Tulai Santhar minopawl ih Pathian an thangthat duh daan cu kan theih cio bangin, Pathian thangthatnak ah awnmawi hi thupibik dinhmun le laibik dinhmun an luah ter a si. Cathianghlim khalin, awnmawi phunkim thawn Pathian thangthat ding cu a duh zetmi a si. Asinan, a cipciar cun in rak sim lo.
Santhar minopawlin Pathian an thangthat tikah an laam, an baan an phar, an mithli a luang, thinlung takin le thlarau thawn Pathian an thangthat ti’n an phuang aw. Tui dinhmun ah Laimi kawhhran tam zetah santhar Pathian biak daan kan ti dingih, tulai zetih Pathian thangthat daan “Praise & worship” timi hmin kengih Pathian thangthat kan uar zet vivo a si.
Asinan, kawhhran tampi ah buainak nasazet a suah ter a si. Himi ruangah mipi tamzet hlasak paih nawnlo tiangin an um phah a si. Kan “Praise & worship” hi thangthat lam siloin “Buainak & Huatnak” ah kan suah ter. Santhar mino pawlin tulai santhar vek in Pathian thangthat an duh, upapawl in le a hlan vek ten, thinlung le tharau sawn deuh ti’n an hnuk aw.
Tui dinhmun ah upapawlin santhar mino ih Pathian biak daan pawl hi a dik lo titu an tam zet a si. A diklo an ti lo hman ah an ngaih lo. Santhar mino pawlin le khuahkhirhnak hnuai ih um vek ih Pathian thangthat kan duh nawnlo, Pathian cu zalen zet le nuam zet ih biak ding an ti ve. Curuangah kan buainak cu Pathian biak daan “Dik” le “Diklo” timi sawn a si. Pathian biak daan ah a dik deuh le a dik deuh lo um in a lang ruangah ziangvek a si Pathian biak daan dik le hman kan timi, timi kan ruat khawm le a tha ding?
Thusuhnak
Upapawl in, ziangah santhar mino pawlih awnmawi thawn lawm zetih Pathian an thangthat daan ziangah kan hmu thei lo, ziangvek a si Pathian thangthat daan dik le hman kan ti mi?
Santhar mino pawl, ziangah kan thlarau don mi hi music lawm tharau a si maw, music tel lo in teh kan lawm thei lo maw si? Ziangah zoh mawi lole midang ih ngaih lo ding tiang in Pathian kan thangthat?
Pathian thangthatnak dik le hman hi ziangvek ciah a si?
Kei ka ruah dan ahcun Pathian kan thangtthat tik ahhin kan thinlung hi thupi bik tin ka ruat. Minung cu kan bangawk thluh Lo, curuangah, kan duh dan Le ruah dan tla a bangawk Lo. Curuangah Upapawl ih soiselnak Le huatnak ruangah upa pawl ih duhdan lawng in hla hruai a ttul Lo. Cun mino pawl khal in kan upapawl hi kan theih thiam a ttul, kan mah duhdan lawnglawng in hruai dan khal a silo. Curuangah, Ka sim duhmi cu, kan hlasak duhdan a bangawk lo thei asinan, a thupi bik hi cu kan thinlung takten kan sak Le sak Lo hi a thupi bik.
ReplyDeleteNa caa nganmi a ttha nasa!
A dang tla siar an nuam ngaingai.