Thuthangtha Dang A Um Lo | Uk Lian

Minung ih a theihzomi thuthangṭha hmuahhmuah lakih ropi le nasabik thuthangṭha cu Jesuh Khrih in, kumkhua thihnak ihsin kumkhua nunnakah in runsuak zo timi thuthangṭha hi asi. Pathian ih in zangfahnak rori ruangah Jesuh Khrih cu kumkhua kan nun theinak dingah kan aiawh ah a thi. Kan tuahveknak le, kan tawlrelbomnak tel riai loin a zangfahnak liolio ruangah rundammi kan si timi hi, thuthangṭha ngaingai cu asi (Eph. 2:8-9).

 

Pathian ih in rundamnak hi lei pian hlan ihsin, Pathian ih arak timtuahciami asi. In rundamnak hi a pekih in pekmi runsuahnak laksawng sunglawibik asi. Curuangah Paul in, Galatipawl ca a kuat tikah “Thuthangṭha Dang A Um Lo” tiah a sim hai. Kan hrangah zangfahnak thuthangṭha siarlo thuthangṭha dang a um thei ding maw si! (Gala.1:6-10). Zovek khalin, vancungmi khalin thuthangṭha dang an phuang pang asile camsiat an si ding timi (Gala. 1:8) ah kan hmu thei asi. 

 

Nitin, Pathian kan zumnak ihsin tlansuak ih pial-hlo dingah a phunphun in Setan pa cun in zawl ringring. Paul in Galatipawl ca a kuatnak san khal, rundamnak thuthangṭha zum dingah Judah daan nan thlun a tul tivekin Pathian thuthangṭha dang an phuan ruangih a kuatmi asi. Cuvekin, Pathian thuthangṭha hnakih thupisawn ih ruah dingmi thil, leitlun ah nitin hmuh ding a um. Asinan, Pathian zangfahnak thuthangṭha hnongin thuthangṭha dang; minung ih Pathian biak tlon lungawi tumnak le Pathian zangfahnak thuthangṭha hnakih uarmi dang kan neih ahcun camsiat kan si ve ding asi.

 

Kannih zumtu hrang ahcun kan thuthangṭhat cu misual rori Jesuh thihnak ruangah midingfel kan sinak hi asi (2 Cor. 5:21). Pathian hmaiah mithi asi zo hnu, in nung tersal hi Pathian ih zangfahnak sangbik asi (Rom 5:23). Pathian in, in rundamsalnak hi Jesuh Khrih hmangin thinglamtah parah “Ka ṭheh zo” tiin in tuahfelsak zomi asi (John 19:28-30). Kannih Pathian nung zumtupawl cu Pathian ih tuahzomi zumtupawl kan si vekin, a tuah lai dingmi zumtu le rinsantu khal kan si. 

 

Jesuh Khrih rundamnak thuthangṭha zum cu kumkhua nunnak asi (John 3:16). Jesuh zum hi kan vankai theinak tawhfung cu asi (Acts 16:31). Pathian ih in rundamnak hi, zum duh loin dung kan tolhsal le kan kirsal asile, Pathian ih laksawng Jesuh pom duhlotu kan si tinak asi. Jesuh zumnak ihsin kan kirsal pang asile, Pathian ih a tuahzomi zumlotu ah kan cang tinak khal asi.

 

Hi leitlun ah khualtlawng ih um kan si. Kan khualtlawnnak ahcun kan caam rei lo ding. Zumtu khualtlawng kan sinak san cu, kan kumkhua inn pan ih feh rero kan si ruangah asi. Kan van-inn lam pan ih feh kan sivekin, kan Bawipa Jesuh Khrih arat salnak ding thu in hnemaw ding kan siih, kan ruahsanbik dinngmi khal ni netabik ni asi. Kan riahsiat le thinhar caan khalah Pathian ih in rundamnak thuthangṭtha hi kan ruah camcin dingmi asi.  

 

 

Kan pabik Abraham cun Pathian thu hi a rinsan ih a zum khal a zum ngam. Cui’h, a zumnak ruangah Pathian in midingfel ah a cohlang asi (Gen. 15:6). Kan zummi rundamnak thuthangṭha hi, zangfahnak thuthangṭha asi. Kannih cu, zangfahmi, ngaidammi kan si. Ngaidamnak cu Jesuh ruangah kan ngah. Pathian hrangih kan tuahnak ruangah le, kan pumpekawknak ruangah siloin, Jesuh Khrih in tlennak thuthangṭha kan zumnak ruangah van kai dingmi kan si. 

