Pathian ih "Sal" Kan Si

Jesuh Khrih dungthluntu kan si ih Pathian ih rualpi kan si timi thu ka theifiang zet nan Pathian ih “sal” si ding cun veikhat te hman ka ruat aw dah lo.

Pathian hmai ahcun ka tangdor theibik tiangin ka tangdor ti’n ka ruat aw ko nan keimah hi Pathian ih sal pakhat vekin cu ka ruat aw dah hrimhrim lo. Ka ruahawkbik hman ah kei cu Pathian hmai ah mitlinglo ka si ti’n ka ruat aw. Asinan Pathian hrangah a “Sal” ka si ti’n thinlungput ka nei dah hrimhrim lo.

Kan tlawngah “Sal” timi thu ka ruah rero lai ah kan sayapa in “Mi zo khal thil pakhat khat ih sal kan si thluh” timi a sim ngah. Cumi ṭongfang cu ka thinlung sungah napin hna aṭuan. Thusuhnak a phunphun a suah ter. Mino khawm zan ah thuthangṭha sim ding ka si bet thawn “Sal” timi thuhla sim dingah Pathian in i sim timi fiangte’n ka  kai cih.

Caan tampi online ih hnaṭuan phah ka si ṭheu ruangah thil dang tuah man lo in online ah ka caan a cem ṭheu. Pathian ka biak ding tla, ṭhulh tahrat in online ih ka caan ka cem ter caan a tam ngaingai. Curuangah kei hi online ih “sal” ka si ti’n ka hmu aw suak. Silo malten, phone ih game lek ringring pawl cu phone ih sal an si ve thotho ti’n ka ruat lala. Minung cun ziang mi sal ah kan taang ti hman kan rak theihawk lo lai caan ah thil pakhat khat ih sal ah kan rak taang ṭheu timi ka theifiang.

A netnak ah kei hi Pathian ih sal ka si theilonak ding san ka thei lo tiin ka ruat aw lohli. Kan Bible sungah “Sal” timi a um maw ti’n ka hawl ciamco cih. Bible ka kau le ka thusim ding ka tuah phah cun “Pathian ih sal ka si” timi ka thinlung ah a khat ṭheh zo. Ka thinlung sung ih a khat bet mi cu Jesuh Khrih dungthluntu le Pathian ih rualpi men ka si nawn lo Pathian ih “Sal” rori ka si zo timi a khat.

“Sualnak ihsin nan luat ih tu ahcun Pathian ih “Sal” nan si zo” (Rom 6:22) timi ka siar ngah cu lungphannnak in ka khat, thil theih lo mi theih cu caw lau vekin ka um. Jesuh Khrih dungthluntu vek le tangdor tukih ka ruah awk mi kha “Sal” dinhmun thawn ka khaikhin awk tikah ka nundan le ka lungput ka thleng ṭul tuk zo timi ka thei aw.

Fala hmelṭha le zawnlung thu ka siar lala cumi nu cun “Kei cu Bawipa ih sal ka si” a ti aw lala (Luk 1:38). Paul ih cakuat pawl ka siar lala tikah Paul in a ṭong kam tampi ih a hman mi cu “Kei Bawipa Jesuh Khrih ih sal” (Rom 1:1) a timi pawl ka siar ngah lala.

Ka fiang tuk zo. Kei hi ziangdang sal hman ka si duh nawn lo Bawipa Pathian ih sal rori ka si duh. Ka ngainat tukmi leitlun thil tampi hrangah caan tampi ka pek duh nawn lo ding. Ziangah tile kei cu “Sal” taang ka si zo. Pathian hrangah sal hna ka ṭuan thlang ding timi ka fiang aw ngaingai zo.

Kum tampi zumtu ka si zo. Pathian thu tla mahtawk in ka thei ti’n ka ruat aw nan Pathian hrang ah “Sal” ka si thu cu ka thei aw dah lo. Ziangah tile “Sal” timi cu tangdornak hnakih niam sin dinhmun neitu a si. El theih lo, duh hril theih lo in Pathian hrangah nung ih hnaṭuantu ding ka si timi ka fiang sinsin.

Ruah ding:

1. Ziangmi sal na si?

2. Na sal tuannak ah na rinum tum maw?

3. Zianghrangah na nung?