Hlan deuh ah, Pathian thu mal tete kan rak thei ih rundamnak thu kan theifiang tikah thuthangtha sim in khawte pakhat hnu pakhat arak feh ih, thuthangtha a simtu minung tampi kan rak um. Thuthangtha simtu tampi in, kan rak sim thok lai ah sermon thulu 3 kan nei ti’n tla an rak sim. Anmah a simtu lala hman in, thuthangtha felfaiten an rak theihfel hlan ah thuthangtha sim in khaw te pakhat hnu pakhat an rak hrawh. Minung tampi thinlung an rak hrawh siat phah a si. Kha lai caan ah Falam Bible sirhsan ih thuthangtha sim tampi an rak um hrimhrim ding. Thuthangtha sim a sual tinak siloin, a simtu in ziangtluk Pathian thutak a thei ngah, Pathian aw ziangtluk in a thei ngah timi a thupi sawn a si.
Thuthangtha sim hiar tuk ruangah sim ding a si cuang lo. Thusim ka hiar tuk lai ah caan ka ngah lo ti’n tla mi tampi in an sim theu. Kan Pathian thu cu reilote sung lawng minung thinlung ih caam vekin kan rel. Kan Caak le kan hiar sung lawng le kan duh ruangah thusim ding kan si lo. Thuthangtha sim ding cu Pathian ih thupek a si. Asinan, a theifel lotu cun ziang an sim ding! Tuisan ahcun sim hlan ah nunpi hmaisak a tul. Dungthluntu pawl khal an training rero, Jesuh hman an phatsan rero lawk. Cutlukin an rak training ta mi a si. Hmun kip ah Jesuh thuzirhnak an thlun, thlemnak an tong, theithiamlonak an nei, beidong in an um, Jesuh thu an sut rero, a caan caan le an tap. Cuvek hnu khalah Jesuh in thu a sim ter cih lo.
A dungthluntu pawl nasate’n a zirh hnu hman ah Thlarau hngak ta ding a zirh lai. Tuisuun Pathian thu thei ih thaisuun ah thusim thok tivek a ngah lo. Kan dung baihte ah kawhhran member ah a lut, a fel tuk ruangah kawhhran hruaitu ah tuan cih mai tivek thawn an bangaw. Kan neihlo mi, midang kan pe theilo. Kanmah hman ih kan theih lo mi, ziangtin kan thei ti’n kan sim ngam ding? Pathian thu duh cu a pawi lo, duh vekih um hi a pawi tuk. Laimi lakah Bible siar, thlacam, rawl-ul le thlarau mi vekih um, nun zohthim ding um lo lawlaw tampi kan thei ding. Farasi pawl tla khavek an rak si. Curuangah Laimi Pathian hnatuan kan duh tuk, thusim kan hiar tuk, kawhhran ah cangvaihnak kan tam tir tuk ahcun Farasi pawl kiangkap ah kan ding ve tinak a si.
Hivek ih a hrin suahmi cu kawhhran hruaitu 12 kan ti, dungthluntu zat tla kan ti. A tuantu ngaingai le minung 5 hman kimlo dahlo. Pathian in, nasa zetin a hna kan tuan maw a duh ding, asilole Pathian amah ih duhzawng tuah, Pathian thate ih biak? Minung hin Pathian hnatuan tum daan kan nei ringring mi hi a pawi tuk. Pathian in le kan duhdan silo in, a mai duh daan in, in tuan ter duh fawn. Cui’ thu pahnih ruangah kan nunnak a siat ringring. Kawhhran ah pe-aw zet cingin, nitin umhar zet, minung tampi kan um. Ziangah tile, kan rianmi pa ngaingai hnen ihsin ‘aw’ kan theih lo ruangah a si. Kan mai duhdan in kan feh.
Biakinn le pawlkom hnatuannak ih kan tel hlan ah, mahte caan hmaan te ih hmang theimi kan si a tul. Mah le mah, a kaihruai aw theimi kan si hmaisak a tul. John C. Maxwell, leitlun leadership cabu ngan tambik pa in a sim theu mi cu, midang kaihhruai hnakin, keimah le keimah kaihhruaiawk a harbik a ti. Mi tampi kawhhran le khawtlang ah hruaitu si, kan duh zet. Asinan, rei kan daih thei dahlo. Kan pawlkom, a ziam. Kan hiarnak a cem. A cem theimi zuamnak le hiarnak kan nei. Ziangahtile kanmah hnen ihsin a suakmi a si. Pathian hnen ihsin a ra mi a si ahcun a cem thei dahlo ding a si. Curuangah Pathian hnatuannak ih kan tel ding tikah kanmah ih phurnak men siloin, Pathian ih thudik langfiangternak ‘aw’ lole theihfiangnak kan ngah a tul a si.
-Uk Lian
Comments
Post a Comment