Ka Fanu Na Dam Zo In Ti

Tuini cu ni suah daan a danglam cuang lo, caan feh daan khal acak ce cuang lo nan, ni khat sungah thil tampi a thleng. Nikhat sungih thil thlengmi siloin, nazi pakhat sungih thil thlengmi asi sawn.

Hmun pakhat ah pitar na tong ding ti’h simmi vek rorin, hrial le pial theih loin kan tongaw. Biak ka tummi asilo, asinan amah sawn supaw theiloin, kut zaa zapin thu i ruah rero. Ka buai zet thawn ka thinlung ngai in ka sawn theilo.

Asinan, tumtah nei in, i bia timi ka thei. Malte, kan biakawk sungah ka thuhla tampi I sut tikah, paih lemlo in ka let rero ko. Asinan, pitar danglam zet a si, a tongkam a zaang zetih a hlim zet fawn. Amah ka zoh asile, kum note asi fawnlo, asinan a zangkhaai zet lala fawn.

Ziangasikhale, biak tam ka tum lo ding ti’n, ka phone sung ta casiar san ka tum sal. Cutin, be aw loin, sekan 5 a her. Asinan, supaw thei cuang loin, Pathian in keimah hnenah sim a duhmi, i sim tum thotho. Tongkam tawite asinan, kum reipi ka theih duhmi thuhla a si. Tongkam pakhat te in, ka phone zoh thei nawnlo in I tuah. Cucu, “Kei hi cancer naa damsuak ka si” a timi awkam a si. Himi a tong veten, Peter in Jesuh a phatsan zaan ih an zohawk vekin ka pi ka zoh.

Cancer nei dam saal mo!!!….Mirangpawl daan ten What, What……….???? 

Na testimony in sim aw ti dingmi hman keimah le keimah ka cuh-aw ciamco thlang.
Pi Lalpari hi leitlun ah a lung nuambik lo ding maw!
x

Ka phone cu ka khuup, malten…malten, ziangtin ee ti’n a thuhla ka hliah. Ziangtin, a cancer naa rori a dam thei timi ka sut duhbik. Ka biak that duhlomi ka siraw sal, ka ning vek zak phah in ka um. Mai duhmi thu si ruangah a thusimmi ka va hliah ciamco saal dan, ka ngaihaw lo. Minung theu hi, Pathian thu khalah kan mai hrang hlawknak ding lawng a ruattu kan rak um thotho.

A testimony cu zangkhaai zetin i sim. Ngai khal a nuam. Pathian minung pawl kiangih um cu phurrit a zangkhai. I ruahmi, ka theih fiang daan le I sim daan vek ten…..

Kei hi, Malaysia ihsin cancer nat nei ka si. Kum 3 sung lenglo cancer in ka naa. Australia ah kum 2 sung sibawipawlin in zoh. Asinan, nikhat cu Pathian in “Ka fanu na dam zo” timi aw, Pathian hnen in ka thei. Cumi aw ka theih vete’n ka dam sutsi in ka thei aw. Sibawipawl ka va tong ih, na cancer a roh zet zo ruangah zarh hnih sungah na thi ding in rak ti. Sinan, “Ka fanu na dam zo” timi aw, ka thinlungah a tuumsawn. Sibawipawl hin, ka aw theihmi an theilo ih, annih pawl cun in dam ter thei nawnlo nan, Bawipa in I damter zo timi ka thinlung ah a khat.

Zarh hnih sungah cancer ih thi ding cu, Pathian hnen ihsin “Ka fanu na dam zo” timi aw ruangah ka damcak sinsin in ka thei aw. Sibawi ka va tong sal ih, zarh hnih sungah na thi ding timi in rak sim sal. Asinan, ka lungawi, ka hni, ka aipuang tuk. Sibawipawl an mangbang nasa, cancer tuarpawl an thih ding ni, kan sim tikah zohman lungawi an um dahlo. Ziangah na hni? ziangah na lungawi? in ti. Ka aw theihmi ka sim duh lo, an zumlo ding timi ka thei cia. Daaiten ka um. Sibawipawlin in zum lo ih a tu le tu ka cancer level in zoh zok rero.

Cutin, ka tho ih kan inn sung ka vel ciamco. Ka baang nasa. Ka ril rawng, rawl ka ei, cu tikah sung khaat unau cu ka thi ding tiah an tap ciamco, ziangahtile, mi thizik in rawl an ei ta theu timi an thei. Ka thii ding cu, zaa ah zaa an zum zo. Sungkhat unau khal kan ko aw theh. Sibawi pawl khalin nan unau sungkhat pawl ko in, thucah sim aw, na thi ding in ti. Asinan, “Ka fanu na dam zo” timi awkam ka ngai sawn.

Zarh hnih sungah ka thi riai lo. Sibawipawl cun in zum thei cuang lo ih, a tu le tu in zoh saal. A mak zetmi cu “Ka fanu na dam zo” timi aw ka theih veten, ka pum a phaw theumi tla a hlo, ka cancer natnak a hlo verver in ka thei aw. Cutikah, sibawipawl cun in zoh sal thotho. An zum thei cuanglo ruangah vei 12 in zoh saal asinan, cancer natnak hrimhrim an hmu nawn riai lo.Kei cun, ka thei “Ka fanu na dam zo” timi kha ka nunpi a si.

Ka thuhla theitupawl an tam sinsin ih, na thuhla leitlun hmun dangdang ah kan sim ding tiah in dil ih ka zuk pawl khal an la.

Kei khalin cancer thi dingmi Pathian in a damter saalmi, Pathian minung cu hmaiton in I hmuh ter. Pathian aw hi, a fiang zet theu, a fiim zet fawn, Bawipa thu a thluntu hrangah damnak a si.