 

Kan lungawinak ding bik cu, Pathian ih in tlennak thuthangṭha kan cohlan ruangah kan hmin cu nunnak cabu sungah ngan asi. Himi ruangah lungawi camcin ding kan si (Luk 10:20). Ngaidamnak thuthuthangṭha ruangah, kannih cu Pathian fa kan siih, kan pabik cu in rundamtu Pathian kan Bawipa Jesuh asi.

Zumnak Nung (Living Faith) - Uk Lian

“Ka zumnak a caklo”, “ka zumnak a mal” kan ti ṭheu nan, asile Pathian a um lo ti’n ruat hnik aw ti aw sehla, kan ngam cuanglo lala. Pathian kan rinsan ih kan zumzia cu, Pathian a um lo ti’n kan ruah ngamlonak in a fiang. Ziangahtile, Pathian a umdaanzia cu hliah ṭul loin, kan nunnak ah Pathian ih in kaihhruai daanzia tontehnak a phunphun kan nei zo.

 

Cathianghlim sungih zumnak kan timi (faith) cu, zum (believe) menmen vek siloin, rinsannak le pumpeknak a telmi (faith) zumnak asi. Cumicu, Jesuh Khrih thuthangṭha kan theihnak ihsin arami thu, kan theihfengmi Jesuh ih thu asi (Rom 10:17). 

 

Inn tum pipipawl hi, zo-in a sak timi kan thei lo nan, asaktu cu a um timi kan theih vekin, Pathian cu mit rorin minung kan hmuh vekin kan hmu theilo nan, a tuahmi ruangah Pathian a um; Pathian cu rinsantlak asi timi fiangte’n kan thei. Curuangah Amah hnenah zum hngetnak le ruahsannak khal kan nei; hmuhlomi Pathian nung zum ih rinsantu khal kan si (Heb 11:1). 

 

Khawsiapawl khalin, Pathian a um timi cu an zum asinan Jesuh Khrih hrangah pumpeknak le rinsannak an nei lo (James 2:19). Asinan, kannih Pathian nung zumtupawl cun, kan hmuhlomi Pathian nung kan zum ruangah zumnak in kan feh (2Cor 5:7). Ziangatile, zumnak thawn lo cun Pathian lungawiter a theih lo (Heb 11:6). Curuangah, Khrih ih a tlenciamipawl cu midingfel kan si vekin, Pathian rinsanak, zumnak le a hrang pumpeknak thawn a nungmi kan si (Rom 1:17). 

 

OT ah Pathian zum hnget tampi lakih langsarzual tla cu; Abraham mai’h sungsuak fapa rori Pathian a zum sawn tuk ruangih Pathian hnenih pe ngam. Noah at-hlawh ih Pathian zum ngam, Daniel thih ngam ih Pathian rinsan, Moses zumnak thawn tipi sen tansuak ngamtu, David a raal hnakih Pathian zumnak tuumsawn ih hmutu, Esther thihtheinak lakih Pathian tlaihsantu, Elijah zumnak thawn Baal prophet 450 do ngamtupawl ih an zumnak hi a va nasa ve! 

 

NT khalah Jesuh hnenih zumnak nung nei tampi kan hmu. An zumnak kham ih kham theih lo an si. Mitcaw pahnih in Jesuh an ko, an kham nan, Jesuh in in tidam thei ti an theih ruangah kham an theihlo, an ko ciamco ih Jesuh in an mit a vaan ter ngaingai (Matt 9:27-30). Zumnak hi a va sunglawi ve! Mitcaw Bartima khal cuvek thotho in Jesuh a ko, Jesuh in a mit a vaangter ngaingai (Mark 10:47). Kum 12 sung thipuut nu khal, Jesuh ih puan zikte a dai asile a dam dingah zumnak a nei ih a dai hnu ah a dam rori ngai (Matt. 9:20-22). 

 

Zumnak hi, kan taksa kan thu-nun vekih thu-nun ding asi. Pathian kan zum tam asile, kan parah Pathian thiltitheinak a lang tam ding tinak asi. Curuangah kan zumnak, Jesuh Khrih thu pawl, Pathian ih duhnakpawl tamsin thei ih thluntu kan si ding hi Pathian ih in duhsakmi asi. Kannih, Pathian ih midengfel tiih kawhmi pawl hi, kan nitin nunnak ah Pathian nung zum hngetnak thawn dingfel ten nung ding kan si.