Australia, Melbourne ih ka fehsuksonak ah Mirang le Midum suakthuan rual lam lengtlang ka hmuh tikah minit pakhat hrawng ka dingih ka zoh thlun ta hai ṭheu. Midum le Mirang duhdawt aw zet in thunuam rel in an pom aw, an capoh aw, kut an kai aw, an nuam tlang pawl ka hmuh tikah, leitlun remdaihnak hrang tuanvoneitu bik bangin ka rak lungawi thei emem a si.
Mirang le Midum cu an taksa rong khalah an dang aw ngaingai. An lungput le an nun duhdan khal a dangaw zet. Asinan tuisun ah rualrem ten kutkai aw in an lengtlang thei hmuh tikah hnuk a ulh duh ngaingai asi. Kei hnakin Sersiamtu a lungawi sawn ding ti cu ka thei ko nan, hitluk leitlun ah thil mawi hmuh nuam ka timi a um thei nawn pei maw!
Midum le Mirang pawl lawng siloin kanmah Asian minung pawl thawn khal an leng tlang ka hmu tam pi. Hivek ka hmuhton can ah zohman theihlo in, ka lungawinak mithli a luang ṭheu. “Bawipa himi hi na tumtah mi a si” ka ti ṭheu. Midang hrang ahcun hnihsuakza a si men thei, asinan ka thlarau hrangah a nuam in a ṭha mi a si.
Hivekih Midum le Mirang duhdawt aw ka hmuh ih ka lungawi thei ringring nak cu Midum le Mirang pawl ih hlan thuanthu malte ka theih ve ruangah teh a si sawn pei maw ti tiangin ka ruat aw. Asi lo, remdaihnak cu a mawi hrimhrim. Asi, duhdawtnak cu a mawi a si.
Comments
Post a Comment