Himi ca na siar tiang duhdawtnak timi zohman in kan simfiang thei hrihh lo. Leitlun thar ra hmangtu ding kan tefasinpawl khalin an simfiang thei cuang lo ding. Lei le van semsuahtu ih duhdawtnak hrimhrim tla cu simfiang thei ding rual a si lo.
Leitlun duhdawtnak hi theitawk suah in simfiang tum a si theu nan mipakhat hrangih diriam zetih a simfiang mi cu mipakhat leh hrangah a rak diriam tawk cuanglo ruangah duhdawtnak simfiang daan ah dikbik a um thei lo.
Duhdawtnak kan hmatawn daan a bangawk lo cio ruangah simfiangdaan khal a dangdang cio a si.
Mithenkhat an duhdawtmi an fala/tlangval an co. Mihrekkhat in an co lo. Mihretkhat cun an duhmi an colo ruangah an that aw. Mihretkhat le thung cu an phu dingih an ruahlo mi thawn an co aw ruairi. Mihrekhat le thung cu duhdawtnak tlasam hrimhrim an rak um.
Duhdawtnak hi hmun thum ah tla an then theu nan cui hmun thum pawl cun duhdawtnak zaten’ a simfiang thei cuang fawn lo. Duhdawtnak cu a dik tiih kan ruah hnakin a va hla deuh. Na pawm, pangpar na pe, na langter, na hlan, na sim asinan simthiamlo mi duhdawtnak cu atang lai hrih a si. In duh maw?
tiih thusuhnak na tawn tikah ka lo duh na ti ding asinan ziangtlukin i duhdawt tiih suh na si tikah ziangtin na sanglet ding?Na nunnak zate thawn na dam sung hmuahhmuah ah duhdawtnak ih a thuukzia simfiang tum khalawla na simfiang thei hrimhrim lo ding. Asinan, van cung duhdawtnak cu zalennak a si tilawngte eltheih rual lo in kan fiang a si. Leitlun duhdawtnak cu tipithuanthum bang tuk a si. Asinan tipithuanthum khal cun taw a nei thotho. Van cung duhdawtnak cu van dumpi bangin tawpnak neilo simfiang theilo taktak cu a si.
Hiti khalin kan sim bet thei; mipakhat na duhdawt tikah a ziangbik na duhdawt? A zaten si ko lo maw? Na duh tuk ruangah na tap ding a sinan na duhdawtnak a thuukzia lawngte cu na simfiang thei cuang fawnlo ding. Na duhdawtmi cu sualzet khalsehla asilole thuanthu sia rapthlakzet khal rak nei hmansehla na duhdawt thotho ding.
Ninu cun eng mi pek lo bak hna dang hrimhrim a neilo, hliahtu khawdur sahpi a um caan khalah a pahtlang ih a eng sal thotho. Cuvekin hnaihnoktu lak ihsin duhdawtnak thacak cun in bawm theu ih in zuamtu le in hnaihnoktu pawl kan neih sal theu a si.
Duhdawtnak kan theifiang kan ti ahcun kan theihfianglo mi tamsawn kan lang ter. Mipakhat in thi zik te in lo duhdawt bang sehla ziangtin na cohlang ding? Thli lakih a um duhdawtnak hi hmuh theih le tham theih khalin a um theu nan simfiang hi cu a har hrih ko. Kanmah le tawkten’ duhdawtnak ah veikhat te tal kan rak pil ngah ding ka zum. Ziangtin fala le tlangval duhdawtnak hi kan ruat cio?
Comments
Post a Comment