Melbourne ahcun khawsung feh ding, hnatuan ding, tlawngkaipawl le poihai ih fehsuksonak ah oltlawngte’n tlangleng kan to thei. Bus, taxi le bulpak mawtaw thawn fehsukso khal kan tampi thotho. Tlangleng to ih toihvah hrimhrim nuam titu tla kan tam zet. Khaw cuan phah khal a remcang thei zet.
Zingpit hnatuan fehzawng, tlawng fehzawng ahcun tonak cuh aw siloin, ke ret nak ding te cuhaw ah kan tlio thi-that zik theu. Cuvek thotho in, zanlam hnatuan tlun caan le tlawngtum caan ahcun kan phuul nohnoh, tlangleng ih lut ngah lo cu thah ding tivek rorin tlangleng sungah kan ben aw ciamco theu.
A can le hnih a suak. Veikhat tla cu, station ka thlen hlan ah tlangleng ka to ding mi a thleng ciah ka hmu ih, he-le-mang-law tiin ka tlan, zingpit ka tho pek asi fawnih hmakhat te ah ka thaw thawt a cak ciamco ih ka bang timen silo, ka khur theh thei. Minit pakhat te ih ka tlai pang asile, nazikhuai rori ka hngah bet sal a tul ding ti ka theih ruangah hnuk cat zik ko ih ka tlannak khal arak si tho.
Ka dungah fala mawi nawn, uar duh nawn ih cei-aw, nasaten a ra tlan ve. Ka thinlungten a nih khal keimah vek can hmante ih hmang lo tiin ka mawhphun phah cun, ka tlangleng ticket ka paisabawm ta la phah in, hnok nawn in tlangleng sung cu ka lut ngah thei. Tlangleng sungah ka thawpi ka suah, napin le ka thaw ngamlo. Kum khat hrang ding ka tha cem theh vekin ka um.
Asinan, Melbourne tlangleng to nuam ka ti zet nak cu, Vairam le kan ram vek siloin, zohman be aw celcel, thawmvang nei celcel an um lemlo, mahte casiar, music ngai tivek a si. Mi zoh ciamco khal an um lo ruangah nuam ka ti hleice. Vairam ka um lai, Kalapawl thawn tlangleng kan to tlang cu suntam riak zik vek kan si. Miphun cangkang le cangkang lo cu an rak tan aw tuk ee.
Tlangleng to tinten, ka hmuh ringring mi thil a um. Hmuh tengteng dingmi thil khal a si. Mitsing rero khal sehla ka hmu thotho ding tlukih ka ruahmi lang fiang emem mi thil a si. Cucu, tlangleng thlalang parah misual pawlih an suai mi zuk baal riai-riai pawl a si. Tlangleng ka to tam thlang nan tlangleng pakhat hman thlalang fai vervi te ka hmuh mi a um hrih lo titluk a si. Misualpawl kut tuarin bal sia men hman asilo, duhdah takin casia le thuphan hlir an ngan. Rawt fai a thei nawn fawn lo.
Mah phur rerotu tlangleng rori duat cang thiamlo ih an kut thak diriamnak men ih an hman cu nun sim tul an si. Palik nu ka sut ih, ziangah himi zuk suai tupawl nan kai theh lo ka ti. “CCTV hi kan on ringring lo. Cun, ziangtik can ah an suai ti tla theih a har zet” in ti. Nazi 24 sung rori CCTV on thei ding cun data khal an nei daih lo a si bik ding ka zum.
Kan ram ih kuva ti, kilkip ih kan phuut zelzel vek, India ram hmun kip ih zun-ek an tlan vek thotho in, Melbourne khalah an tlangleng pawl cu suakthuan pawlih kut tuarin hmasi thawn an khat ve. Misual cungcuang deuh pawl tla cu tlangleng par lawng siloin an taksa par tiangah ralthabik, mihuai senbik le uar duh ah tattoo tuksumza an suai bet bet.
Kan rualpa pakhat khal a taksa parah tattoo lem umzia nei lo a rak suai ngah ve. Thusuhnak kan tuah tam tukih malh a duh nan a malh thei nawnlo. Melbourne ih tlangleng thlalang ih an nganmi pawl tla malh an duh sal theu nan, tuini tiang malh a theih nawn lo. Thingkung kan sahnak khal kumkhua in hmasi a neih ta vekin, ziangkim parih kut kan thlak mi cu hmuh thei le theilo in hmasi le hliamhma an rak nei ringring.
Comments
Post a Comment