Ka Pa Cu

“Ka pa asinak taktak le amah ngaingai hi ka thei dah lo ding”- Eminem

Thlisia a hran ih nimthla a kau zohzoh ih khua a riit ahcun ka pai hnen ah ka tlan!

Veikhat cu ka damlo ih ka pa in “Damlo ka ning” in tiih ka dam cih. Veikhat lala cu ka pa nih, napin i thawi ih ka thihbum lawlaw, cule a thinhartuk ti ka thei ih nuam tete in ka nung sal. Veikhat thotho ah ka pa nih ka taw i thawi tum ti ka thei ih ka rak kham ngah, cule “Kham hlah, napin ka lo thawi ding” in ti ih ka kham sal lo. Veikhat lala cu ka tap ringring ih sangkate ihsin i thlak tum, cule ka tap duh nawnlo lemlo.

Angki lawngin zaute ah a to ih a rualpi pawl thawn thu an rel cu, an aw ring kan venghnen pawlin ralpi veithumnak a thleng ah an ruat theu. A rualpipawl khal an aw a ring. Ka nu a ra suak dingih “Nan aw sup deuh uh” a ra ti ding. A ti sung lawng kha an ngai ding.

Veikhat cu ka pa ka phone ih ‘Ka lungleng ka lo ngai’ ka tiih ‘Lunglen le ngaiawk caan asi nawn lo ramdang feh zuamawk san a si’ in rak ti. ‘Inn ah um awla ziang na tuah cuang ding’ i rak ti. Cule ka pa cu a thinheng in napin mi a kawk hmanah minit 5 hnu ah ‘Na thinaa maw, mitu ih ka lo kawk kha’ tiin a thindai hnu ah mi a sut sal theu.

A hnuai  ih catlang tawite hin ka pai sinak thenkhat a lo sim ding…

Na kuakfawp cawl ding cu kan ngaingam lo. Na khaan thei lo ti kan thei. Na awkam hraang khal thlengaw ngaingai ding cun kan lo siang lo. 

Na mawhphurh le na phurit ruangah thintawi pa kan lo ti. Mi seherh ih thucah na hman ruangah phunciar pa kan lo ti. Thudik na duh ruangah mi-he pa kan lo ti bet.

Kan hrangah tlang khat hnu tlang khat, fing khat hnu fing khat na thleng. Kan inn le lo cu na thazang an si. In kilhim dingah kiosa pawl hmai ah na ding ngam. 

Na fa le te hrangah sunzan, thihnak le nunnak ti khal na thei thiamlo. In duhdawtnak le in zawnruahnak ruangah tuini tiang na duhdawtnak ka ringhlel dah lo. Ka nu thawn khal, mikhalin  fa an nei cio, hivek  lawmlam ih kan fa ruah hi a luar tuk pang maw an ti aw theu ka thei.

Tuini tiang ka pa cu  rampi thurawn asi lo nan, kan sungkua ih kan ziangkim a si. Ka pa hin pacangtha si dingah le nutling tha si dingah i rak zirh ngah riai.