HLA IH HMUAR NEIHZIA

Mai Sung Tin Par

Bualrawn sungih bawhlung sittu hnakin a lengih rak zohtupawl an thiamsawn tibangin awnmawi le hla ngai ṭheutu dinhmun in “Hla ih Hmuar Neihzia” ka theihdaan le midangih an rak simdaan malte ngan lang ve hrimhrim ka tum. Hla fingkhat te tal zoh loin sakthiam sehla, ‘Hla ka duh’ tiah ka ti aw ngam ve ding nan tuini tiang hla fingkhat te tal by-heart in ka sak thei lo tikah ‘Hla ka duh, Awnmawi ka uar’ tiah ka phuangaw ngam lemlo.

Asinan, mipi lakah thiambik vekih rak saktu cu ka si ve ringring. Kan Lai hlasakthiam, Salai Sun Ceu,

Salai Ṭuan Ling Thang, Solomon Menrihai, Sung Tin Par, Mai Makim le Susan, Pathian thangṭhatnak hlasak thiam Mai Far Men Par pawlih hlasakmi ka zaawn ve tikah anmah hnakin ka aw a mawi deuh in ka thei aw nan keimahte ka sak sal tikah ṭingṭang key diklo vekin ka aw a dik thei lo. Hla le awnmawi lam ih ka leitlun nun ka ruahsal tikah thiamlo le theilo cingte khalin thil hi arak ngainat a theih ve ti ka fiang. Keimah vek kan Laimi ah kan tamzet men ding. Thei ngaingai lo theibik bangin rel thiam. Japan doraal thu mi relpi thei ringring tivek tampi kan um dingah ka zum. Ziangasikhalle, zo cio in rel theinak kan nei tiin kan thu hmaihruai kan khar tum hnik ke.

Kan pupa san ihsin phaileng hla an rak sak thok daan le khuatehla an rak sam thok daan pawl ihsi cun ka ngan thei lo ding. Cun, leitlun duhdawtnak hla le Pathian thangṭhatnak hla tizawng khalin ka ṭhen hran tum lo.  Hla a si mi hmuahhmuah ih hmuar neihzia sawn ngan am ka duh. Pu Hlawn Hmung le Salai Cung Aung vekin  awnmawi lam thuhla ka zirlo ruangah a muril ngaingai tiang cu ka phorhsuak thei ding ka zum lo. Asinan, hla ih a hmuar neihzia le a kiangkap te talah lo toihpi thei ka tum thotho. 

Solomon Menrihai le Hu Lian

Hla timi hi a tlangpithu in, thu in a daih nawnlo tikah hla a suak. Hla cu thinlung muril le sawngtuahnak ihsi ra suak mi a si. Thinsen le thlarau thawn pehawknak an nei. Hla cu feeling mi a taktak ih suak dingih ngan lang hnu ah sam thei dingah a thluk mawizetih tuah a si ṭheu. Hla thluk mawi cu hla mawi tiah kan duh zet ṭheu. A thluk a mawi ih a hla thu a ṭhat sinsin ahcun kan duh hleihlei. Hla mawi le hla ṭha a seem theinak ding ahcun awlsam te ih phuah le ngan a theih lo. Hla tamzet cu lungawituk caan le riahsiatbik caan pawlah tla an phuah.  Hla phuahthiampawl cun awlsamte’n an phuah thiam ih awlte’n hla thu le a thluk pawl an dawng thei. Cucu hla phuah talent an dawn ruangah khal a si. Asinan, hla tamsawn cu awlsamte ih phuah le ngan a theih lo. 

Mi pakhat in hla a phuah tikah umzia nei in a phuah ih a phuahnak sullam khal a um ringring. Tahthimnakah, It Is Well With My Soul “Ka thlarau hrang a ṭha” timi phuahtu Horatio Spafford ih nun zalam tluan kha, lawyer a siih a neihsia khawlnak innpi a kaang ral thluh, pasiatnak in a man ih paam na men lo a tawng. Rethei vansanglam in a um. A nupi Anna le a fanu pali pawl hrang ruatin ram nuam deuh pan in Atlantic tipitlun ih a fehter laifangah ruahlopin an lawng a cangsualih a nupi Anna siarlo a fanu pali cu tisungah an pil hlo thluh. A nupi Anna cun hitin ca a rak kuat "Saved alon . . .", ‘Kei lawng ka luat’ tiah ca tawite a rak kuat. Spafford cu umngaihnak theilo, pum naa tuar theilo bangin a ril a lawk thuul. 

