in minung lakah a um tikah, zohman in sual puh ding an theilo. Thianghlim loin ni khat te hman a caan arak hmang dahlo. “Sualnak in puh theitu nan um maw?” ti’n Farasipawl mithmai zoh in a suh hmanah sualnak puh ding hrimhrim an thei lo (John 8:46). Peter khalin, in kotu Jesuh Khrih a thianhlim vekin thianghlim ding kan si thu napin a aupi (1 Peter 1:15). Ziangahtile, thianhlimnak lo cun Pathian ton ngaingai a theih lo (Heb 12:14). Curuangah thianghlim loin, duhduh in um men dingah Pathian cun in ko hrimhrim lo asi (1 Thess. 4:7). 

 

Jesuh Khrih sungah mithianhlim sinak kan co hnu ah, nitin thianghlim dingah kan zuam dingmipawl a um hrih lai. Cupawl cu ṭhimnakah, kan zoh lo dingmi zoh lo dingah, kan tuah lo dingmi tuah lo dingah, kan ṭong lo dingmi ṭong lo dingah tivekin thianhlimnak duum in kan supawk ṭulmi tampi a um. Miphun pahnih kan sungih a um tikah kan tisa duhnak do ringring ding kan nei.

 

Thianhlimnak le Pathian Thu Thlunnak 

 

Thu-thlunnak le thianhlimnak a feh kop ringring. Hi leitlun ah, a famkimmi thianhlimnak hnakin, Pathian kaihhruainak sungih um thiam a thupi sawn. Pathian thu thlunnak cun thianhlimnak ah mi a hruai ringring sawn. Sual do neh uar hnakin, Pathian thu thlun ngah tam hi uar sawn sehla kan nun daan cu arak thianghlim thei sawn ding. 

 

Jesuh minung sinak thawn leitlun ih a um laiah, arak sualpalh dahlonak san cu, Amahte thuthu in a um dahlo. A pai’h lungkimpi mi pawl lawnglawng a tuah (John 8:29). A pa thawn biakaw in nitin caan an hmang; zingthla pit khalah hmun fianrial hawlin a pa thawn an biakaw ringring (Mark 1:35). Amah, Jesuh khalin ka rawl thawbik cu ka pai’h duhnak tuah tiah asim (John 4:34). Thianhlimnak nun nei ding cun, Pathian ih duhzawng, le a mizia sinak milin kan nun a ṭul. Tuah ding le tuah lo ding kan theih tlunah, thianhlimnak daan a tuahtu Pathian kan parah a lung a hmui maw timi ruat ih nitin kekar ding kan si. 

 

 

Sia-Tha Theihnak le Thianhlimnak

 

Eden hmuan ah sia-ṭha theinak a suak ih, kan duhhrilnak cu thupibik le ṭihnungbik ah a cangsuak ta! Kan thinlung duh hril theinak hi Pathian hrangih thupibik khal asi ve. Satan khalin, nasa zetih in donak hmunpi cu kan thinlung sungah hin nasi. Curuangah (Jeremiah 17:9) sungah, “Thinlung hi buum hmang theihthiam harsa asi” thu khal kan hmu. Satan cun Pathian hua dingah, nulepa ulenau hua dingah, Pathian mawhphun dingah kan sungah a phunphun in vuihramnak thu a ret ṭheu. Himi kan theihthiam ih kan do ringring ṭulmi asi.

 

Satan hin, kan sualnak hmu theilo dingin kan mit in caw ter ṭheu. David khal, mi’h nupi a sual pi ih mi’h pasal a thah sak hnu khalah a sual ti a thei aw lo. Laodicean kawhhran khal kan kawhhran kan dam, kan cak, neihnak lam khalah kan tawk tiih a ruahawk lai ah, Pathian in “Zangfahza, mitcaw le lawngfahkheh santlai lo” tiin a hmu. Kan thinlung ihsin sualnak le ṭhatnak a suak ṭheu ruangah kan thinlung hi a kil rorin kan kil a tul (Thufim 4:23). Kan thinlung hi thianghlim dingih kan raldonak hmunpi asi. Kan thinlung suangh sualnak dang arak um ve ṭheu ruangah cumi kan do ringring a ṭul (Rom 7:21). 

 

Thianghlim dingih kawhmi kan si vekin, Jesuh ah thianhlim termi khal kan si zo. Kan zohṭhim dingmi cu kan Bawipa Jesuh sualnak tuah lo le, sualnak nei lo khi asi. Pathian in kan kiangkapmipawl vekih nung dingah in ko dahlo. Jesuh Khrih bang ding le Amah zoh dingah sualnak ihsin runsuakmi mithianghlim hleice kan si. Pathian thianghlim ahcun thimnak a um lo (1 John 1:5). A hnenah thimnak a um lo ruangah, a hnen ihsin thusuakmi le kan parih thilthlengmipawl hi Pathian kan mawhphun dingmi a silo. 

 

Minung tampi cun Pathian hmaiah a thianghlim lomi kan tuah tikah “ka sual, ka palh” kan ti men ṭheu. David cun Pathian hmai rori ah ka sual a ti. Joseph khalin Pathian hmaiah thilsual ka tuah thei lo (Gen. 39:9) a ti. Kan sual asile Pathian hmaiah kan sual timi kan theih a ṭul. Thianhlimnak kan ṭulnak san cu thianhlimnak thawn lo cun, Pathian thawn um tlang a theih lo. Pathian ih hmantlak ding khalin thianhlimnak kan ṭul (2Tim. 2:21). Thianhlimnak hi pumhlum thianhlimnak asi. Pathian hrangah a nungmi raithawinak, a thiangmi raithawinak vekin kan taksa, kan nunnak hi Pathian hrangah pe ding kan si. Curuangah, to men loin, sualnak cu tlansan a ṭul ih, Pathian ih a thianhnlimnak cu co ve dingah a duum in kan duum a ṭul asi. 

