Dr. Za Hlei Thang le Kan Thil Thlirdaan Hi Rem A Ṭuul!

Hlavang ih thu theihmi le, hmun le hmun ih thutheihmi cu a kaar arak hla aw tuk ngai! Kan Chin-mi lakah thuhla kimcang theilo, rel sinmi le simsawngmi asilo zawngih sim le ngan hmang tamzet hmuh ding a um.

Tahṭhimnakah CNF thuhla le Ramsung Chin Party pawl thuhla fiang le kimcangih kan theihlomi mai ruahnakih ngan le sim kan um ṭheu. Cuvek thotho in, pawlkom pakhat sung thu, kawhhran pakhat sung thu, midang innsang thuhla tiangin kan theih fellomi mai zumnakih sim kan um phahphah. Amahbelte cu, kan theihfelmi cu kan theihdaan vekin sim ding kha ṭih ding asilo, cuvek thotho in kan theihlomi cu “Ka theilo” ti ding khal ningzah ding a si lo.

Dr. Za Hlei Thang cu Melbourne, Australia arat laiah a mai kaa rori dawngin ka rak kom ve. Nauhak in a pa a duhduh thu a suh bangin karak sut. Thudik lawnglawng i sim khal ka ti ngamlo, a diklo lawnglawng I sim khal ka ti ngam cuang lo. Melbourne ih Chin community hruaitu dangdang le kawhhran pastorpawl tiangin an rak kom cio ih thusuhnak tla an rak nei fingfing.

Bulpak ka thusuhnak le midangpawl an suhmi a lehnakpawl ka ngai tikah Pu Za Hlei Thang kan rak hmuhdaan le ruahdaanpawl ava diklo em ka ti. Kan rak theih tamzetmi cu, Pu Za Hlei Thang, CNF president a ṭuan, ziangmi si a tuah suak, sinak a duh ruangah a lut, asilole bumnak a theithiam lo tivekih relsawngmi kan rak thei ṭheu.

Amah hi email hmang le duhvekih biak pop a theihlo ruangah a thuhla kan theihdaan hi a dang cio ding ka zum. Amah hi mipi relsiatnak ngai pawimawh le thiamthu rel duhzet sisehla cu group mail le hmun dangdang ah a nganca kan hmu ṭheu ding ka zum. Asinan, a thuken pakhatih ka ruahmi cu ‘Thudik cu nuam tete in a lang ding’ tihi a si in ka thei.

Curuangah, ziangah diklo zetzetih an lo theihnak le an lo simsiatnakpawl letsal loin daite’n na um san men ka ti tikah, malte a hni. “Si ee ka fehnakpawl ahcun ka simfiang ko ih duhvekin IT ka hmang theilo ruangah tla a si” tiah in sim. Putar kum 60 luan zo in sinak duh ruang menah president dinhmun duh in hramlak khawdai lakah cun ka um paih dingah in zum maw timi a thusuhnak tla kha san daan ding a harzet. Cun, a tu baihte ihsin politics lam join vekih kan theih laiah Yangon phungsang tlawng a kai laiih spy vekih a rak cangvaih daan pawl a rel tikah mipi ṭhenkhatih an demnak le an simsiatnak hi kei cun a dik thluh lo tiin ka hmu.

Kanmah lakah Dr. Za Hlei Thang na thuhla hivekin an lo relih a dik ngai maw tiin mi paziatin a hnenah thusuhnak kan thlen ding timi tla suhawk tlak a si. Cun, mipi pawl hin ziangtik tiang a si, simsawng mi le thuhla sirhsan ding um lo kan zum vivo lai ding timi tla suhawktlak zetmi a si thotho. Cutin, khatin an sim tihnakin, ziangruangah an simih a dik maw timi hawl thiam ih zohfelthiam mipi lakah kan tam asi ahcun ṭhansohnak karbak pakhatin hmai kan nawr tiknak a si ding.

Abraham Lincoln tla, salpawl zalennak a pe ih tawngpa suah in (vei le khat ah) a suah ih ruangah tuini tiang midum pawl torhmawh in a um phah vekin, fel tukih kan ruahmi le dikzetih kan ruahmi tla an diklonak thei ko in hliakhlainak nei sawn ding kan si. A diklo an ti celcel laiah a diknak rak hmu thiam thei ding ko rak zingzawi ding kan si. An ti- an ti, tivekmen ah rak hawi lua-lo ding san a si nawnlo. Tuisan cu ziangtin na prove thei ding timi san ah kan thleng zo. Na theihnak kha a dikzia na simfiangnak lo bawmtu ding na neihlo ahcun thudik na simmi kan zum in kan zumlo thei a si.