Laimi le San Thar Biakinn

Laimi hi biakinn lo ih a um theilo mi, miphun kan si. Biakinn hi kan thlarau innpi pakhat vekin kan ruat. Biakinn ah kan thinlung a riak ih, kan nun khawsak daan khal biakinn thawn a pehpar aw zet. Biakinn cu, minung vekin Pathian a tlanlennak hmun ah kan ngai. Biakinn hi kan thlarau cah le cahlo tahnak hmun vek khalah kan hmang. Cui hleiah, Pathian zumtupawl pumkhat ih kan punkhawmnak hmunpibik khal a si.

Kan zumnak le kan ruahsannak pawl, langternak hmunpibik ah kan hmang theu ih kan nauhak lai ihsin biakinn lo ih um thei lo miphun kan rak si. Biakinn thlahthlam lo ding ih arak zirh aw tu miphun khal kan rak si. Curuangah, khawitawk hmun le ram kan thlen khalah biakinn lo in, kan um thei dahlo. Biakinn ihsin Pathian kan biak tikah kan thlarau nun a diriam bik in kan thei.

Biakinn cu, kan thlarau, kan thinlung le kan thazang peknak hmunpibik a si vekin, cui’h biakinn saknak hrangah kan neihsiah liam kan ui dah lemlo. Mithen hrang ahcun biakinn saknak ding hrangah thazang le nunnak tiang hman an ui ding ka zum lo. Cuvek vasikhalsehla, Laimi ih biakinn kan ngainat daan le kan ngai thupit daan hi kan bangaw thluh cuang lo. Asinan, Lai miphun hrang ahcun biakinn cu kan hmun thupibik le kan hmun serhsangbik a si ringring.

Laimi le Judah Pawl ih Biakinn Ngai Thupit Daan ---------------------------------------------

Judah pawl in Jerusalem temple ih Pathian an biak hnak ih, biaknak hmun nuam dang, khawitawk hmanah an nei ve lo. Jerusalem Temple ih Pathian an biak tikah an lung di a riam ih an thlarau nun khal a nuam. Jerusalem khawpi hrimhrim khi, an thlarau ruuinpi ti khalin an ko. Judah pawl hi Pathian biakinn ngaingai an nei hlan ihsin, Pathian nung bulpak ih rak be hmaisabiktu miphun an si. Puanthlam ihsin Pathian biak an rak thok zo. Cutin, Synagogue ah Pathian biak khawmnak an rak nei ih diriam tawk loin, temple sak in santhuanthu ih temple nasabik pawl an din suak thei a si. Cutin, tuisan ah hmun kip ah biakinn siarcawk lo tiang a din phah thluh a si.

“PATHIAN HNAKIN SAKHUA DUHDAWT THEINAK LEITLUN AHHIN, BIAKINN ROPI HNAKIN PATHIAN ROPI HI SAN THAR MINUNG PAWLIH KAN BIAK DINGMI SAN THAR BIAKINN JESUH A SI”

Judah pawl in, an Pathian biaknak hmun pathum, Puanthlam, Synagogue le Temple saknak ding ah, an neihsiah a phunphun sui le ngun tiang in an hmang theu. An vahvaih lai khalah an neihsiah pek suah an ngam ringring ih, an len hnu khalah an neihhlu sangbik liam in Pathian biaknak inn an sak vivo theu. Judah pawlih, an biakinn ngainat daan le Laimi pawlih biakinn kan ngainat daan hi tthen thiam a har a si.

Cuvek rualrual in, kan palhnak khal a bangaw lala thei ding ka zum. Tahthimnak pakhat la sehla, Judah pawlin Jesuh hnakin temple an ngai thupit daan le, an Judah daan cu Jesuh hnakih an ret u daan pawl. Kannih Laimi zumtupawl khalin Pathian hnakin lennak kan thupit sawn zia le, Pathian hnakin minung kan rinsan theu daan pawl kan zoh tikah Judah miphun le Lai miphun pawl ih Pathian kan hmuhfiang lo daan a bangaw ringring.

Laimi le San Thar Biakinn ----------------------

Lairawn ah biakinn mankhung zetzet kan sak rero thlang. Biakinn mawibik le saangbik sak zuamawk vek rorin biakinn thatha a ding suak mi kan hmu thei. A then biakinn cu an sak theh zo, a then pawl cu sak rero lai an si, a then leh cu sak lai ding ih timlam aw rero lai an si. Lairawn lawng siloin, ram leng Europe khawmual lam ih um Laimi pawl khalin biakinn an lei, a thar an sak. Biakinn ruang-am pi dinsuak theinak dingah nasate’n kan zuam cio a si. A tlangpithu in, kan biakinn hi kan umnak runinnpi hnakih nasa zual deuh in kan sak theu. Leitlun sakhua zovek khalin, an biaknak inn cu a mawi theibik in an sak theh ko. Pathian kan biak khawmnak ding innpibik cu tum zet le tha zet a si ding khal a mawi in a tul zetmi a si fawn.

Phungki inn le puurang pawl, zin sak le thlang ih kan hmuh hnakin, biakinn le thinglamtah vaar kilkip ih kan hmuh cu thinlung a zangkhai ngaingai a si. Biakinn mawi le tha kan sak tikah, Pathian kan upat le kan sunlawihzia kan biakinn hmang in kan langter. Cun, thlawsuah kan don zia pawl tla kan langternak pakhat a si. Biakinn hin pumkhat ih biak khawmnak a hmuh sak ih, caan tinten Pathian betupawl an um khawmnak timi khal leitlun mi pawl hnen ah a khihhmuh sak a si.

Tlangkhawmnak ---------------

Biakinn ropi hnakin, a sung ih a khawmtu pawl ih thlarau nun a thupi sawn ringring. Cuhnakih thupi sawn cu, biakinn leng ih kan nun daan a si. Biakinn hi Pathian thangthatnak hmun pi siloin, mipi ton khawmnak hmunpi ah a cangsuak thei ruangah ralrin a tul. Lem cannak hmun pi khalah a cang thei mi a si. Biakinn cu, minung neihnak thazang le sumpai ih sakmi inn a si vekin, kan thlarau nun a cauh nini ah kan biakinn a sawn thei a si. Ram cangkang ahcun biakinn ropi sak hnakin, sak theh hnu ih kilkhawi hnatuan hi a khungkhai sawn riangri. Curuangah, san thar khawvel ah, ropitnak le thawmvang lennak hnakin, Pathian nung kaih hnget ih thlarau nun cak ter a thupi sawn deldel a si.

Kan biak ding mi le, kan sunlawih ding mi cu minung siloin, Pathian asi vekin, biakinn sung ah zo kan biak ding timi kan fiang a tul. Jesuh thangthat sunglawih ai’n mipi thusim le thlacam sak a ol te theu. Cuihlei ah, Jesuh zoh hnakin kawhhran mipi mithmai zoh khal a olte mi a si. Curuangah, biakinn pi sung ih kan sunlawih dingmi le kan biak ding mi ngaingai kan fiang ringring a tul. Cathianghlim ih biakinn ngaingai a timi kan taksa le thinlung kan cah ter hnu lawngah santhar biakinn pi sung ih khawm nuam kan ti thei lai ding.

Sakhua duhdawt sawn theinak leitlun ahhin, biakinn ropi hnakin Pathian sawn hi kan “San Thar Biakinn” si hram seh!