Lungthlitum Zamrang Zet In A Kim Maw!

Kum 7 lenglo liam ah Chinland Today Media hotu Salai Van Bawi Lian thawn India khawpi New Delhi, University Campus ah phunsang tlawngkai in inn pakhat ah kan rak um. Kan tlawngkai phah in Laimi thansohnak ding rori kan rak ruat ciamco. Mipi hrang hnatuan ding timi rori kan thinlung sungah a khat. Laimi hrang hna kan tuan ding timi rori nitin kan thisen a feh zat le kan thaw kan thaw zatin kan rel. A cu lai ahcun, kan phungsang tlawngkai, kum khatnak le kum hnihnak fang a si, neihmi le thiammi khal cu kan rak nei tam lo nan, thinlung sungah “Cirhti” put rero mi a um. Nitin a caang, nitin a puut.

Laimi duhdawt biktu vekin kan titi pawl, Laimi uktu vekih kan titi pawl, Laimi hrang ih nun tiang pe ding vek ih kan titi pawl, Laimi hi leitlun ih mifimbik ih cangsuak ding vekih kan titi pawl, Laimi hi Sersiamtu ih hril hleicemi vekih kan titi pawl, Aw! A tam tuk. Cubet ah, Laimi nun khawsak daan, san khat hnu san khat kan thlir sal, thusuhnak phunzakip kan tuah aw. Ziangruangah kan rak tuah lo? Ziangruangah kan neilo, ziangruangah kan duhlo, ziangruangah kan ngamlo, ziangruangah kan rak pe lo tivek pawl tla kan ruat ih kan cazirmi pawl thawn thluak cu a alh duh nasa. Laimi thu cu Laimi in kan rel tikah kan theibik cingcing ti’n kan titi cu a cem thei dahlo.

Kan ihkhun parih kan relmi, kan lungthlitum le saduhthah pawl kha, kan rel hnu kum 10 hman kim lo ah a tling vivo cih. Thimnak ah, phone vek thu tla kan rak rel, kan rel lai ahcun Nokia black and white kha a laar laifang a si. Kum ziat hman ti lo ah hmet hman tul lo tok men ih phone cang thei iPhone a suak. Laimi ih kan Media hman daan ding pawl tla kan rak titi mi tuisun ah siarcawk lo nepnawi Media kan nei ngaingai. Cuvek thotho in “International Relations” ram le ram khat pehtlaihawk daan pawl tla kan rel theu. Thimnak ah nikhat nini ah kan ram ah kan kir ding, ram tampi kan heel ding tivek pawl a kim cih lala. Thimnak ka bet sal dingih, Kawlram ah kan tlung dingih kan zirmi fimthiamnak pawl kan va zirh ding tivek pawl kha kan dung te ah kan rel nan, tuini ah a kim lala.

Kan sunmang, kan lungthlitum le kan saduhthah pawl a kim cak zia hi, kan ruah thluh man hlan ah tla a kim zikzik mi a um tivek khi a si. Ka ruat sal ih, kan lungthlitum relmi pawl, kan tumtahmi kan relmi pawl kha a kim taktak ih, ziangah cuhnak ih thuuk deuh le nasa deuh pawl tla kan rak rel ngah lo tiin thu titi men mi tla cu asinan ka duhham lala. Tumtahnak le sunmang pawl hitluk ih a kim cak ahcun tumtahnak le sunmang khal nasa sawn neih ding a si ko ual tiin thinlung I neih ter.