Thuthangtha Sim Caan Ah Thangthatnak Hla Sawisel Cih A Pawi Maw?

Laimi hrangah biakinn ih khawm cu Pathian nung thangthat lawng siloin tuah daan phung (nunphung) pakhat ah kan hman zo mi a si. Kan khawm tikah, hla kan sak ringring. Hlasak a nuam asile khawm tla a nuam. Thusimtu an thiam lemlo hman ah hlasak a nuam ahcun khawm a nuam.

Asinan, thuthangtha simtu thenkhat pawl in kan hlasak mi pawl an sawisel theu tikah hlasak a nuam lo caan a tampi. Kan hlasak mi pawl kan sawisel tikah mipi hlasak ngam nawn lo ih rak um, hla ih thinlung rak pe ngam nawn lo tampi an rak um theu a si.

Hla cu, hla a si ruangah hla bang tukin kan sak. A sullam hnakin hla a sinak ruangih kan sak caan a tampi. Asinan, hla khalah umzia neilo tuk lawmlam a rak um ko. Bible thawn a kalhaw verver tivek a um. Cuvek cu hrial thei tawk ih hrial thiam a tha. Thimnak ah, “minung hmang lo in Bawipai’ kutcak a langlo” tivek tla kha, Pathian cun ramsa tla vate tla a hmang thei.

Asinan, kan hlasak mi a diklopawl hi thuthangtha sim caan ih sawisel ding asi in ka thei lo. Kan thangthatnak hlasak mi pawl hi, pulpit ih sawisel cih ding khalin ka ruat lo. Hivek cu mipi hmai ih sawisel ding a si lo. Mipi hmai ah sawisel cih men lo in, kan rem thei daan ding a um a si. Hla hruaitupawl hnenah sim ih sak nawn lo ding, lole hla thu pawl thleng. Asilole, training caan ih simfiangawk ding. Asilo hman ah a hla thuhla pawl relkhawmnak neih ding a si.

Hla phuahtu pawl khalin, Pathian thangthatnak hla kan phuah tikah ralrin deuh a tha. Cuvek thotho in hla sawiseltu (fakseltu) pawl khalin an ruah daan men siloin, Bible thawn a kalhawknak le minung nunnak thawn a kalhawknak pawl fiangten an simfiang thei a tul. Mipi pawl tla, mikip ih sawiselnak le thusimmi kan zum vivo men ding asilo, “A sinak” le “A silonak” kan hliah thiam ding a si.

Curuangah kan mah le kan kawhhran cio ah, kan hlasak mi pawl hi pulpit ah sawisel awk sak nawn lo in, hla lam ih tuanvoneitupawl hnen ah simawk thei hmaisa sawn sehla thatnak a hring suak tam ding ka zum. Thusimtu in a duh daandaan in, napin hla a sawisel ciamco hnu ah cui hla pawl cu thaw zetin kan sak thei nawn lo a si. Curuangah mipi hmai ah sawisel cih hnak in rem ding, sak nawn lo ding, cu hnakih tha sawn tla khihhmuh-awk thiam ding a si.