Mi Zovek Na Si?

 "Khawi ah na um?" tiin ka phone ah message ara lut. 

"Kan tlawnginn ah...ka buai tuk lai..."
"Ok, I love you" tiin message i kuat.

Class ka um lai le hnatuan ka buai zet lai caan ah biak i tum ringring. A call mi ka lak duh dahlo. Asinan, "Ka lo biak duh em nan, I love you" ti’n message I taan ringring.

Hivek minung hi huat um, mizuva a si hrimhrim ding. Mi’ buai zet lai caan vekih mi biak tum ringring. A hrimhrim in keimah hi miduhaw cia tuk ka si fawn. Ka theih cian lo, minung cu ziangah ka biak ciamco nak ding a um ti’n ka hnong ringring.

A mak tuk, zing thawh veten "Good morning, I love you" ti’n message i kuat. Cule hnatuan ka feh caan ah "Hnatuan nuam aw, I love you" ti’n i kuat. Rawl-ei caan ah, "Rawl ei thaw, I love you" ti’n i kuat lala. Zan ihzawng khalah "Mangtha, ihthah thaw maw, I love you" ti’n pelh loten i kuat ringring. Mak cu a mak!

Ka ziangkim a thei thluh vek khi a si. Asilole, ka umnak kip ah CCTV a ret thluh vek rorin ka tuah dingmi zaten a thei thluh. Class ka lak theh cia khal a thei. Message siar cawk lo in, i kuat ringring bet. Ka phone cu amah ih I call nak le a message lawnglawng in a khat theh.

Tongawk a duh thu tla i sim thlang. Puai tivek caan khalah “Ka rak raa ve ding” tivekin message i kuat theu. Anih thawn kan thlunawk asile duh vekin ka nuam thei lo ding, rualpi kom tla a hnok thluh ding tiah ziangtik hmanah a message ka reply dah lo. Cun, ka zahpi deuh, rualpipawl in amah thawn nan kaih awk lo in ti ding ka duh fawn lo.

I biak hi ka ning tuk thlang fawn ih i call nawn lo ding in le ca i kuat nawn lo dingin ka kawk. Ka hro ciamco. Na message khal ka siar dah lo, ka delete rinring ka ning tiah ka sim. A netnak ah “Kei cu duhdawtmi ka nei zo, veikhat te khal biak i tum nawn hlah, i contact nawn hlah” tiin napin ka hro ciamco bet. Ka thuhla hrimhrim a ruat tla ruat nawn hlah ka ti. Himi ni ihsin a dai reprep. Zianghman i hnaihnok nawn bak lo. Lehlam ahcun um a har zikte lam…..nan…hnathiang vuarvi ee!

A hnu zarh 3 hrawng ihsin ka thinsen a mal cih. Ka damlo ciamco ih sizung ka thleng riai. Ka dam theilo tikah sibawipawlin ka thisen in zoh. A mak daan, rel ngam ding tla a si lo. Natsia ka neih thu sibawipa in ka mithmai sia ding kil phah in I sim. Ka natnak cu rel ngam ding asilo, ka lungphang leitlun ah ni ziangzat hman caan ka hmang nawn lo ding timi tla sibawipa cun I sim cih. Ka lungphang, ka lau dan cu ka thih hlan ah veikhat thi vekin tlukin ka thazang a cem.

Sibawipa sim bangin a nini in ka besia ngaingai. Ka rualpi tha pawl hman in, in vehvai duh nawn lo. Sizung ah ka um rei tuk zo. Zohman caan in pek thei nawn lo. Ka ulenaupawl hman keimah vehvai ding an tun-awk rero thlang. Leitlun ah santlaihnak ka neih nawn lo thu le, a rei hlanah ka thaw netnak a cem ding thu ka thei thluh zo. Thlankuang ih in ret daan ding, zopawl ka ruak kiangah an tap ding tivekpawl a sangsangten ka ruat cia thluh zo.

Sizung ahcun vehtu pakhat khal ka nei nawn lo. Sibawipawl hmanin ka thih ding lawng an hngak thlang. Ka umhar, ka taksa cu a cangvai thei ngaingai nawnlo, hmansehla ka thinlung cun thu tinkim cu a ruat rero thei lai ko.

Thazawng zet cingin, ka phone contact list pawl ka zoh rero. Ka natnak thawn ka thih ding cu ka theifiang zo nan, ka umhar biaktu ka neih lo hi thihnak pakhat vek thotho tlukin a har. A hlan ih nitin zaantin i biak ringringtu hmin ka hawl sal. Asinan, ka thinheng tuk lai ah a contact ka rak delete zo fawn. A pawi tuk aw!

Ka mithli cu hnul cawk lo dingin ka lukham a ciar thlepthlep zo. A hlan ih I rak biak ringring tu kha tui caan ah I biak duh lai pei maw tivek pawl ka ruat. Ka phone cu ka kut khur phah cingten ka kaai ih ka rualpipawl, in biak duhtu dingih ka ruah mi pawl hmin ka zoh. Asinan, zohman in biak paih nawn lo ih ka call hai le hman an kai lo ding timi ka thei cia fawn. Ka thih hlanah lungawinak hrimhrim a um nawn ding maw si….

‘Ruut ruut, ruut ruut’ ka phone vibrate in a awn.
Ka lau daan, ka phone ka thlak leuleu.
Ava mak ve. Tuvek ah zo nih i call duh ding?
Midang zohman an si lo ti ka fiang. A hlan ih I call theu tu timi cu ka thinlungah pheh theih loin ka fiang. Ka lungawi daan, biak daan ding le ka thei lo. Ka aw a khur, ka kut a khur…a taksa a khur thluh.

"Hello"
"Hello, na dam maw?" in ti.

Ziangtin ka sawn ve ding. Malten, ka hnuk-ulh tuk. Phone a thlak ding le ka phang. Ka mobile cu mithli thawn a khat.

"Hello, hello, hello" ka ti. Cuzat lawng ka tong thei.
"Na tap maw si?" in ti. Tap ti le ka duh lo, pacang zetin tap lo ee, ti ka tum. Ka kaa a aang thei hrimhrim lo. Tingaihnak a um lo, napin ka tap.

“Ziangah na tap?”
“Tap nawn hlah” in ti. Ka tap luar sinsin. Ka lungzuur tuk!

"Zangfahten in fehsan nawn hlah aw”
“Nangmah lo cu rualpi biaktu ka nei nawn lo" tiah zamrangten ka sim cih.

Annih cun awkam neem zet te in, "Nangmah si, nitin zantin ka lo biak duh ringring nan i zahpi, i biak paih lo, i tlan san ringring ih, ningnaa zet dingin a hnong si" tiah i sawn. A aw hman cem hlanah "Ka lo zahpi nawn lo ding, nangmah hi ka ziangkim umsun na si" tiin zangfah ka dil sal. Ka sim pehmi cu nangmah thawn a hlan ihsin rak biakaw sehla, lo kom ngah sehla hivek ka cang lo ding nan ka ti.

Hivek tlukih mitha, a mak tuk. Awkam fiang le neem zet te thawn hitin I sim lala….

“Ka rual ziangtik hmanah ka lo tlansan lo ding”.
“Na hnenah ka um ringring so khaw”
“A tu thawk in catbangloin, kan biakawk ding maw”

Curuangah hipa hmin cu delete nawn lo dingin ka thinlung le theihnak karlak ah hitin ka saved IN DUHDAWTBIKTU KA BAWIPA JESUH!

Credit- Jerome Hauzel