A Fanu Pasal Neih Ih A Pai Thusim Mi

Neihawknak puai hmangtu mipi hmai ah a fanu neihsun kut kai phah in le a fanu ih pasal ding mopa hmai zoh phah in hitin a sim….

Bawipa, fanu kan ṭul, fanu in pe aw tiah thla ka cam.
Fanu duhnung te in pe ngaingai.
Ka cawi ih “Bawipa a nu vek rorin tuah aw” ka ti.
Cule, a nu vek ih fel ah a tuah ngaingai.
Mikip ih duhmi, mi ngainaa, mihlim thei emem a si.

Ka lungkim tawklo ih “Bawipa, keimah a pa vek rorin tuah aw” ka ti.
Cule Pathian in keimah vek ah a tuah.
Lo khal a feh, zanthing khal a cek, lei khal a let. Tlangkip a hrawh.

Cule thla ka cam sal “Bawipa ka fanu na ser daan a tawk hrih lo” ka ti.
Curuangah nangmah vek ciah “Pathian” ah tuah aw ka ti.
Cule ka fanu cu Pathian ah a cang.

Mipi riantu ah a tuah, zovek minung khal duhdawtnak thawn a zoh thei.
A nunnak, midang hrang ah a hlan.
Vanmi vek a siih mithi tiang a kai tho ko.
Hnukcat zik, thaw netabik thaw pawl tiang a pom.
Ziangkim tuar ko seh “Jesuh duhdawtnak” a langter ka ti.

Ramkip le hmun kip tlang sang par tiang a kai.
Asinan, ka lungkim tawk cung lo ih thla ka cam sal.
Bawipa ka fanu lungawi in tuah aw ka ti.
Cule “Nangmah” hi a lo tawng.
Tuini vekih a lungawi hmuihmel ka hmu dah lo.
Ziangtluk a lo duhdawt!

Ka neihsun, ka lo pek thei mi lakih ṭhabik ka lo pe thlang ding.
Curuangah ka lo pek hlanah thucah duh mi ka nei.
Ka fanu Pathian thawn hnaṭuan tlang ding cu a har zet ding.
Ka fanu hi pitling dingah Kei, a Nu le Pathian kan ṭang a si.

Zohtlak lo tiang ih a damlo hmanah a kiang nai ah umpi ko aw.
Kan seherh vekin hlim le lungawi in um ter ringring hram aw.
Kawk le awkam sang a duh lo ih na theithiam ding ka duh.
Cun, harsatnak a tuar thup mi khal relopawl a si ti theih sak aw.

Kan Lalfanu lungman khung bangih hlu cu na kut ah ka hlan ding.
Monu ih pa hi thu in cah tam tuk tiah ruat hram hlah aw,
Ka ziangkim a si ih ka ziangkim lo pe ding ka si ruangah a si.
Ziangtluk ka ui, ziangah hi zat thu ka lo cah ti na thei hrih lo ding.
Tu ah na thei hrimhrim lo ding. Na theih hrih lo ding!

A netnak ah kan Maakpa duhdawt zet mi,
Ka bet hrih ding. Tui ka thurelmi pawl hi na kaai ban hrih lo ding ka zum.
Fanu tla na nei ve leh ding ih cui caan ah tui ka thusimmi pawl na fiang lai ding.
Ka fanu hi hlim le nuam zetin rak ret hram aw. Harsat a tuar caan a tam zo.
A nu cu tuini puai khalah a ra suak ngamlo, mithli thawn  a khat ding a thei cia.

Tu ahcun ka fanu si na cingin na hnenah ka ziangkim kan siangpahrangnu ka lo pe.

An makpa cun Monu ih pa a pom ih a mithli a luang ko.

Laknak hram: Wayne Parker le midangdang ruahnak thawn kom.