Asinan, Pathian thu thawn a hnemaw ih ka thlaurau hrang a ṭha timi hla a nganmmi Philip Bliss cun mawi hnai takin a rem sak mi cu leitlun zumtu siarcawklo pawlih hlafing sunglawibik pakhat ah a cangsuak. Cuvek thotho in Rev. Khaw Lian Uk in “In hruai ding” Len Hai khua ih Pathian hna a tuan lai ah a rak phuah. Duh kimlonak leitlun kan suahsan hnu ah kan lungawinak a kim ding timi lungawinak le ruahsannak hla a rak phuah ve. Nupi nu rual to khawm ih mirel supso vek men asilo, hla phuah cu ruah nguarngo a ṭuul. Kan hla phuahmi dingmi ah cangin kanmah khal hla vek ah cangin hla ih thiltitheinak kan ruah thei a ṭul ruangah hla phuah cu thil menmen a silo vekin a huham le a hmuar khal thil dang pawl hnakin a naa hleice a si.  

Mai Makim

Hla hi athupit ruangah ‘Hla maw thupi, asilole thu sawn’ titiangin thucuhawknak a suak. Leitlun ram hmuahhmuah in kan ti mai ding, ramhla kan nei thluh. Kan ni Myanmar ram khalin ram hla mawizet kan nei. A siarih siar theih asinan, a sakin kan sak lo ahcun kan diriam lo a si ding ka zum. Phunruk tlawngca ka zir tiang kha kan ram thantar hnuaiah fekzetin ka dingih ka rualpipawl thawn kan ram hla mawizet kan sam ve nasa. Ka diriam zet. Kan ramhla kan sak durdo cun kan ram hrang a fate bikin a tumbik tiang thih kan ngam mai. Cuvek asi ko hla ih hmur theizia cu! Hla cu hnemawknak ding khalah a ṭha kan tiih riahsia tohpinak hmunah khawhar hla khuangte le khuangpi thawn, a tum thiamzet pawlin an tum ih hla neemzet ti diahdo ten kan sak cu lunglen a zual sawn lo maw tiin ka ruah caan a tam. Khawhar kan hnem kan tiih hla thawn, kan va hnem aw khi an lunglen kan ti zual sawn dingah ka ruat ṭheu. Cutin, thlanmual tiang hla thawn kan thlah aw liam theu. Hla hi kan ziangkim ah kan hmang kan ti thei lala. 

Hla cun hmuar a nei ih a phunphun in riahsiatnak thinlung khal a neem zawgten a hnem thei thotho. Mai Makim in Sala Ralṭha timi aw fiang tuk fahran in a sak tla kha cu ngai ka khawp lo riai a si. A hla thu pakhat hnu pakhat hliakhlai sehla a tha tukaw kan ti rero ding cuihleiah mawitukin a sak thei cu ka thinsen zungzam in a tuar lo bik a si. BJ ih Lasi fala pawl hla ka ngai tla cu, a hla thu ka zawn, amah hnakih ring sawnin ka sak ve. Ka lu ka su. Diriam tawk loin ka kiangih cabuai pawl ka cuum phah. Ka kut in drum ka tum thuul. Hla hi cun hmuar a va nei tak em. 

Khat leizawngin kan thlirsal asile, hla cun mi a lungphangter ding asilo. Asinan tulai santhar hla pawl hi malte ngai harsa ka ti. A caan le ka lungphuu in a neh lo zik ṭheu. Rap hlapawl hi kei ka hrang ahcun a mawi ngaingai thei hrih lo. Ṭhangthar nonawn pawlin an sak tuk ruangah hla ṭha a si ding tiin ka ngai ṭheu nan, hla tiin ka pomrem thei lem lo. Hla cu thu a si thei lo. Rap pawl cu hla an sak siloin thu an sak vek khi a si. Mi kawk hla, mi lungphang ter hla, cokhawk, tongkam sia hla, thu-sak hla tiin kei cun simfiangnak ka pe. Pathian hla tla tampin an rap tum betbet. Mawi diahdo te ih kan rap thei ngai lo ahcun kan Pathian hla pawl kan borhbah ter ding ti phan a um lamlam. Amah lawngte a mawizawng te ih kan rap thei ahcun a pawi emem lo men ding. 

