Tulai Kan Buaipi Mi Yangoon Bible Tlawngta Buai Ka Hmuh Dan

A hnuai ih hmuhdaan hi a ngantu ih hmuhdan le thlirdan a si.

Salai Uk Lian

2006 kum ah Falam Pawlpi Yangon hohanak in Chin Champion League Football leknak a um. Pu No Sum Bible tlawngta le IBA (Tedim) pawlin semifinal an lek. Pu No Sum tlawngta (Kawr sen hruh) pawlin an neh lo ih, IBA pawl cu an nam ciamco. Youtube ah film zoh ding a um, link ah Click aw le!! lak serious tuk hlah aw maw!!

Mr Fidel

A tlun ih catluan malte hi Chin Group mail le facebook tiangah langter a si zo ruangah ka thlirnak le ka hmuh ve daan malte tarlang ka duh.

Hi, thilcangmi Bible tlawngta le tlawngta buairawn laifangih buai vutvo ih thawiaw pawl Youtube ih tar asi vete’n ka rak zoh ve ih, cunah minung 100 hmanin an rak zoh lo. Asinan, tuni ah ka zoh salih zohtu 1,917 a rak nei zo. Himi zawn ah buainaklam kan ngaihsakzia hi a lang thei. Ziangah tile buainak cu thildang hnakin a thupit ruangah tla a si thei. Cule, tui kan zoh rero mi zuknung hi 2006 ih thilthleng zo mi a si. Kum 6 a liam zo timi tla rak theilo ih rak aukio tla kan um. Asinan, Salai Fidel cun Zawlcity timi hmin hmangin tui baihte February 23, 2012 ahkhan a rak upload sawn a si.

Himi fakselnak ka tuah hlante ah Rihli Group Mail ih mipi commenttu pawl ka siarih mi 42 lenglo an kim zo. Facebook lam le a Youtube lala ih comment tu pawl thawn cun mi zarual kan kim zo dingah ka zum. Ziangruangah minit 4 le sekan 20 video clip te ah Chin-mi tampi kan buai timi zamrang ten ka ruat. A ṭhen cun a tartu Fidel tla kan mawhtluk bet. Ziangruangah mipi hmai ih langter ngamlo ding mi le hminsiatnak cu bualrawn rori ah an rak tuah ngam zo hrimhrim! Video uploaded tu cun a um cia a langter men fang a si, tizawng khalin thlir le laak a theih ve.

Asinan, Fidel hin a tlawng hminsiat zawngin maw, tlawngta pawl hminsiat zawngin, zirhtu le thuneitu pawl siannak telloin thil a tuahmi a um pang asi ahcun amah le a pholang mi pawl karlak thil a si. Comment pawl siar tikah hivekih buainak a suahnak san hi mangbangin, hruaitu an nei lo maw, team spirit an nei lo, lehnak ah tel nawn hlah hai seh, ningzakza, kan mualpho tipawl le Bible tlawngkai cu an dan tivek a phunphun hmuh ding a tam.

Ngaingaite cun miphun tenau kan si ruangah hivekin kan buai asi hranpa lo. World Cup tla, mikip thlirmi a si ih, an buai maw? Thahawknak tiang an thlen ve ko. International bawhlungsit zuamawknak khalah leksal theilo in buainak ruangah cawlhsan can tampi a um ko. Ram khat le ram khat, ralsanawknak tiang a suak theu ko. Cule, Bible tlawngta pawl kan thlirdaan khal a danglam deuh. Zoh ṭhimtlak si ding cu an ṭuanvo, kan sakhuanak zawng khalin zohṭhimtlak ding cu an si ko nan, tui a comment tu pawl vekin an thintawi in a thinsau ve thei timi tla kan ruah tel ding a thupi. Minung thinheng thei ciocio mawhthlukaw ding cu kan si lemlo lo.

Ziangasikhalle, amizan lam ah tlawngta hotu lam khalin thucah a rak famkim lo a si thei. Bang hnu ah thinhengnak suakin an supaw theilo khal a si thei. Bible tlawngta kan timi tla an hngilh aw lawk tla a si thei. Anmah a lektu hrangah buainak tlak ngaingai tla a si thei. Buai ding hrimhrim thil tla a si thei ruangah zo cio khalin thil kan thlir tikah kap hnih in kan thlir ringring ding a thupi. Himi buainak hi ziangruangah a thleng, zo ruangah, ziangti zawngin tiin kilkip in kan thlir asile hmuhdaan tampi a suak dingih kan ṭong ding le kan ngan lang dingmi tla malte supawk a theih deuh ding. Thuanthu phorhsuak ngamlo ding mi kan ngan rero mi tla hi ralrinzet a ṭuul. Thilṭha kan tuah ṭhatmi lawng kan phorhsuak ṭheu ih thilṭha lo kan timi le phorhsuak ngam dah lo in, cucu daan zawngin kan thlir asile a dik thluh lo. Kan diklonak tla kan langter ngam thotho a ṭuul.

Ramsa bangih rak tlangleng dah, kanni Chinmi pawl hi tu ahcun kan ṭhangso ih ral tla kan nei thei zo. Mi va thawi tla kan thiam ih mi va bawm tla kan thiam zo. Cule ṭhangso thiam lo dingih um daan tla kan thiam ih ṭhangso dingih um daan tla kan thiam. Ziangvek asi at timi le ziangvek a si fim timi tla a theitu tampi kan suak zo. Curuangah lehnak pawl ih kan buai ṭheunak pawl tla hi nuam tete in can a her dingih kan taansan vivo thei ding.

Raltlan dinhmun ih kan caamnak ram pahnih Malaysia le India sung khalah lehpannak kan tuah tikah buainak a um men thei. Malaysia cu report ka siar ngah dah lo asinan Delhi (India) ih lehnak an tuah ahcun buainak hi a suak ringring. Kan dunglam kum 5 hlirin tu ahcun lehpannak ih buainak tuah duhlotu an mino lak khalah an tam sawn.  New Delhi ka um lai 2010 (>> Kan Mual Pho Ni timi ka nganmi) khalah MP pawl hmai tiangah an rak thawiaw vauhvauh ko. Asinan, nikum pawl ih lehpannak ahcun cuvekih report theih ding a um nawnlo. Lehpannak pawlih nasateen zuamawk hin hmasawnnak maw hmasawnlonak a suahpi tamsawn timi hi micangkangpawl khalih debate rero mi cu a si.