Ruahsannak Nung Sermon - Uk Lian

Ruahsannak Nung Sermon, a hnuai YouTube video ah zoh a theih. Click in a hnuai ah zoh aw.

 The Living Hope

Ruahsannak Ngaingai Na Nei Maw?

 

Ruahsannak nung ka nei

Ruahsannak nung ka neilo

Ruahsannak nung timi ka theilo 

Ruahsannak nung tivek ka ruat dahlo lo

Ruahsannak nung timi lam ka ruat paih lo

 

Vanṭhatnak Maw Bawipai Ruangah

 

Ka parah ih thilthlengmi zaten Bawipa ih theihpi, Bawipa ruangah a cang

Ka parah ih thilthlengmi zaten ka vansiat le vanṭhatnak ruangah a cang

Ka parah ih thilthlengmi zaten nature ih lairelcia daan vekin a cang 

Ka parah ih thilthlengmi zaten keimah ih ṭanlak daan vekin a cang   

 

Jesuh Khrih Hi Kan Ruahsanmi Asi

 

Nan hmailam hrang ruahsannak ṭha ka nei (Jer.29:11)

Jesuh ruangah ruahsannak nung thawn kan khat (1Pet 1:3) 

Jesuh parah ruahsannak nung nei ih hram bunmi kan si (Titus 1:2)

 

Ruahsannak Nung Timi Sullam

 

(Romans 12:12)          

Rejoice in hope, be patient in tribulation, be constant in prayer.

Ruahsannak ah lungawi, harsat tuar caan ah thinsau, catloin thlacam.

 

Patient in affliction (Damlo-natnak)

Be patient in trouble (Thinhar buainak)

Be patient in tribulation (Harsat le zonzaih tuarnak)

Endure in suffering (thinlung nat tuar caan ah) 

Persecution (Hrem tuarnak lakah) 

 

Ruahsan Ding Tha In Pe

 

Catloin ralṭhatnak le ruahsannak in petu Jesuh asi (2Thes. 2:16)

Kan zumnak le kan ruahsannak Jesuh kaih hnget ding asi (Heb.3:6)

Kan himnak, hnangamnak hrampi kan ruahsanmi a si (Heb.6:19)

 

Ruahsannak Nung

 

Now we live with great expectation

Lively hope

Ever-living hope

The hope of life

New life and a hope that lives on

An immortal hope 

Pathian Ih In Semsuahnak San 3

 

1. Amah Sunloih Dingah

 

Ziangkim acang dingmi theicia cingin, Pathian hrangah kannih cu, a hngahhlap bikmi kan rak si. Pathian ih fa kan sinak hi, a lungawibiktu cu kanmah siloin in Sersiamtu Pathian sawn asi. A fa kan si hrimhrim ruangah Bawipa a lungawi ih a lungawinak kan hnenah langter ringring.  

 

A Sersiammi minung in Amah kan phansan hnu khalah, Amah thotho in Amah mah a lungawi salnak ding hrangah Amai fapa thotho cu kan hrangah kumkhaw daih raithawinak hrangah in pe. Hivek duhdawtnak maksak cu kan Pathian in a tuah. 

 

Ref: Colo.1:16, Rev.4:11, Saam. 149:4, Eph. 1:4-5

 

2. Amah bang Dingih Siam Kan Si

 

Simfiangtheih va si hmansehla, Pathian in Amah vek pianhmang rorin in tuah timi cu thilmak asi ringring ko ding. Minung sual hmang cu Amah hrangah mifamkim ah in tuah timi khal, minung fimnak cun, a ruat baan hrimhrim lo ding. Sersiamtu tlun ah thiltitheinak cu kan neilo asinan, Amah zon ding le amah bang dingih tuahmi kan si. 

 

Jesuh sungih um cun Jesuh simmi le tuahmipawl a cawng ding. Bawipa Jesuh a zumtupawl cun a thupekmi pawl khal an thlun dingih a aw khal an thei ding. Kanmah hmuak dingin Jesuh ara sal dingih cumi ni ahcun Amah vek ngaingai kan si dingih ziangtlukin kan lungawinak a kim ding. 

 

Ref: Gen.1:26, Mt.5:48, Lk.6:40, 1Jh.2:6-3:2, Eph. 1:3-4, Lk 6:46

 

3.Pathian Rian Dingih Kawhmi Kan Si

 

Kumkhua daih dingin, Pathian in kan nunnak in ruun zo ruangah kumkhua kan umnak ding van inn nuam ih um dingah cui’h in rundamnak thuthangtha cu mikip hnenah phuang dingah Bawipa Jesuh Khrih in in fial. Lungawinak thuthangtha cu mikip hnenih simphuan dingmi asi. Zumtupawlih kan lungawibiknak ding cu Van ih nunnak cabu sungih kan hmin ngan asi ruangah asi. Curuangah catbangloin lungawi ringring ding mi kan si. 

 

Zumtu rah neilo, thuthangtha phuang lo, Pathian fial vekih a tuah lo tu cu, Pathian ih thinhengnak an parah a thleng ding. Mah hrang lawng a ruat ih nunnak a humhim tumtu cun a nunnak an caan thotho ko ding. Kan nunnak hi in rundamtu Pathian hrangah a nungmi raithawinak bang tukin pe ding sawn kan si. Kan dam sungah nitin in Sersiamtu lungawi zawngin ka um maw timi nitin a sutaw ringring ding kan si.

 

Ref-Mk.16:15, Rom. 12, Mt.6:24, Mt 16:25, Jn 15:16, I Pet. 4:10-11.