Salai Cung Aung

David khal a nauhak te ihsin a tuu khal phah in hla a rak sak. A rap ciamco ding ka zum lo. Saul Siangpahrang hmai a sak khalah hla nemte a si dingah ka zum ziangah tile hla umzia nei le hla hmuar nei a si ruangah Saul Siangpahrang sungih thlarausia  khan a duh lo ti kan thei. Leitlun siangpahrang hmuahhmuah lakah fimnakih langsarbik le cungcuangbik Solomon Siangpahrang cun hla hi a thupit ve zetih zumtu pawlih Bible sungah thupizetin tuini tiang a rak ther ngah. Solomon ih hla pawl zoh tikah mi a neh emem ih tulai ṭong cun sexy zetzet khal a rak tamzet fawn. Peter le Silas khal zanvar ten thlacamnak in can an hmang nan, hla an sak ciah in Pathian um men theiloin thawnginn sangka pawl tla a ong terih an kut khihnak thir cikcinpawl tla a thlawng thluh ti kan thei. Jesuh khal Matthew 26:30 ah a dungthluntupawl thawn hlasakin Olive tlanglam pan in an feh ti kan hmu thei. Pathian cun thu thawn in thangṭhat uh tihnakin awnmawi le hla thawn in thangṭhat uh tiah vei tampi cathianghlim sungah kan hmu. 

Tulai santhar mino tamsawn zikte cu zingpit ihsin zaan an mol duahdo tiang hla an ngai thei. Zing thawh veten mobile ringtone ah an ret, tikholh phah ah an ngai, thuam tuah phah ah an ngai, lam feh phah ah an ngai. Cutin, mino le awnmawi hi an thluahaw tamzet kan hmu thei. Leitlun thuthang langsarzet BBC ah hla kan ngai phah in dawr thil kan lei tikah kan hla ngaimi ih zirin kan lei a mal in kan lei tam thei tiah a rak ngan dah. Dawr kan feh tikah awnmawi, mawi diahdo te an rak suah ahcun kan thinlung a hahdam. Dawr dang kan va feh ah hla rangzet an rak suah lala ih kan thisen a sang dukdi cih ih lei tumlo mi tiang kan lei phah a si. A hrimhrim in, rock hlasaktu pawl kan zoh tikah an thuamawk daan a rock star tawp mai. An sam an ti kir, jean bawngbi tlek an hruk, an taksa ah tatto an suai. Ṭhi  danglam hleice an orh, hnakhaih a phunphun an tuah. Cutin, hlasak thiam khalah an thuamawk dan a zawngaw lo celcel.  

Curuangah, Pathian hla nem te ngai tam pawlih nun cu rock hla ngai uarpawl hnakin danglamnak an nei ding. Hla nem ngai uar le hla rangzet ngai uarpawlih mizia le thuamhnaw hruk daan khal a danglam hrimhrim ding cucu hla ih a hmuar neihnak pakhat a si lala. Hla cun kan nun lam in hruai thei. Hla cun kan nun in rem ṭha thei rualrualin in siatsuah thei. Mi aa ṭongthiamlo, kuk thawn an biakih an theihthiam bangin, hlasak khal hi leitlun ram zovek khalin sak sehla kan theihthiampi. Hla uartupawl cun hla cu, leitlun minung pawl kan biakawknak ṭong phunkhat, hla cu kan nunnak hrang tidai le cite vek, hla cun kan harsatnak in zangkai ter, hla cun hmun khat te ah in ko khawm thei, hla cun sangsin ah thlarau danglam zet thawn mi a khaisang thei, hla cun thuruah thiamnak mi a pe tiin a phunphun in an rak simfiang. Kan Chin hla pawl khal nun rem vohvoh thei ding le nunnak ih thusim vohvoh thei ding tampi a suah ding ka duh zet.