Easter Sunday Maw "Rinhlel Sunday"?

Saam hla sung ah an rak ngan cia, Prophet pawl khalin an rak phuang cia, Moses daan bu sung khalah Jesuh thihnak neh in a thohsal ding timi thu a rak um thluh cia. Asinan, a caan a kim taktak tikah cuvekpawl cu an hngilh thluh ih rinhlelnak in an khat. 

Hebrew daan ahcun ‘ka ra kir sal ding’ timi langternak ah puante tivek an taan hrim theu. Jesuh khalin an tuamnak puante thlaan sungah a rak tan hrim ko nan, an culture tiang hivek caan ah an hngilh thluh. Ziangruangah an tuamnak puante a tan ti hman an ruat thei nawnlo.

Jesuh thawhsalnak cu nupinu pawl khalin an rak zum lawk lo, dungthluntupawl khalin an zum lo, khualtlawngpawl khalin an zum lo mipi tamzet khalin an zum lo. Asinan Jesuh Amah rori tham theih ding in dungthluntupawl hnen ih a lang hnu lawngah an zum thei (Luke 24).

Curuangah Jesuh a thawhsalnak ni Easter Sundy hi “Jesuh An Rinhlel Ni”, Asilole “Rinhlel Sunday” tiah ko sawn sehla a mil deuh sawn pei maw timi tiang ka ruat thlang.

Hruaitu kan nei asile hruaitu ih hruai daan vekin kan thlun ding mi asi. Jesuh ih thusim mi ringhleltu kan si ahcun ziangtin Jesuh dungthluntu kan si thei ding? Rinhlelnak thawn a thluntu kan si sawn ding.

“A si” a timi cu a si kan ti a tul ve. “A si ding” a timi cu a si ngaingai theu ruangah Jesuh kan rinhlelnak hi kan colhsan a tul.

Jesuh in “Ka thi ding ih ka tho sal ding ih cule, ka lo hruai sal ding” in ti mi lakah pakhat te a kim hrih lo. “Ka lo hruai sal ding” in timi, cumi teh khi-hlan dungthluntupawl bangin a caan a kim taktak le rinhlelnak thawn maw kan um lala ding?