A Pa ih Cakuat A Fapa In Mithli Thawn A Siar

Kut thawn rori nganmi cakuat ka don netabiknak kum 12 lenglo a kim thlang. Ka pa in India ka um lai ah ca i kuat. Vahvaih lai caan arak si thawn, ka siar ih ka pa ih i seherh daan zia, i ngai daan zia pawl asinan pacang zetin um dingah, tha i peknakpawl ka siar tikah lungzuur in ka ṭap ko.

Ca i kuat mi kha, a ṭongkam thawn i sim men sehla kha tluk in ka lungzuur lo men ding. Asinan ca thawn i kuat tikah ziangtluk hmuar a nei, ziangtluk a sunglawi. Catlang tawite in minung thinlung sungah ziangtluk in thu a sim thei timi ka fiang sinsin.

Ka pa cu, pa laaw zet, tongkam ring zet le tongkam neem hmang dah tuk lo mi a si tikah ca te thawn a thinlung muril, a fapa hnen ih i kuat tikah a fapa hrang ahcun kekkuainak cakuat arak si. Ka pai’h cakuat ka siar laiah leitlun ah ruah theimi dang ka nei lo, ka pa hi ka duh in ka ngai tilobak sim ding ka nei lo. Ka pa hrang santlai lo vekin, ka pa hnen ah leiba nei bangin lungzuurnak in ka khat.  

Ka pa thawn, hla kan sak tlang, ka pa thawn kan biak-aw theu, hna khal kan rak tuan tlang dah asinan ka pa hnen ihsin tuitum hi a cakuat ka don a veikhatnak a si. Ziangahtile a hnen ihsin hmun hla ah ka feh a veikhatnak a si. Phone khalin I phone sehla kha tluk cun ka lungzuur lo men ding. Ka pa in I duhdawtnak I sim daan hi a fapa hrangah celh ding rual a si lo.  A cakuat hi ziangluk a thlum in a sunglawi!

A tui san ah kut thawn nganmi cakuat dong nawn lo minung tampi kan um ding ka zum. Santhar hin duhdawtnak a ti mal tum maw si tiah kan kiangkap nunphung ka zoh tikah ka lungleng sinsin ko. Ka pai cakuat ka donmi khal hi a netnak lam cakuat a si thei tiah lungzuurnak thotho a si. Ka pa in i duhdawtnak ca thawn i kuatmi hi a san sung ih a thilti thaatbik pakhat cu a si hrimhrim a si.