Kan vantlang ah harsatnak le beidawnnak thlipi huk a tlen ve pang khalle “Nangmai mawh”asilole “An mawimawh” tiaw lo hram uh si. Thlipi hran caan a um hrimhrim. A beunak ding a thupi sawn. Demawknak le relsiatawknak kan vantlang le rorelnak zatlang pawl ah thang lo hram sehla ziangtluk kan vahvaihnak leitlun te hi a nuam ding!.
Kan cennak leitlun thianfai dingah vancung mipawl an rung tum lo ding. Kan umnak sehvel pawl cu kanmah lala ih thianfai ding a si ruangah zocio khalin kan vantlang ih boruak zilthli thiang te kan dawn theinak dingah mawhphurhnak kan nei cio a si. Kan biaknak lam ah thlarau ro cuahco ih kan theiawk tikah a hruaitu pawl lawng mawhthluk theih an si hrimhrim lo member pawl khalin tlaksamnak tampi neih a theih a si.
Curuangah kan biaknak le vantlang thansohnak dingah a kilkawmte ih pitar-putar, mifarah le cathiamlo rual te khal kan thupi ngaingai. Cun, zianghman ih tel tum lo ziangkim hi a cancan in cang seh titupawl cu kan leitlun tibeuhtu an siih mawhphurh an si ding. Kan biaknak lam ah rem tulmi tampi kan nei, kan vantlang hruaiawk daan ah palhmi tampi kan nei, cuipawl kha suncaw fun ih kan rem ding mi pawl cu an si.
Comments
Post a Comment