Leitlun Bawmtu

C athiam saang le Calailam ih lut thuuk zet a si. Santhar mino tuallennak hmunpi Facebook group interview tete ka siar tikah Chinmi canganthiam ah Pu No Than Kap an uar thu mino mitamsawn in an tarlang. Cabu tamzet a suah ih pitar le putar pawl khalin a cabu pawl siar nuam an tiih amah hmulotu khalin a canganmi an siar ngah. A canganmi pawl cun kan Chin mipi sunmang a neih ter. Curuangah asi ding July 14, 2012 ah CCYI pawlin Yangon ah Dr. J.H Cope Award an rak pe. A thuhla cu Chinmi pawl hnenah a se zawngin maw, a thazawngin maw a thang vivo ih mino le tarkuun tiangin Pu No Than Kap hmin an rak theih phah. Ramsung ih Chinmi thiltithei rual, pawl sawmin party an din cio tikah Pu No Than Kap party cun nehnak a ngah ih Chin Affairs minister dinhmun thawn khua a tlawnnak hmun kipah sunsak le upat a hlawh. Cutin, ramsungah a thuhla a darh vivo ih khawte nauhak pawl tiangin a thuhla an thei.

Hlavang ih thu theihmi le, hmun le hmun ih thutheihmi cu a kaar arak hla aw tuk ngai! Kan Chin-mi lakah thuhla kimcang theilo, rel sinmi le simsawngmi asilo zawngih sim le ngan hmang tamzet hmuh ding a um. Tahṭhimnakah CNF thuhla le Ramsung Chin Party pawl thuhla fiang le kimcangih kan theihlomi mai ruahnakih ngan le sim kan um ṭheu. Cuvek thotho in, pawlkom pakhat sung thu, kawhhran pakhat sung thu, midang innsang thuhla tiangin kan theih fellomi mai zumnakih sim kan um phahphah. Amahbelte cu, kan theihfelmi cu kan theihdaan vekin sim ding kha ṭih ding asilo, cuvek thotho in kan theihlomi cu “Ka theilo” ti ding khal ningzah ding a si lo. Dr. Za Hlei Thang cu Melbourne, Australia arat laiah a mai kaa rori dawngin ka rak kom ve. Nauhak in a pa a duhduh thu a suh bangin karak sut. Thudik lawnglawng i sim khal ka ti ngamlo, a diklo lawnglawng I sim khal ka ti ngam cuang lo. Melbourne ih Chin community hruaitu dangdang le kawhhran pastorpawl tiangin an rak kom cio i...