Kan Hmin Hi Kan Sinak le Miphun Sinak Langtertu A Si

Kan hmin cu kan sinak a si. Kan hmin dunglam ah thuhla tampi a um. Umzia neiloin hmin kan pe aw dahlo. Laimi kan sivekin Lai hmin le hmin sullam nei lo zohman kan um lo. Thimnak ah, Hre Mang ti veteen Mirang hmin a silo ti kan fiang. Cuvek thotho in, Sianglianuk Kianghrol timi tla hi Japan hmin cu asi lo ti kan thei.

Van Tuah Piang timi hmin tla hi cu Laimi felfel a si ti a hmin in kan thei. Hi’h ruangah a si, kan hmin cu kan sinak le kan miphun sinak langtertubik a si kan ti theinak. Run Cung Mang tiin London newspaper ah siar ngah sehla, hivek hmin cu Laimi hmin a si tiin hmakhatte ah ka thei, thei ding a si. Kan hmin hi kan sinak le kan miphun sinak langtertu a si.

Kan nulepa, kan pilepu, unau sungkhat in Lai hmin mawi zet le sullam a nei mi hmin pawl in pe. Kan Lai hmin hi ziangah kan hmang uar lo ding! Kan sinak le kan miphun sinak langtertu a si ual. Sullam nei ih hmin pekmi, kan Lai hmin hnakih hmin mawi leitlun ah hmin dang uar ding a um maw si!

Kan Lai hmin mawi le sullam a nei mi hmin pawl hi Mirang hmin in kan phenh ter ding hi, a sian um lo tuk ee!

Christian hmin tiin Laimi pawlin kan hmin ah, David, Peter, Ruth, Hannah le Esther tivekin (nanmah te mirang hmin nan theih zat bet ko uh) Mirang hmin kan pe aw ciamco. HIvek hmin pawl hin kan Lai hmin pawl a khuh ih a then cu an Lai hmin hman an hlo thluh a si. Mirang ram kan thleng tikah kan Lai hmin cu dunglam ah taansan in, kan silonak Mirang hmin phuahcawp pe aw in kan ko aw uar ciamco bet.

Christian hmin tiih kan hmin pekawkmi hin kan sinak le miphun sinak tiang a hlo ter phah thei ding a va bang ve! Sersiamtu khalin mah le miphun sinak taan ih miphun dang sinak hmin pekawk cu a duh thei ding ka zum lo. Kan Mirang hmin uar, kan Christian hmin deu uar mi hin miphun pakhat hlohlnak lamzin ah in hruai sawn in ka thei. Ziangahtile, sinak cu hmin ihsin a thok.

Thimnak ah Jackie Chan tla hi Mirang hmi a pe aw thei tuk. Mirang hmin sak aw duh sehla, James, Henry tivek in maw kan ko zo men thei asinan a miphun sinak langertu dingah Jackie Chan a ti aw a si. Kan miphun hloh tuan kan duh lo asile kan hmin pekawk daan ihsin ralring thok sehla a that ka zum. Leitlun ah (Chinmi) Laimi cu miphun pakhat kan si vekin kan miphun pakhat sinak kan hmin pawl hi tan in miphun dang hmin kan uar duh ding maw si!

Mirang lakah Mirang hmin neilo cu kawhawk a harsa tivekin, na hmin ah Mirang hmin bet tu na si pang maw? Hmin ih a thupitzia na theih tik ahcun khua a tlai men siloin caan a rak cem zo men ding. Kan hmin ah “Zinghnam” tiin Mirang pawl hnen ah sim aw khal sehla, har le har lo in an lo ko thei tuk thotho ding a si.

Thaizing khalah leitlun ah Laimi pakhat cu a suak ding, Laimi siarcawk lo kan suak vivo lai ding. Cui’h a ra suak lai dingmi nau hmin pawl hrangah ziang hmin kan pek ding?

Aw, hmin……..