Death Penalty Is A Crime!!!

Thah dingih daan tatnak ‘death penalty’ hi ram tampi ah sekhaazet ih hman rero a si. A duhlotu ram tthen pawl cun damsung thawngthlak ti’n an tthum. Damsung thawnginn sungih um khal thah ding ih dantatnak thawn thu hmunkhat a si. Theicing in nitin kum 50-60 sung an thi cuahco tinak a si. Nunnak lak tiang cawhkuannak pekawk hi hremawknak menmen cu a si hrimhrim lo. Nunak cu Laksawng bang ih pek a theih lo ruangah nunnak laksakawk ding a si lo.

Mi pakhat in pakhat a thah tikah khawtlang cun a thattu kha a nunnak lak sak ve dingah thuthluknak a tuah theu. Kan thlir thiam maw? Mi thah cu sual rori a si ruangah mi thattu khawtlang (society) khal a misual mawh nei a si. Mawh neilo, pakhat cu mi pakhat in a that ta riai. A pawi tuk aw, tingaihnak a um nawn fawn lo! A thattu thah lo bak lamzin dang a um nawn lo kan ti pang maw?. Sikhalsehla a thattu kan thah tikah a thah mi pa kha a nung sal thei ding asi ahcun thah man umzia nei ngaingai a si ding. Asinan cuvek in a cang thei fawn lo.

Kum tin thawnginn tum sinsin in kan sak. Rorelnak fek sinsin, hremnak khal nasa sinsin in kan tuah asinan thawngtla an dem deuh cuang maw…thahawk a dem deuh cuang ti a um ngaingai maw? Minung nunthlengnak hi hremawknak le nunsimawknak ruangah a si ngaingai maw ti khal cu ruah sawn ding ih thupi pakhat a si. Himi ca siartu lakah mi tamsawn cun death penalty pek nan lungkim hrimhrim ding cule mi that an dem deuh ding tiah nan ruat cio ding ka zum. Asinan kan pa Moses san ihsin ‘Eyes for eyes’ tiih kan leitlun kan feh vivo ahcun daihnak le remnak a thleng dah lo ding a si. Death penalty hmannak ram ah misual an mal cuang maw ti khal ruah tlak zetmi a si.