Melbourne Nikhua

Melbourne  thuhla an rel tambikmi cu a boruak le a nikhua hi a si. Zingpit ah nikhua a ṭha zetih, suun padir ah ruah a suur vukvi ṭheu. Cun, zanlamah nisa emem in a um lala. Nikhat sungah  thlataang, ṭhaal le fuur a thleng ṭheu. Curuangah Melbourne ih um hi nuam titu le nuamlo titu kan tam zet. Kei cun, hlum tuk, dai tuk “tuk” tivek ka tuar theilo ruangah boruak thlengawk rero mi hi nuam ka ti zet.

Melbourne ahcun Christmas kan timi tla hi ṭhaal nisa senheng ah kan hmang  ṭheu ih, “tuu khalpawl, khaw dai zaan” tivek hla kan sak tikah khawhlum aluar cuang vekin ka thei. A tawi zawng cun Christmas caan ih khawhlum hi cu, a kaih lemlo.

Cun, Mirang pawl mizia ṭhatzet lakih ka uar lemlomi pakhat cu venghnen thawn nelawk lo mi hi har ka ti. Lai lam vekin, “Hmuansak pa, nan tho ṭha maw?” tiin auh aw luarlo sehla ka duh ṭheu nan cuvekih nelawk hi an nunphung a si lemlo hmang.Tahṭhimnakah tui kan hmuansakpa le hmuan thlangpa hi an ihnak ah an thaw rak cem pang sehla a thi ti theiloin ni ziangzat tiang kan um ding ti khal ka ruat baan lo. Cuvek nunphung lakih Laimi kan ṭhanglian vivo ding hi seherhza kan si.

Khawpi ih um hi a caancaan ahcun ka diriam theilo. Cule, kan mino pawl tla hi a caan le ka zang an fak. Mirang pawl bangin an thuam awk le, “Na luarkai” kan tiih an ceiawk lo le “Na tulai lo” kan ti lala ih umngaihnak teh an thei pei maw! A tawk fangih um cu thiam a har lala fawn. Zu in pa in teh a tawkcin theilo in si lo maw rii tukin a rak in pang ṭheu!

A cemnak ah Melbourne nikhua thu ah lo luhpi sal sehla, tui ca ka ngan tiang hi fuur vekin ruah a sur lala . Cunah, Melbourne ih um hi nitin “Ralrinnak’ zir vekin ka ruat aw thlang.  Zingpitih sisuak eng mawi zet a lang khalle, nikhua a ṭha ding tiah zum ngam asilo, zanglam ah ziang a cang ding ti kan thei lo.